Sathyaraj on pawan kalyan: తమిళనాడులోని మధురైలో జరిగిన ఓ మురుగన్ భక్తుల సభలో ఆంధ్రప్రదేశ్ ఉపముఖ్యమంత్రి పవన్ కళ్యాణ్ చేసిన వ్యాఖ్యలు చర్చనీయాంశంగా మారాయి. మతపరమైన అంశాలపై ఆయన చేసిన వ్యాఖ్యలు వివిధ వర్గాల్లో భిన్నాభిప్రాయాలకు దారితీశాయి.
ఈ నేపథ్యంలో, ప్రముఖ నటుడు సత్యరాజ్ పరోక్షంగా పవన్ కళ్యాణ్‌కు కౌంటర్ ఇచ్చినట్లు తెలుస్తోంది. తమిళనాడులో దేవుడి పేరుతో రాజకీయాలు చేసే ప్రయత్నాలను ప్రజలు సహించరని సత్యరాజ్ స్పష్టం చేశారు.
ఎవరూ మోసం చేయలేరు:
పెరియార్ సిద్ధాంతాలను బలంగా నమ్మే తమిళ ప్రజలను ఎవరూ మోసం చేయలేరని ఆయన వ్యాఖ్యానించారు. ఒకవేళ ఎవరైనా తమిళులను మోసం చేయాలని భావిస్తే, అది వారి అజ్ఞానమే అవుతుందని అన్నారు. తమిళ ప్రజలు అత్యంత తెలివైనవారని, వారి ముందు ఎవరి ఆటలు సాగవని సత్యరాజ్ పరోక్షంగా హెచ్చరించారు. ఈ వ్యాఖ్యలు ప్రస్తుతం సామాజిక మాధ్యమాల్లో విస్తృతంగా చర్చకు దారితీశాయి.
సత్యరాజ్ గతంలోనూ పలుమార్లు మత రాజకీయాలపై తన అభిప్రాయాలను వ్యక్తం చేశారు. ముఖ్యంగా తమిళనాడులో ద్రవిడ ఉద్యమ వారసత్వాన్ని, పెరియార్ సిద్ధాంతాలను ఆయన బలంగా సమర్థిస్తారు. మతం ఆధారంగా ప్రజలను విడదీసే ప్రయత్నాలను ఆయన వ్యతిరేకిస్తుంటారు. తాజాగా పవన్ కళ్యాణ్ వ్యాఖ్యలు ‘హిందూ ఐక్యత’పై దృష్టి సారించగా, సత్యరాజ్ కౌంటర్ తమిళనాడులో పాతుకుపోయిన ద్రవిడ భావజాలం, సెక్యులర్ విలువలను ప్రతిబింబిస్తుంది.