Supreme Court on insensitive humor :  కామెడీ శృతి మించితే ఎలా ఉంటుంది..? అణగారిన వర్గాలను, ముఖ్యంగా దివ్యాంగులను అపహాస్యం చేస్తే..? సరిగ్గా ఇదే జరిగింది. దేశ సర్వోన్నత న్యాయస్థానం కొందరు స్టాండ్-అప్ కమెడియన్ల తీరుపై తీవ్ర ఆగ్రహం వ్యక్తం చేసింది. ‘ఇవేం దిక్కుమాలిన జోకులు’ అంటూ మండిపడింది. బహిరంగ క్షమాపణ చెప్పాల్సిందేనని ఆదేశించింది. అసలు ఆ కమెడియన్లు ఏమన్నారు..? న్యాయస్థానం ఎందుకింత కఠినంగా స్పందించింది..?

వికలాంగుల హక్కుల కోసం పనిచేసే ‘SMA క్యూర్ ఫౌండేషన్’ దాఖలు చేసిన పిటిషన్‌పై విచారణ సందర్భంగా సుప్రీంకోర్టు హాస్యనటుల తీరుపై చేసిన వ్యాఖ్యలు దేశవ్యాప్తంగా చర్చనీయాంశమయ్యాయి. 

పిటిషన్‌లో ఏముంది : దివ్యాంగుల హక్కుల సంస్థ అయిన ‘SMA క్యూర్ ఫౌండేషన్’.. ప్రముఖ స్టాండ్-అప్ కమెడియన్లు సమయ్ రైనా, విపున్ గోయల్, బల్రాజ్ పరంజీత్ సింగ్ ఘాయ్, సోనాలి ఠక్కర్, నిశాంత్ జగదీష్ తన్వర్‌లు తమ ప్రదర్శనలలో దివ్యాంగులను లక్ష్యంగా చేసుకుని, వారిని ఎగతాళి చేస్తూ, సున్నితత్వం లేకుండా జోకులు వేశారని ఆరోపిస్తూ సుప్రీంకోర్టును ఆశ్రయించింది. ఇది వారి హక్కులను కాలరాయడమేనని పిటిషన్‌లో పేర్కొంది.

ధర్మాసనం తీవ్ర ఆగ్రహం : జస్టిస్ సూర్య కాంత్, జస్టిస్ జోయ్‌మల్య బాగ్చిలతో కూడిన ధర్మాసనం ఈ పిటిషన్‌పై విచారణ చేపట్టింది. కమెడియన్ల తీరుపై తీవ్రంగా స్పందించింది. “మీరు కోర్టు ముందు క్షమాపణలు చెప్పారు, అదే పని మీ సోషల్ మీడియా ఖాతాల్లోనూ బహిరంగంగా చేయండి” అని ధర్మాసనం సూటిగా ఆదేశించింది. జరిమానా లేదా ఇతర ఖర్చుల విషయాన్ని తదుపరి విచారణలో తేలుస్తామని స్పష్టం చేసింది.

హాస్యానికి హద్దులుండాలి :ఈ సందర్భంగా జస్టిస్ జోయ్‌మల్య బాగ్చి కీలక వ్యాఖ్యలు చేశారు. “జీవితంలో హాస్యం చాలా ముఖ్యమైన భాగమే. కానీ, ఒకరితో కలిసి నవ్వడానికి, ఒకరిని చూసి నవ్వడానికి మధ్య ఒక స్పష్టమైన గీత ఉంది. ముఖ్యంగా ఆ హాస్యం అణగారిన వర్గాలను లక్ష్యంగా చేసుకున్నప్పుడు దాన్ని సహించే ప్రసక్తే లేదు” అని ఆయన తీవ్ర స్వరంతో హెచ్చరించారు.

వాణిజ్యంగా మారిన వాణి : జస్టిస్ బాగ్చి నేటి ట్రెండ్‌ను ప్రస్తావిస్తూ, “నేడు చాలా మంది ప్రభావశీలులు (Influencers) తమ వాణిని వాణిజ్యంగా మార్చేశారు. కేవలం వినోదం కోసమే కాకుండా, లాభం కోసం కూడా ప్రసంగాన్ని ఉపయోగిస్తున్నారు” అని అన్నారు. ఇలాంటి సందర్భంలో బాధ్యత మరింత ఎక్కువగా ఉండాలని పరోక్షంగా సూచించారు.
భావప్రకటనా స్వేచ్ఛకు కూడా హద్దులుంటాయని, ఇతరుల మనోభావాలను, ముఖ్యంగా బలహీన వర్గాల ఆత్మగౌరవాన్ని దెబ్బతీసే హక్కు ఎవరికీ లేదని సుప్రీంకోర్టు మరోసారి స్పష్టం చేసినట్లయింది.