ఇంగ్లండ్ తో జరిగిన టీ20 మ్యాచ్ లో.. టీమిండియా ఘన విజయం సాధించింది. పూణే వేధికగా జరిగిన ఈ మ్యాచ్ లో భారత జట్టు.. 15 పరుగుల తేడాతో గెలిచింది. ఈ మ్యాచ్ లో టాస్ ఓడి తొలుత బ్యాటింగ్ చేసిన భారత్.. నిర్ణీత 20 ఓవర్లు ముగిసే సమయానికి 9 వికెట్ల నష్టానికి 181 పరుగులు చేసింది. అనంతరం 182 పరుగుల లక్ష్యంతో బరిలోకి దిగిన ఇంగ్లండ్ 19.4 ఓవర్లలో 166 పరుగులు మాత్రమే చేయగలిగింది.
ఒక దశలో ఇంగ్లండ్ కే గెలుపు అవకాశాలు కనిపించాయి. అయితే, 15వ ఓవర్ లో వరుణ్ చక్రవర్తి మ్యాజిక్ చేశాడు. 2 వికెట్లు తీసి మ్యాచ్ ని మలుపు తిప్పాడు. హరిబ్రూక్‌ 26 బంతుల్లో 51 పరుగులు చేసి వరుణ్ చక్రవర్తి బౌలింగ్‌లో అర్షదీప్‌ సింగ్ కు క్యాచ్‌ ఇచ్చి పెవిలియన్ దారి పట్టాడు. ఓపెనర్లలో బెన్ డెకెట్‌ 39 పరుగులు, ఫిల్‌ సాల్ట్ 23 పరుగులు మినహా మిగతా బ్యాటర్లు ఎవరూ నిలవలేక పోయారు. భారత బౌలర్లలో హర్షిత్ రాణా 3 వికెట్లు తీశాడు. రవి బిష్ణోయ్‌కు 3 వికెట్లు దక్కాయి. వరుణ్ చక్రవర్తి 4 ఓవర్లలో 8 పరుగులిచ్చి 2 వికెట్లు తీశాడు. అర్ష్‌దీప్‌ సింగ్‌కు 1 వికెట్ దక్కింది.
తొలుత బ్యాటింగ్ చేసిన భారత్.. సంజు శాంసన్, సూర్యకుమార్ యాదవ్, తిలక్ వర్మలు విఫలమయ్యారు. మరోవైపు జోరుగా ఆడే క్రమంలో అభిషేక్ శర్మ 29 పరుగులు చేసి పరవాలేదనిపించాడు. ఈ మ్యాచ్ లో చోటు దక్కించుకున్న రింకూ సింగ్ 26 బంతుల్లో 4 ఫోర్లు, 1 సిక్స్ బాది 30 రన్స్ సాధించాడు. శివం దూబే, హార్థిక్ పాండ్య విధ్వంసకర బ్యాటింగ్ తో భారత స్కోర్ బోర్డ్ పరుగులు పెట్టింది. టీమిండియా భారీ స్కోర్ సాధించింది.
హార్థిక్ పాండ్య 30 బాల్స్ లో 4 ఫోర్లు, 4 సిక్స్ లతో విరుచుకు పడి హాఫ్ సెంచరీ(53) సాధించాడు. శివం దూబే 34 బంతుల్లో 7 ఫోర్లు, 2 సిక్స్ లు బాది 53 రన్స్ చేశాడు. అక్షర్ పటేల్ 4 బంతుల్లో 5 పరుగులు చేశాడు. ఇంగ్లండ్ బౌలర్లలో సాకిబ్ మహమూద్ 3 వికెట్స్, బ్రైడన్ కార్సే1, జామీ ఓవర్‌టన్ 2, ఆదిల్ రషీద్1 వికెట్ పడగొట్టారు. పూణె టీ20 విజయంతో ఐదు మ్యాచ్‌ల సిరీస్‌ను 3-1 తేడాతో కైవసం చేసుకుంది.
