Premanand Maharaj on menstruation during pilgrimage : రుతుస్రావం అనేది మహిళల జీవితంలో అత్యంత సహజమైన, పవిత్రమైన శారీరక ప్రక్రియ. అయినప్పటికీ, మన సమాజంలో ఈ ప్రక్రియపై అపారమైన అపోహలు, మూఢనమ్మకాలు, ఆంక్షలు ప్రబలంగా ఉన్నాయి. ముఖ్యంగా, ఆ సమయంలో మహిళలు దేవాలయాలకు వెళ్లకూడదని, పూజలు చేయకూడదని చాలామంది బలంగా విశ్వసిస్తారు. మరి, ఎంతో వ్యయప్రయాసలకోర్చి సుదూర తీర్థయాత్రలకు వెళ్లినప్పుడు రుతుక్రమం వస్తే పరిస్థితి ఏంటి..? దైవ దర్శన భాగ్యాన్ని వదులుకోవాల్సిందేనా? ఈ సున్నితమైన, కీలకమైన అంశంపై ప్రముఖ ఆధ్యాత్మికవేత్త ప్రేమానంద్ మహారాజ్ ఇచ్చిన శాస్త్రీయ, పౌరాణిక వివరణ ఇప్పుడు సోషల్ మీడియాలో సంచలనం సృష్టిస్తోంది.
భక్తురాలి సందేహం.. మహారాజ్ సమాధానం: ప్రస్తుతం దేశంలో అత్యంత ప్రాచుర్యం పొందిన ఆధ్యాత్మిక గురువులలో ప్రేమానంద్ మహారాజ్ ఒకరు. ఆయన నిర్వహించే సత్సంగ కార్యక్రమాలకు దేశంలోని ప్రముఖులతో సహా వేలాది మంది భక్తులు తరలి వస్తున్నారు. ఇటీవల జరిగిన ఓ సత్సంగ్‌లో, ఒక మహిళ “గురువుగారూ, ఎంతో దూరం ప్రయాణించి తీర్థయాత్రకు వచ్చినప్పుడు మహిళలకు రుతుస్రావం వస్తే, వారు దైవ దర్శనం చేసుకోవచ్చా?” అని సందేహాన్ని వెలిబుచ్చింది.
రుతుస్రావం నింద కాదు.. వందనీయం : ఆ భక్తురాలి ప్రశ్నకు ప్రేమానంద్ మహారాజ్ ఎంతో ఓపికగా, పురాణ గాథను ఉటంకిస్తూ అద్భుతమైన సమాధానమిచ్చారు.
పురాణ గాథ: “వృత్రాసురుడు అనే రాక్షసుడిని సంహరించినప్పుడు దేవరాజు ఇంద్రునికి బ్రహ్మహత్యా పాతకం చుట్టుకుంది. ఆ మహా పాపాన్ని పోగొట్టేందుకు, బ్రహ్మర్షులు దానిని నాలుగు భాగాలుగా విభజించారు. ఒక భాగాన్ని నదులకు, మరొక భాగాన్ని చెట్లకు, ఇంకో భాగాన్ని భూమికి పంచారు. నదుల్లో వచ్చే నురుగు, చెట్ల నుంచి కారే జిగురు ఆ పాప ఫలాలే,” అని వివరించారు.
మహిళల త్యాగం: “ఇక నాలుగో భాగాన్ని మహిళా లోకం స్వీకరించింది. వారు ఎలాంటి దోషం చేయకపోయినా, లోక కల్యాణం కోసం ఆ పాపంలో కొంత భాగాన్ని తమపై వేసుకున్నారు. దాని ప్రతిరూపమే మహిళల్లో ప్రతినెలా జరిగే రుతుస్రావం. అంతటి త్యాగం చేసిన మహిళలు నిందార్హులు కాదు, వారు చేతులెత్తి నమస్కరించదగిన వారు,” అని మహారాజ్ స్పష్టం చేశారు.
దర్శనం చేసుకోవచ్చు.. కానీ కొన్ని నియమాలతో : “రుతుస్రావం అనేది ఒక సహజమైన శారీరక ప్రక్రియ. తీర్థయాత్రలు అనేవి పదేపదే చేసేవి కావు. కాబట్టి, అంత దూరం వెళ్ళినప్పుడు దైవ దర్శన భాగ్యాన్ని వదులుకోకూడదు,” అని ఆయన సూచించారు.
నియమాలు: యాత్రలో ఉన్నప్పుడు రుతుక్రమం వస్తే, మహిళలు శుభ్రంగా స్నానం చేసి, గర్భగుడిలోకి ప్రవేశించకుండా, దూరం నుంచే స్వామివారిని దర్శించుకోవచ్చు. అయితే, పూజా సామాగ్రిని తాకడం, స్వయంగా నైవేద్యం సమర్పించడం వంటివి చేయకూడదు.
సోషల్ మీడియాలో వెల్లువెత్తిన స్పందన: ప్రేమానంద్ మహారాజ్ ఇచ్చిన ఈ వివరణకు సంబంధించిన వీడియో సోషల్ మీడియాలో వైరల్ కావడంతో, నెటిజన్ల నుంచి విశేష స్పందన లభించింది. “ఈ వీడియో చూస్తుంటే ఎందుకో కన్నీళ్లొచ్చాయి,” అని ఒకరు వ్యాఖ్యానించగా, “ప్రతి ఒక్కరూ వినాల్సిన అద్భుతమైన వివరణ,” అని మరొకరు ప్రశంసించారు. ఓ మహిళా నెటిజన్ తన అనుభవాన్ని పంచుకుంటూ, “నేను రుతుస్రావం సమయంలోనే వైష్ణో దేవి ఆలయానికి వెళ్లాను, పూజలు చేశాను. నాకేమీ కాలేదు. దేవుడు మన భక్తిని చూస్తాడు కానీ, శారీరక స్థితులను కాదు,” అని పేర్కొంది.
