Rupee Value Down due to trump: అమెరికా అధ్యక్షుడు ట్రంప్‌ విధానాలతో భారత కరెన్సీ కుదేలవుతోంది. భారత రూపాయి మంగళవారం (సెప్టెంబర్ 30)న కొత్త ఆల్ టైమ్ కనిష్ట స్థాయికి పడిపోయింది. భారత్, అమెరికా మధ్య కొనసాగుతున్న వాణిజ్య వివాదాలు అమెరికా డాలర్‌కు ఫుల్‌ డిమాండ్‌ తెచ్చి పెట్టాయి. ఇది రూపాయి మారకంపై ఒత్తిడిని పెంచింది. దీంతో డాలర్‌తో పోలిస్తే భారత కరెన్సీ రూ. 88.80 కు పడిపోయింది. గత వారం కనిష్ట స్థాయి 88.7975 కంటే మరింత దిగువకు పడిపోయింది. డాలర్ విలువ పెరగడం ప్రత్యక్షంగా భారత రూపాయిపై ప్రభావాన్ని చూపింది. కాగా, భారతదేశం మాత్రమే కాదు, మొత్తం ఆసియా ఆర్థిక వ్యవస్థపై డాలర్ ప్రభావం చూపింది. రూపాయితో పాటు, ఇతర ఆసియా దేశాల కరెన్సీలు కూడా ప్రభావితమయ్యాయి. దక్షిణ కొరియా, థాయిలాండ్, ఇండోనేషియా, సింగపూర్, చైనా, జపాన్ కరెన్సీలు కూడా స్వల్పంగా తగ్గాయి. ఇది భారత్‌తో పాటు ఆసియా ఆర్థిక వ్యవస్థను ఒత్తిడిలోకి నెట్టేసింది. ఇదిలా ఉంటే, అమెరికా అధ్యక్షుడు డొనాల్డ్ ట్రంప్ మరోసారి వాణిజ్యానికి సంబంధించి ఒక కీలక ప్రకటన చేశారు. అమెరికాలో ఫర్నిచర్ తయారు చేయని దేశాల వస్తువులపై భారీ పన్నులు విధిస్తామని హెచ్చరించారు. అమెరికా వెలుపల తీసిన ప్రతి చిత్రానికి 100% పన్ను విధిస్తామని తెలిపారు. ట్రంప్ ప్రకటన మార్కెట్‌ను మరింత ఆందోళనకు గురిచేసింది. ప్రపంచవ్యాప్తంగా అనేక వ్యాపారాలు ఇప్పుడు అమెరికా నుండి దూరం కావడం ప్రారంభమయ్యాయి. ఇది భారతదేశంపై కూడా తీవ్ర ప్రభావం చూపనుంది.

వస్తువుల ధర పెరిగే ఛాన్స్‌..

ఇటీవలి కాలంలో ట్రంప్‌ భారత్‌పై పగబట్టినట్టే వ్యవహరిస్తున్నారు. ట్రంప్ మొదట H-1B వీసా ఫీజులను పెంచారు. ఇది మన ఐటీ రంగానికి దెబ్బ. ఆ తర్వాత ఆయన భారతీయ ఔషధాలపై పన్నును ప్రకటించారు. దీంతో స్టాక్ మార్కెట్ కుప్పకూలింది. సెన్సెక్స్ వారానికి 2,000 పాయింట్లకు పైగా పడిపోయింది. అటు రూపాయి కూడా 88.7175 కు పడిపోయింది. రూపాయి మారకం పడిపోవడం ద్వారా ద్రవ్యోల్బణం పెరుగుతుంది. రూపాయి బలహీనపడినప్పుడు, దిగుమతి చేసుకున్న వస్తువులు మరింత ఖరీదుగా మారుతాయి. ఇందులో పెట్రోల్, డీజిల్, మొబైల్ ఫోన్లు, ల్యాప్‌టాప్‌లు, వంట నూనె వంటి వస్తువులపై ప్రభావం చూపుతుంది. రవాణా ఖర్చులు పెరుగుతాయి. మార్కెట్లో ఉన్న ప్రతి వస్తువు ధర పెరుగుతుంది. ప్రయాణం, సరుకు రవాణా భారమవుతుంది. భారత్‌ ప్రస్తుతం విదేశాల నుండి పెద్ద మొత్తంలో ఇంధనాన్ని దిగుమతి చేసుకుంటుంది. రూపాయి పడిపోయినప్పుడు, పెట్రోల్, డీజిల్ మరింత ఖరీదు కానున్నాయి. ఇది బస్సులు, టాక్సీలు, ట్రక్కులపై ప్రభావం చూపుతుంది. తద్వారా ప్రయాణ ఛార్జీలు పెరుగుతాయి.

విదేశీ వస్తువులపై ప్రభావం..

జౌషధాలు, స్మార్ట్‌ఫోన్‌లు, డ్రై ఫ్రూట్స్ సహా అనేక ఎలక్ట్రానిక్స్ వస్తువులు విదేశాల నుండి దిగుమతి అవుతాయి. రూపాయి బలహీనపడితే, వీటిని దిగుమతి చేసుకోవడానికి ఎక్కువ ఖర్చు పెట్టాల్సి వస్తుంది. తద్వారా సాధారణ ప్రజల కొనుగోలు శక్తి తగ్గిపోతుంది.

పెరగనున్న రుణ భారం..

రుణాలు తీసుకోవడం మరింత భారం అవుతుంది. ప్రభుత్వం, పెద్ద కంపెనీలు తరచుగా విదేశాల నుండి రుణాలు తీసుకుంటాయి. రూపాయి బలహీనపడినప్పుడు, ఆ రుణాలను తిరిగి చెల్లించడానికి ఎక్కువ ఖర్చు అవుతుంది. ఇది ప్రభుత్వ ఖర్చులు పెరిగి అధిక వడ్డీ రేట్లకు దారితీయవచ్చు. ఇది మీ గృహ రుణం, కారు రుణం, ఇతర రుణ ఈఎంఐలను ప్రభావితం చేస్తాయి.