Indian military operation against Pakistan : భారత సైనిక సామర్థ్యం ముందు పాకిస్థాన్ మరోసారి తలవంచిన(ఒక రహస్య అధ్యాయం) వెలుగులోకి వచ్చింది. భారత వాయుసేన గుండెల్లో దడ పుట్టించిన ఆ రహస్య ఆపరేషన్ పేరు ‘ఆపరేషన్ సింధూర్’. కేవలం యాభై బాంబులకే పాక్ వెన్నులో వణుకు పుట్టించి, యుద్ధాన్ని ముగించేలా చేసిన ఈ ఆపరేషన్‌కు సంబంధించిన కీలక రహస్యాలను ఎయిర్ మార్షల్ నర్మదేశ్వర్ తివారీ మొట్టమొదటిసారిగా బయటపెట్టారు.
డిఫెన్స్ సమ్మిట్‌లో పాల్గొన్న ఎయిర్ మార్షల్ నర్మదేశ్వర్ తివారీ, ‘ఆపరేషన్ సింధూర్’ గురించిన అత్యంత కీలకమైన విషయాలను కొన్ని వీడియో ఆధారాలతో సహా వివరించి దేశవ్యాప్తంగా సంచలనం సృష్టించారు. ఆయన మాటల్లోనే, ఈ ఆపరేషన్ భారత వాయుసేన సన్నద్ధతకు, ప్రభుత్వ దృఢ సంకల్పానికి నిలువుటద్దం.
ప్రభుత్వ పక్కా వ్యూహం: ఈ ఆపరేషన్ ప్రారంభానికి ముందు కేంద్ర ప్రభుత్వం వాయుసేనకు మూడు స్పష్టమైన లక్ష్యాలను నిర్దేశించిందని తివారీ వెల్లడించారు. అవి:
గట్టి గుణపాఠం: ప్రతీకార చర్య అత్యంత స్పష్టంగా, బలంగా ఉండి, శత్రువుకు గట్టి గుణపాఠం చెప్పాలి.
భవిష్యత్తుకు భరోసా: భవిష్యత్తులో భారత్ వైపు కన్నెత్తి చూడాలంటేనే భయపడేలా బలమైన సందేశం పంపాలి.
సంపూర్ణ స్వేచ్ఛ: సైన్యానికి కార్యాచరణలో పూర్తి స్వేచ్ఛ ఇవ్వాలి, అవసరమైతే సంపూర్ణ యుద్ధానికైనా సిద్ధంగా ఉండాలి. “మాకు పూర్తి స్వేచ్ఛ ఇవ్వడమే మాకు అతిపెద్ద బలంగా మారింది. దానివల్లే మేం మెరుపువేగంతో నిర్ణయాలు తీసుకోగలిగాం” అని తివారీ ఉద్ఘాటించారు.
లక్ష్యాలను ఎలా ఎంచుకున్నారు : ఈ ఆపరేషన్‌లో భాగంగా మొత్తం ఏడు ఉగ్రవాద స్థావరాలను లక్ష్యంగా చేసుకున్నట్లు ఎయిర్ మార్షల్ తెలిపారు. అందులో ప్రధానమైనవి:
మురిడ్కే: అంతర్జాతీయ సరిహద్దుకు కేవలం 30 కిలోమీటర్ల దూరంలో ఉన్న ఇది, లష్కర్-ఎ-తొయిబా (ఉగ్రవాద సంస్థ) ప్రధాన కార్యాలయం.
బహవల్పూర్: సరిహద్దుకు 100 కిలోమీటర్ల దూరంలో ఉన్న ఇది, జైష్-ఎ-మహ్మద్ ఉగ్ర సంస్థకు గుండెకాయ లాంటిది. “సామాన్య ప్రజలకు ఎలాంటి నష్టం జరగకూడదన్నది మా ప్రథమ కర్తవ్యం. అందుకే ప్రతీ లక్ష్యాన్ని అనేక చిన్న చిన్న పాయింట్లుగా విభజించి, వాటిపైనే గురిపెట్టి దాడులు చేశాం” అని తివారీ వివరించారు.
దాడి తీరు.. విధ్వంసపు తీరు : దాడుల అనంతరం తీసిన డ్రోన్ వీడియోల్లో భవనాల పైకప్పులకు కేవలం చిన్న రంధ్రాలు మాత్రమే కనిపించాయని, కానీ లోపలి నుంచి తీసిన వీడియోలు చూస్తే అసలు విషయం బయటపడిందని తివారీ తెలిపారు. ఆ భవనాలు పునాదులతో సహా కుప్పకూలిపోయి, ఉగ్రవాదుల కమాండ్ సెంటర్లు పూర్తిగా నేలమట్టమయ్యాయి. మురిడ్కేలోని ఉగ్రవాద కార్యాలయ భవనం, ఇద్దరు కీలక నాయకుల ఇళ్లను, బహవల్పూర్‌లోని ఐదు స్థావరాలను క్షిపణులతో ఛిద్రం చేసినట్లు ఆయన స్పష్టం చేశారు.
నాలుగు రోజుల్లోనే ముగింపు: “యుద్ధం మొదలుపెట్టడం సులభం, కానీ దాన్ని ముగించడమే కష్టం. మేం కేవలం 50 కంటే తక్కువ ఆయుధాలతోనే ఆ పనిని చేసి చూపించాం” అని తివారీ గర్వంగా ప్రకటించారు. కేవలం నాలుగు రోజుల తీవ్ర దాడుల తర్వాత, పాకిస్థాన్ దిగివచ్చిందని, మే 10న సాయంత్రం 6 గంటల నుంచి సైనిక చర్యలు నిలిపివేయడానికి అంగీకరించిందని తెలిపారు. ఈ విజయం వెనుక ‘ఇంటిగ్రేటెడ్ ఎయిర్ కమాండ్ అండ్ కంట్రోల్ సిస్టమ్’ అనే అత్యాధునిక సాంకేతిక వ్యవస్థ కీలక పాత్ర పోషించిందని, దాని వల్లే భారత్ మెరుపు వేగంతో స్పందించగలిగిందని ఆయన విశ్లేషించారు.
