ప్రముఖ టెలికాం సంస్థ రిలయన్స్ జియో సేవలు దేశవ్యాప్తంగా నిలిచిపోయాయి. పలు ప్రధాన నగరాల్లో మొబైల్ ఇంటర్నెట్ సేవలు ఆగకపోయినా.. యూజర్లు కాలింగ్, మెసేజ్ లతో సమస్యలు ఎదుర్కొన్నారు. సోమవారం రాత్రి నుండి యూజర్లు ఈ సమస్యలు ఎదుర్కొంటున్నారు. ఈ విషయంపై సోషల్ మీడియాలో జియోని ట్యాగ్ చేస్తూ.. ఫిర్యాదు చేశారు. కానీ ఆ సంస్థ నుండి ఇంతవరకూ ఎలాంటి స్పందన లేదు. సోమవారం రాత్రి సుమారు 3 గంటల సమయం పాటు జియో సేవలకు అంతరాయం కలిగింది.
మొబైల్ ఇంటర్నెట్ సేవలు మాత్రం అందుబాటులో ఉన్నా కాల్స్, మెసేజ్ లు చేయడంలో యూజర్లు ఇబ్బంది పడ్డారు. ఓ యూజర్ తన మొబైల్‌లో ఉదయం నుంచి VoLTE సిగ్నల్ కనిపించడం లేదని, ఫోన్‌కాల్స్‌ చేయలేకపోయినట్లు ట్వీట్‌ చేశారు. సాధారణ కాల్స్‌లో సమస్యలు ఉన్నప్పుడు 5జీ సేవలు ఎలా అందిస్తారని కంపెనీని ప్రశ్నిస్తూ.. పోస్టులు పెట్టారు. ప్రస్తుతం ట్విట్టర్‌లో #Jiodown ట్రెండ్ అవుతోంది. కమ్యూనికేషన్ లేకపోవడం వల్లే తన ఫ్లైట్ మిస్సయిందని ఓ యూజర్ ఆవేదన వ్యక్తం చేశారు. దీనికి ఎవరు పరిహారం చెల్లిస్తారంటూ ప్రశ్నించారు. ఇప్పటి వరకూ జియో సేవలకు అంతరాయం కలగడంపై సదరు సంస్థ స్పందించకపోవడంపై వినియోగదారుల నుండి ఆగ్రహం వ్యక్తమవుతోంది.