Kharge on US tariffs : భారతీయ ఉత్పత్తులపై అమెరికా 50 శాతం సుంకాలను విధించడం దేశీయ రాజకీయాల్లో అలజడి సృష్టిస్తోంది. ఈ పరిణామంపై కాంగ్రెస్ అధ్యక్షుడు మల్లిఖార్జున ఖర్గే తీవ్రస్థాయిలో స్పందిస్తూ, ఇది ప్రధాని నరేంద్ర మోదీ ప్రభుత్వ ఘోర విదేశాంగ విధాన వైఫల్యానికి నిలువుటద్దమని ఘాటుగా విమర్శించారు. మోదీ సర్కారు దౌత్యపరమైన వైఫల్యం కారణంగానే నేడు దేశంలోని పరిశ్రమలు, రైతులు భారీ మూల్యం చెల్లించుకోవాల్సి వస్తోందని ఆయన ఆరోపించారు. అసలు ఖర్గే ఆరోపణల వెనుక ఉన్న వాస్తవాలేంటి..? ప్రభుత్వం ఈ విమర్శలను ఎలా ఎదుర్కోనుంది..? ఈ సుంకాల దెబ్బ దేశ ఆర్థిక వ్యవస్థను ఎంతలా ప్రభావితం చేయనుంది..?

కేంద్రంపై ఖర్గే విమర్శల వర్షం : అమెరికా సుంకాల పెంపును అస్త్రంగా చేసుకుని, కాంగ్రెస్ అధ్యక్షుడు మల్లిఖార్జున ఖర్గే ‘ఎక్స్’ వేదికగా ప్రధాని మోదీ సర్కారుపై విమర్శల దాడికి దిగారు. ఆయన ఆరోపణలను  పరిశీలిస్తే…

విఫలమైన దౌత్యం, వాణిజ్య చర్చలు: “70 ఏళ్ల కాంగ్రెస్ పాలనలో విదేశాంగ విధానం విఫలమైందని మీరు ఆరోపించలేరు. అమెరికాతో కీలకమైన వాణిజ్య ఒప్పందం చేసుకోవడంలో ప్రధాని మోదీ పూర్తిగా విఫలమయ్యారు. దాని ఫలితంగానే ఇప్పుడు ట్రంప్ మనల్ని బెదిరిస్తున్నారు, బలవంతం చేస్తున్నారు. అయినా మీరు మౌనంగానే ఉన్నారు,” అని ఖర్గే నిప్పులు చెరిగారు.

ఆర్థిక భారం, రంగాలపై ప్రభావం: సుంకాల వల్ల దేశంపై పడే ఆర్థిక భారాన్ని ఖర్గే అంకెలతో సహా వివరించారు. 2024లో భారత్ నుంచి అమెరికాకు సుమారు రూ.7.51 లక్షల కోట్ల విలువైన ఉత్పత్తులు ఎగుమతయ్యాయి. దీనిపై 50 శాతం సుంకాలు విధిస్తే దాదాపు రూ.3.75 లక్షల కోట్ల పెను భారం మనపై పడుతుంది. దీనివల్ల చిన్న పరిశ్రమలు, వ్యవసాయం, డెయిరీ, ఎలక్ట్రానిక్స్, ఆభరణాలు, ఔషధాలు, వస్త్ర పరిశ్రమ వంటి కీలక రంగాలు కుప్పకూలతాయి. ఈ పరిస్థితిని ఎలా ఎదుర్కోవాలో కూడా ఈ ప్రభుత్వానికి తెలియదు,” అని ఆయన ఆవేదన వ్యక్తం చేశారు.

ముందస్తు హెచ్చరికలను పెడచెవిన పెట్టారు: ట్రంప్ సుంకాలు విధిస్తారని గత కొన్ని నెలలుగా హెచ్చరిస్తున్నా, ప్రభుత్వం బడ్జెట్‌లో కీలక రంగాలను ఆదుకోవడానికి ఎలాంటి చర్యలు తీసుకోలేదని ఖర్గే ఆరోపించారు. “గతంలో బ్రిక్స్ దేశాల సమావేశంలోనే ట్రంప్ సుంకాల గురించి హెచ్చరించారు. ఈ విషయం మనకు ముందే తెలిసినా, వ్యవసాయం, MSME వంటి రంగాలను బలోపేతం చేసే చర్యలు బడ్జెట్‌లో చేపట్టలేదు,” అని ఆయన విమర్శించారు.

ఆత్మగౌరవాన్ని తాకట్టు పెట్టారు: గతంలో కాంగ్రెస్ ప్రభుత్వాలు అమెరికాతో ఆత్మగౌరవంతో కూడిన సంబంధాలు నెరిపాయని ఖర్గే గుర్తుచేశారు. “నౌకాదళ బెదిరింపుల నుంచి అణు పరీక్షల సమయంలో విధించిన ఆంక్షల వరకు అనేక ఒత్తిళ్లను ఎదుర్కొన్నా, దేశ గౌరవాన్ని తగ్గకుండా చూసుకున్నాం. కానీ, పాకిస్థాన్‌తో కాల్పుల విరమణ ఒప్పందంపై ట్రంప్ వ్యాఖ్యలు చేసినా ఈ ప్రభుత్వం మౌనంగానే ఉండిపోయింది,” అని ఆయన ఆరోపించారు. ఈ నేపథ్యంలో, రష్యా నుంచి చమురు కొనుగోలును కారణంగా చూపుతూ అమెరికా విధించిన 50% సుంకాలు (ఆగస్టు 7 నుంచి 25%, ఆగస్టు 27 నుంచి మరో 25%) దేశీయంగా రాజకీయ వేడిని మరింత పెంచాయి.