Prajwal Revanna Case Technology : దేశవ్యాప్తంగా సంచలనం సృష్టించిన జేడీఎస్ ఎంపీ ప్రజ్వల్ రేవణ్ణ అత్యాచారం కేసులో అతడికి జీవిత ఖైదు పడటం వెనుక ఆధునిక సాంకేతికత కీలకపాత్ర పోషించింది. వీడియోలలో ఎక్కడా తన ముఖం కనిపించకుండా అత్యంత జాగ్రత్త పడినప్పటికీ, ప్రత్యేక దర్యాప్తు బృందం (SIT) ప్రయోగించిన ఒక వినూత్న టెక్నాలజీ అతడి బండారాన్ని బయటపెట్టింది. వేలిముద్రల వలే శరీరంలోని ప్రతీ భాగం ఒక ప్రత్యేక గుర్తింపును కలిగి ఉంటుందనే శాస్త్రీయ సూత్రాన్ని ఆధారంగా చేసుకుని, నిందితుడిని చట్టానికి పట్టించారు. అసలు ముఖమే కనిపించకుండా నిందితుడిని ఎలా గుర్తించారు..? 

‘మల్టీ-లెవల్ డిజిటల్ కంపారిజన్ సిస్టమ్’ అనే అస్త్రం : ప్రజ్వల్ రేవణ్ణ కేసు దర్యాప్తులో సిట్ ఉపయోగించిన ప్రధాన సాంకేతికత ఇదే. నిందితుడు ఎంత తెలివిగా ముఖాన్ని దాచినా, అతడి శరీరంపై ఉన్న ప్రత్యేక గుర్తులు, గాత్రం (వాయిస్),  డీఎన్‌ఏ వంటి బహుళ ఆధారాలను పోల్చి చూసి, వీడియోలోని వ్యక్తి నిందితుడేనని శాస్త్రీయంగా నిరూపించడమే ఈ వ్యవస్థ ప్రత్యేకత. గతంలో తుర్కియేలో చిన్నారులపై జరిగిన లైంగిక దాడుల కేసులో నిందితులను గుర్తించడానికి ఉపయోగించిన ఈ అధునాతన పద్ధతిని, సిట్ అధికారులు ఈ కేసులో విజయవంతంగా అమలు చేశారు.

నిరూపణకు నాలుగు స్తంభాలు : హసన్ జిల్లా హోలెనరసిపూర్‌లోని ఫామ్‌హౌస్‌లో, బెంగళూరులోని ఇంట్లో 48 ఏళ్ల పనిమనిషిపై అత్యాచారం జరిపినట్లు ఆరోపణలు ఎదుర్కొన్న ప్రజ్వల్, ఆ దృశ్యాలను వీడియో తీశాడు. అయితే, ఎక్కడా తన ముఖం రికార్డ్ కాకుండా చూసుకున్నాడు. కానీ, సిట్ బృందం నాలుగు కీలక అంశాల ఆధారంగా అతడి నేరాన్ని నిరూపించింది.

డీఎన్ఏ సాక్ష్యం: అత్యాచారం జరిగిన సమయంలో బాధితురాలు ధరించిన చీరను ఫోరెన్సిక్ బృందం స్వాధీనం చేసుకుంది. ఆ వస్త్రంపై లభించిన వీర్యం నమూనాలను, ప్రజ్వల్ రేవణ్ణ డీఎన్‌ఏతో పోల్చి చూడగా అవి సరిపోలాయి. ఇది ఈ కేసులో తిరుగులేని శాస్త్రీయ సాక్ష్యంగా నిలిచింది.

గాత్రం (వాయిస్ అనాలిసిస్): వీడియోలలో రికార్డ్ అయిన పురుషుడి గొంతును, ప్రజ్వల్ రేవణ్ణ వాయిస్ శాంపిల్స్‌తో ఫోరెన్సిక్ నిపుణులు విశ్లేషించారు. రెండూ ఒకే వ్యక్తివని వారు నిర్ధారించారు. డిజిటల్ సాక్ష్యంగా సమర్పించిన ఈ వీడియోలను ఎడిట్ కానీ, మార్ఫింగ్ కానీ చేయలేదని కూడా ప్రాసిక్యూషన్ రుజువు చేసింది.

శరీరంపై గుర్తులు: ఇదే ఈ కేసులో అత్యంత కీలకమైన అంశం. వీడియోలలో నిందితుడి ప్రైవేట్ భాగాలపై కొన్ని గాయాల గుర్తులు ఉన్నట్లు సిట్ గుర్తించింది. యూరాలజిస్ట్, చర్మవ్యాధి నిపుణులు, ఆర్థోపెడిస్ట్‌లతో కూడిన వైద్య బృందాన్ని సంప్రదించింది. కోర్టు అనుమతితో నిందితుడి శరీర భాగాలను ఫోటోలు తీసి, వీడియోలోని చిత్రాలతో పోల్చి చూశారు. రెండు చిత్రాలలోని గుర్తులు, శరీర నిర్మాణం ఒకే వ్యక్తివని వైద్య బృందం ధ్రువీకరించింది.

బాధితురాలి వాంగ్మూలం: పైన చెప్పిన మూడు శాస్త్రీయ ఆధారాలకు తోడు, బాధితురాలు ఇచ్చిన వాంగ్మూలం ఈ కేసుకు మరింత బలాన్ని చేకూర్చింది.

శాస్త్రీయ దర్యాప్తుకు కోర్టు ప్రశంసలు : ఈ కేసులో సిట్ చీఫ్, అదనపు డీజీపీ బీకే సింగ్ నాయకత్వంలోని బృందం అనుసరించిన ఆధునిక, శాస్త్రీయ దర్యాప్తు పద్ధతులను న్యాయమూర్తి సంతోష్ గజానన్ భట్ తన 480 పేజీల తీర్పులో ప్రత్యేకంగా ప్రశంసించారు. “ప్రాసిక్యూషన్ నిరూపించిన విషయం సందేహానికి అతీతమైనది” అని పేర్కొన్నారు. “ఒక మహిళను పదేపదే అత్యాచారం చేయడం హత్య కంటే పెద్ద నేరం. స్త్రీలను దేవతలుగా పూజించే సమాజంపై జరిగిన దాడిగా దీనిని పరిగణించాలి” అని కోర్టు తీవ్ర వ్యాఖ్యలు చేసింది. ఆధునిక డిజిటల్ ఫోరెన్సిక్స్ సహాయంతో, ముఖం కనిపించకపోయినా నేరస్థులను ఎలా పట్టుకోవచ్చో ఈ కేసు ఒక ఉదాహరణగా నిలిచింది.