Viksit Young Leaders Dialogue : దేశ భవిష్యత్తుపై మీకో ఆలోచన ఉందా? దాన్ని నేరుగా ప్రధానమంత్రితోనే పంచుకునే అవకాశం వస్తే ఎలా ఉంటుంది? యువత మేధస్సుకు పదును పెట్టి, వారి ఆలోచనలకు పట్టం కట్టేందుకు కేంద్ర ప్రభుత్వం ఓ సువర్ణావకాశాన్ని అందిస్తోంది. ఇంతకీ ఏమిటా పోటీ? అందులో పాల్గొనడం ఎలా? విజేతలకు దక్కే అరుదైన గౌరవం ఏంటి?

భారత యువతలోని సృజనాత్మకతను, నాయకత్వ పటిమను వెలికితీసే లక్ష్యంతో కేంద్ర యువజన సర్వీసులు, క్రీడా మంత్రిత్వ శాఖ ఆధ్వర్యంలోని ‘మేరా యువ భారత్’ (MY Bharat) ఓ వినూత్న కార్యక్రమానికి శ్రీకారం చుట్టింది. అదే ‘వికసిత్ యంగ్ లీడర్స్ డైలాగ్’. 2047 నాటికి భారతదేశాన్ని అభివృద్ధి చెందిన దేశంగా తీర్చిదిద్దాలనే ‘వికసిత్ భారత్’ మహోన్నత లక్ష్యంలో యువతను క్రియాశీల భాగస్వాములను చేయడమే ఈ కార్యక్రమం  ముఖ్య ఉద్దేశం.

ఈ పోటీల ద్వారా దేశవ్యాప్తంగా ప్రతిభావంతులైన యువ నాయకులను గుర్తించి, వారి ఆలోచనలను దేశ నిర్మాణం కోసం వినియోగించుకోవాలని ప్రభుత్వం భావిస్తోంది. విజేతలుగా నిలిచిన వారికి సాక్షాత్తూ ప్రధానమంత్రి నరేంద్ర మోదీతో సమావేశమై, దేశాభివృద్ధికి సంబంధించిన వ్యూహాలపై చర్చించే అపురూప అవకాశం లభిస్తుంది.

నమోదు నుంచి ప్రధానితో భేటీ వరకు: ఈ పోటీ ప్రక్రియ ఎంతో పారదర్శకంగా, పలు దశల్లో జరగనుంది. ఆసక్తిగల యువత ఈ అవకాశాన్ని సద్వినియోగం చేసుకోవచ్చు.

నమోదు ఇలా: ఆసక్తి ఉన్న యువత అక్టోబరు 15లోగా www.mybharat.gov.in వెబ్‌సైట్‌ను సందర్శించి తమ పేర్లను నమోదు చేసుకోవాలి. ఇంగ్లీషుతో పాటు 12 భారతీయ భాషలలో పోటీలో పాల్గొనే వెసులుబాటు ఉంది.

అర్హులు వీరే: 15 నుంచి 29 సంవత్సరాల మధ్య వయసున్న (సెప్టెంబరు 1 నాటికి) భారత పౌరులు ఎవరైనా ఈ పోటీకి అర్హులే.

ఎంపిక ప్రక్రియ: నాలుగు స్థాయిలలో ఈ పోటీలు జరుగుతాయి. క్విజ్, వ్యాసరచన, పవర్‌పాయింట్ ప్రజెంటేషన్, మరియు ఛాంపియన్‌షిప్ రూపంలో అభ్యర్థుల ప్రతిభను పరీక్షిస్తారు. దేశవ్యాప్తంగా మొత్తం పదివేల మందిని ఎంపిక చేసి జిల్లా, రాష్ట్ర, జాతీయ స్థాయిలలో బహుమతులు అందజేస్తారు.

అంతిమ విజేతలు: జాతీయ స్థాయిలో అత్యుత్తమ ప్రతిభ కనబరిచిన వారిని ప్రభుత్వ ఖర్చులతో ఢిల్లీకి ఆహ్వానిస్తారు. అక్కడ, స్వామి వివేకానంద జయంతి సందర్భంగా జరిగే జాతీయ యువజన వేడుకల వేదికగా, ప్రధానమంత్రి నరేంద్ర మోదీతో ముఖాముఖిలో పాల్గొనే భాగ్యం కలుగుతుంది.

ఈ అంశాలపై పట్టు సాధించండి: పోటీలో అడిగే ప్రశ్నలు ప్రధానంగా జనరల్ నాలెడ్జ్, 2014 నుంచి దేశం సాధించిన ప్రగతి, మన్‌కీ బాత్‌లో ప్రధాని ప్రస్తావించిన అంశాలు, మాదక ద్రవ్యాల నిర్మూలన, ఆత్మనిర్భర్ భారత్, ‘వోకల్ ఫర్ లోకల్’ వంటి సామాజిక, జాతీయ ప్రాధాన్యత కలిగిన అంశాలపై ఉంటాయి.

“యువత ఈ అవకాశాన్ని సద్వినియోగం చేసుకోవాలి. ప్రధాని మోదీని కలిసి భారతదేశ నవ నిర్మాణంలో తమ ఆలోచనలు పంచుకునే అదృష్టాన్ని దక్కించుకోవాలి,” అని ఆదిలాబాద్ జిల్లా ‘మేరా భారత్’ యువ అధికారి శైలి బెల్లాల్ పిలుపునిచ్చారు.