IRAN ISRAEL CONFLICT : ప్రస్తుతం పశ్చిమాసియాలో ఇజ్రాయెల్, ఇరాన్ దేశాల మధ్య ఉద్రిక్త పరిస్థితులు నెలకొన్నాయి. రెండు దేశాల మధ్య తలెత్తిన ఈ వివాదం కారణంగా ప్రపంచ భద్రతకు, ఆర్థిక స్థిరత్వానికి కూడా ముప్పు వాటిల్లే అవకాశం ఉంది. ఒక వైపు ఇజ్రాయెల్ తన భద్రతను కాపాడుకునే చర్యలుగా ఈ దాడులను పేర్కొంటుంటే, మరోవైపు ఇరాన్ తన సార్వభౌమత్వాన్ని కాపాడుకోవడానికి ప్రతీకారం తీర్చుకుంటామని హెచ్చరిస్తోంది.
అణుస్థావరాలే లక్ష్యంగా ఇజ్రాయెల్ దాడులు :
ఇరాన్‌పై ఇజ్రాయెల్ దాడులకు కఠిన శిక్ష తప్పదని ఇరాన్ సుప్రీం లీడర్ అయతుల్లా అలీ ఖమేనీ తీవ్రంగా హెచ్చరించారు. ఇజ్రాయెల్ తన దుర్మార్గపు స్వభావాన్ని మరోసారి బయటపెట్టిందని మండిపడ్డారు. ఇరాన్ సైనిక, అణు స్థావరాలపై జరిగిన దాడులు తమ సార్వభౌమత్వానికి ముప్పు అని ఆయన పేర్కొన్నారు. ఈ వ్యాఖ్యలు రెండు దేశాల మధ్య ఉద్రిక్తతలను మరింత పెంచి, అంతర్జాతీయ సమాజంలో తీవ్ర ఆందోళన కలిగిస్తున్నాయి. యుద్ధం జరగకుండా నివారించడానికి దౌత్యపరమైన చర్యలు తక్షణమే అవసరమని నిపుణులు అభిప్రాయపడుతున్నారు.
ఆపరేషన్ రైజింగ్ లయన్ :
ఇజ్రాయెల్ ‘ఆపరేషన్ రైజింగ్ లయన్’ పేరుతో ఇరాన్‌పై భారీ దాడులు చేసింది. ఈ దాడుల్లో ఇరాన్‌లోని నతాంజ్ యురేనియం శుద్ధి కేంద్రం ధ్వంసమైందని అంతర్జాతీయ అణు ఇంధన సంస్థ (IAEA) ధృవీకరించింది. ఇజ్రాయెల్ ప్రధాన లక్ష్యం ఇరాన్ అణు సామర్థ్యాలను దెబ్బతీయడమే. ఈ దాడుల వల్ల ఇరాన్‌లో కీలక సైనిక, అణు స్థావరాలు తీవ్రంగా దెబ్బతిన్నాయి. ఈ పరిణామాలు పశ్చిమాసియాలో యుద్ధ వాతావరణాన్ని తీవ్రతరం చేస్తున్నాయి, 1980 ఇరాక్ యుద్ధం తర్వాత ఇరాన్ ఎదుర్కొన్న అత్యంత కీలక దాడిగా దీన్ని పరిగణిస్తున్నారు.
అమెరికా వైఖరి – ట్రంప్ మీటింగ్ :
ఇరాన్‌పై ఇజ్రాయెల్ దాడుల విషయంలో అమెరికా తటస్థ వైఖరి తీసుకుంది. ఇజ్రాయెల్ తన ఆత్మరక్షణ కోసమే దాడి చేసిందని అమెరికాకు చెప్పినా, ఈ దాడులతో తమకు సంబంధం లేదని అమెరికా స్పష్టం చేసింది. అయితే, ఇరాన్‌ను తమ దేశ పౌరులపై దాడి చేయవద్దని హెచ్చరించింది, తమ బలగాల రక్షణే ప్రాధాన్యమని తెలిపింది. మరోవైపు, అమెరికా అధ్యక్షుడు డొనాల్డ్ ట్రంప్ ఈ వివాదంపై చర్చించేందుకు జాతీయ భద్రతా మండలి సమావేశానికి హాజరుకానున్నారు. ఈ దాడులపై ట్రంప్ గతంలోనే అనుమానం వ్యక్తం చేశారు.
OPERATION RAISING LION: ఇజ్రాయెల్-ఇరాన్ ఉద్రిక్తతలు
