Election integrity allegations : భారత ఎన్నికల ప్రక్రియపై కాంగ్రెస్ అగ్రనేత రాహుల్ గాంధీ సంచలన ఆరోపణల ‘హైడ్రోజన్ బాంబు’ పేల్చారు. హరియాణా అసెంబ్లీ ఎన్నికల్లో బీజేపీ, ఎన్నికల సంఘం (ఈసీ) కుమ్మక్కై ఏకంగా 25 లక్షల ఓట్లను చోరీ చేశాయని, లేదంటే కాంగ్రెస్ గెలిచి ఉండేదని ఆయన ధ్వజమెత్తారు. దీనికి సంబంధించిన పూర్తి ఆధారాలతో కూడిన ‘హెచ్-ఫైల్స్’ తమ వద్ద ఉన్నాయని, 100 శాతం రుజువులతోనే తాను మాట్లాడుతున్నానని స్పష్టం చేశారు. 

ఈసీ, బీజేపీ కుమ్మక్కు.. ‘ఆపరేషన్ సర్కార్ చోరీ’ : దిల్లీలో ఏర్పాటు చేసిన విలేకరుల సమావేశంలో రాహుల్ గాంధీ, ఎన్నికల సంఘంపై తీవ్రస్థాయిలో విరుచుకుపడ్డారు. “ప్రధాన ఎన్నికల కమిషనర్, ఇద్దరు కమిషనర్లు ప్రధాని మోదీతో పొత్తు పెట్టుకుని, కాంగ్రెస్‌ను ఓడించేందుకు ‘ఆపరేషన్ సర్కార్ చోరీ’ని విజయవంతంగా నిర్వహించారు,” అని ఆయన ఆరోపించారు. ఓట్ల చోరీ ద్వారా యువత భవిష్యత్తును లాక్కుంటున్నారని, ఈ అంశాన్ని దేశంలోని యువత తీవ్రంగా పరిగణించాలని పిలుపునిచ్చారు.

ఒకే ఫొటో.. 223 ఓట్లు  : ‘హెచ్-ఫైల్స్’లోని కొన్ని కీలక ఆధారాలను రాహుల్ బయటపెట్టారు.
25 లక్షల ఫేక్ ఓటర్లు: 2024 ఎన్నికల నాటికి హరియాణాలోని 2 కోట్ల మంది ఓటర్లలో 25 లక్షల మంది (12.5%) నకిలీ ఓటర్లేనని ఆరోపించారు. అంటే ప్రతీ 8 మందిలో ఒకరు ఫేక్ ఓటరేనని అన్నారు.

బ్రెజీలియన్ మోడల్ ఫొటో: ఓ బ్రెజీలియన్ మోడల్ ఫొటోతో ఓట్లను రిజిస్టర్ చేయించి, ఒకే ఫొటోపై 223 ఓట్లను జారీ చేశారని తెలిపారు. అదే ఫొటోతో ఓ మహిళ 10 వేర్వేరు బూత్‌లలో 22 సార్లు ఓటు వేసిందని, ఆ స్థానంలో కాంగ్రెస్ 22 వేల ఓట్ల తేడాతోనే ఓడిపోయిందని వివరించారు.
ఇది జాతీయ కుట్ర కావచ్చు

ఈ ఓట్ల చోరీ కేవలం హరియాణాకే పరిమితం కాదని, ఇది జాతీయ స్థాయిలో జరిగిన కుట్ర కావచ్చని రాహుల్ అనుమానం వ్యక్తం చేశారు. “మధ్యప్రదేశ్, ఛత్తీస్‌గఢ్, మహారాష్ట్ర ఎన్నికల్లోనూ ఇలాంటి అనుభవమే ఎదురైంది. అన్ని ఎగ్జిట్ పోల్స్ హరియాణాలో కాంగ్రెస్ గెలుస్తుందని చెప్పినా, ఫలితాలు తారుమారయ్యాయి. ఈ సమాచారం చూసి మొదట నేను నమ్మలేక, షాక్‌కు గురయ్యాను,” అని ఆయన అన్నారు. కౌంటింగ్‌కు రెండు రోజుల ముందు, గెలవడానికి తమ వద్దొక ‘వ్యవస్థ’ ఉందని సీఎం నయాబ్ సైనీ చేసిన వ్యాఖ్యలను ఆయన గుర్తుచేశారు.

వెంటనే స్పందించిన ఎన్నికల సంఘం : రాహుల్ ప్రెస్ మీట్ జరుగుతుండగానే, ఎన్నికల సంఘం వర్గాలు ఈ ఆరోపణలను ఖండించాయి.
అప్పీలేది?: ఓటర్ల జాబితాలపై కాంగ్రెస్ పార్టీ నుంచి ఒక్క అప్పీల్ కూడా దాఖలు కాలేదని ఈసీ స్పష్టం చేసింది.
ఏజెంట్లు ఏం చేస్తున్నారు?: పోలింగ్ బూత్‌లలో కాంగ్రెస్ ఏజెంట్లు ఏం చేస్తున్నారు? డూప్లికేట్ ఓటర్లపై అభ్యంతరం ఎందుకు చెప్పలేదని ప్రశ్నించింది.
తొలగింపులో తప్పేంటి?: డూప్లికేట్, చనిపోయిన, వలస వెళ్లిన ఓటర్ల పేర్లను తొలగించే ప్రక్రియను కూడా రాహుల్ వ్యతిరేకిస్తున్నారా అని ఈసీ నిలదీసింది.