India’s Civil Aviation Leap: భారతదేశ రక్షణ రంగంలో ఎన్నో పురోగతులు సాధిస్తున్న హిందుస్థాన్ ఏరోనాటిక్స్ లిమిటెడ్ (HAL), ఇప్పుడు పౌర విమానయాన రంగంలోకి అడుగు పెట్టింది. ఇది దేశంలో ‘ఆత్మనిర్భర భారత్’ లక్ష్యానికి ఒక ప్రాముఖ్యత కలిగిన ముందడుగుగా నిలవనుంది.
రష్యా భాగస్వామ్యంతో సరికొత్త శకం
ప్రయాణికుల విమానాల పూర్తిస్థాయి ఉత్పత్తి కోసం, హెచ్‌ఏఎల్ (HAL) రష్యాకు చెందిన యునైటెడ్ ఎయిర్‌క్రాఫ్ట్ కార్పొరేషన్ (UAC) తో కీలక అవగాహన ఒప్పందం (MoU) కుదుర్చుకుంది. రష్యాలోని మాస్కోలో అక్టోబర్ 27, 2025న ఈ ఒప్పందం జరిగింది. దీని ప్రకారం, ఎస్‌జే-100 (SJ-100) సివిల్ కమ్యూటర్ జెట్‌లను భారత్‌లో తయారు చేసే హక్కులను హెచ్‌ఏఎల్ పొందుతుంది.
ఇది ఎందుకు చారిత్రకం? 1961లో ప్రారంభమై, 1988లో ముగిసిన ఏవీఆర్‌ఓ హెచ్‌ఎస్-748 ప్రాజెక్ట్ తర్వాత, దేశంలో ఒక పూర్తి స్థాయి ప్రయాణికుల విమానాన్ని తయారు చేయబోవడం ఇదే మొదటిసారి కావడం విశేషం. దశాబ్దాల తర్వాత, విమాన విడిభాగాలు, హెలికాప్టర్ల తయారీ నుంచి పూర్తి జెట్ విమానాల తయారీ వైపు భారత్ అడుగులు వేయడం ఆత్మవిశ్వాసాన్ని పెంచుతోంది.
ఉడాన్ పథకానికి ‘గేమ్ ఛేంజర్’
ఎస్‌జే-100 విమానం భారతదేశంలో ఉడాన్ (UDAN) పథకం కింద ప్రాంతీయ కనెక్టివిటీకి ఒక ‘గేమ్ ఛేంజర్’గా మారుతుందని హెచ్‌ఏఎల్ ఆశాభావం వ్యక్తం చేసింది. ఇది కేవలం 103 మంది ప్రయాణికుల సామర్థ్యం కలిగి, తక్కువ నిర్వహణ ఖర్చుతో స్వల్ప దూర ప్రయాణాలకు అనువుగా ఉంటుంది.
అంచనాల ప్రకారం, రాబోయే పదేళ్లలో దేశీయ ప్రాంతీయ కనెక్టివిటీకి ఈ తరహా చిన్న విమానాలు 200కు పైగా అవసరం. వీటితో పాటు, హిందూ మహాసముద్ర ప్రాంతంలోని అంతర్జాతీయ పర్యాటక ప్రాంతాలకు సేవలందించడానికి అదనంగా 350 విమానాలు కూడా అవసరమవుతాయి. ఈ భారీ డిమాండ్‌ను తీర్చడంలో స్వదేశీ ఉత్పత్తి కీలక పాత్ర పోషిస్తుంది. ఎస్‌జే-100 తయారీ ద్వారా భారత వైమానిక రంగంలో ప్రైవేట్ రంగ భాగస్వామ్యం, భారీగా ఉద్యోగాల కల్పన జరుగుతుందని భావిస్తున్నారు.
