Malaysia: మలేషియా ప్రభుత్వం భారతీయులకు వీసా ఫ్రీ ఎంట్రీ సౌకర్యం కల్పించగా.. దాని వల్ల సమస్యలు ఎదురవుతున్నాయి. 30 రోజుల వీసా ఫ్రీ ఎంట్రీ సౌకర్యాన్ని కల్పించినా.. చాలా మంది భారతీయ పౌరులు మలేషియా విమానాశ్రయాల్లో అడుగుపెట్టకుండానే వెనక్కి తిరిగి రావలసి వస్తోంది. అక్కడి ఇమ్మిగ్రేషన్ అధికారులు వారిని ‘నాట్ టు ల్యాండ్’ (NTL) కేటగిరీ కింద చేర్చి, దేశంలోకి ప్రవేశాన్ని నిరాకరిస్తున్న ఘటనలు ఇటీవల పెరిగాయి. దీనిపైనే భారత్‌లోని మలేషియా హైకమిషన్ ఒక ప్రకటన జారీ చేసింది. భారతీయ ప్రయాణికులను వెనక్కి పంపడానికి గల ప్రధాన కారణాలను కూడా హైకమిషన్ స్పష్టంగా వివరించింది. ప్రయాణానికి సరిపడా డబ్బు లేకపోవడం, అక్కడ స్టే చేసేందుకు సరైన ఆధారాలు (హోటల్ బుకింగ్ వంటివి) చూపించకపోవడం, తిరుగు ప్రయాణానికి కచ్చితమైన విమాన టికెట్ లేకపోవడం వంటి కారణాలతో ఎంట్రీని నిరాకరిస్తున్నట్లు పేర్కొంది. అంతేకాకుండా ఈ వీసా ఫ్రీ పథకాన్ని అడ్డం పెట్టుకుని ఉద్యోగాల కోసం వస్తున్నారని అనుమానం వస్తే.. వారిని కూడా అనుమతించడం లేదని తెలిపింది.
Read Also: Himachal: హిమాచల్ లో విరిగిన కొండచరియలు.. 50కి.మీ. మేర ట్రాఫిక్ జాం
ఎయిర్ పోర్టులోనే చిక్కుకుంటున్న ప్రయాణికులు
ఇలా ‘నాట్ టు ల్యాండ్’ కింద తిరస్కరణకు గురైన ప్రయాణికులు తీవ్ర ఇబ్బందులు ఎదుర్కొంటున్నారు. వారిని ఏ విమానయాన సంస్థ మలేషియాకు తీసుకొచ్చిందో, అదే సంస్థ వారిని తిరిగి భారత్‌కు పంపేంత వరకు విమానాశ్రయంలోనే వేచి ఉండాల్సి వస్తుంది. దీనికి కొన్నిసార్లు ఎక్కువ సమయం పట్టడంతో ప్రయాణికులు ఎయిర్‌పోర్టులోనే చిక్కుకుపోతున్నారు. మరోవైపు, ఈ వీసా ఫ్రీ పథకాన్ని ఆసరాగా చేసుకుని కొందరు మోసపూరిత ఏజెంట్లు అమాయక భారతీయులను తప్పుదోవ పట్టిస్తున్నారని హైకమిషన్ హెచ్చరించింది. ఈ స్కీమ్ కింద మలేషియాలో ఉద్యోగాలు ఇప్పిస్తామని నమ్మించి మోసం చేస్తున్నారని, అలాంటి వారి పట్ల ప్రజలు అప్రమత్తంగా ఉండాలని సూచించింది. ఈ వీసా ఫ్రీ పథకం కేవలం పర్యటనల కోసమేనని, ఉద్యోగాల కోసం కాదని స్పష్టం చేసింది. కాబట్టి మలేషియాకు వెళ్లే భారతీయ పౌరులు ప్రయాణానికి అవసరమైన అన్ని పత్రాలు, నిధులు, రిటర్న్ టికెట్ వంటివి కచ్చితంగా దగ్గర ఉంచుకోవాలని, ఇమ్మిగ్రేషన్ నిబంధనలను తప్పనిసరిగా పాటించాలని హైకమిషన్ స్పష్టం చేసింది.
Read Also: Rohit Sharma: ఏ బౌలరైనా బాదుడే.. సిక్సర్లపై రోహిత్ ఇంట్రెస్టింగ్ కామెంట్స్
