Hyderabad youth drug consumption trend : “పార్టీ ఉంది వస్తావా..? ఇక్కడ దొరికేది ఒక్కటే కిక్… జీవితాంతం గుర్తుండిపోతుంది!” వాట్సాప్ గ్రూపుల్లో యువతను ఊరిస్తున్న మాయ మాటలివి. నగరంలో పోలీసుల నిఘా పెరగడంతో మత్తు రాయుళ్లు కొత్త మార్గాలు వెతుకుతున్నారు. గోవా, శ్రీలంకల తర్వాత ఇప్పుడు వారి కన్ను హిమాచల్ ప్రదేశ్‌లోని ‘కసోల్’పై పడింది. ‘చలో కసోల్’ అంటూ సాగుతున్న ఈ ప్రమాదకర ప్రయాణం వెనుక ఉన్న చీకటి కోణాలేమిటి? ఏజెంట్లు విసిరే వలలో యువత ఎలా చిక్కుకుంటున్నారు..? ఈ మత్తు ఊబి నుంచి బయటపడే మార్గమే లేదా..?

హైదరాబాద్‌లో పబ్​లు, ఫామ్​హౌస్​లపై నిఘా పెరగడంతో మత్తు ప్రియులు తమ అడ్డాలను మార్చారు. విహారయాత్రల ముసుగులో హిమాచల్ ప్రదేశ్‌లోని కసోల్‌ను ప్రైవేటు పార్టీలకు చిరునామాగా మార్చేశారు. నగరంలో పోలీసులు పట్టుకుంటారనే భయంతో, మరింత కిక్ ఇస్తామంటూ ఏజెంట్లు విసిరే వలకు చిక్కి, యువత జీవితాలను నాశనం చేసుకుంటోంది.

గమ్యం కసోల్… గమనం మృత్యువు వైపు : ఒకప్పుడు గోవా పార్టీలకు కేంద్రంగా ఉండేది. అయితే, అక్కడికి వెళ్లే వారిపై పోలీసులు, నార్కోటిక్స్ బృందాల నిఘా పెరగడంతో నిర్వాహకులు రూటు మార్చారు.

కొత్త అడ్డా: ఇప్పుడు ‘చలో కసోల్’ అనేది కొత్త నినాదంగా మారింది. హిమాచల్ ప్రదేశ్‌లోని ఈ ప్రశాంత ప్రాంతం ఇప్పుడు రేవ్ పార్టీలకు, డ్రగ్స్ వినియోగానికి అడ్డాగా మారుతోందని అధికారులు గుర్తించారు.

పెరిగిన ప్రయాణాలు: హైదరాబాద్ నుంచి ప్రతి నెలా కసోల్ వెళ్తున్న వారి సంఖ్య రెట్టింపు అవుతోందని నిఘా వర్గాలు హెచ్చరిస్తున్నాయి.

నిర్వాహకుల వల: నగరంలోని పార్టీలలో పరిచయమైన వారిని లక్ష్యంగా చేసుకుని, వీకెండ్ పార్టీల పేరుతో ప్రత్యేక బృందాలుగా కసోల్‌కు తరలిస్తున్నారు. ఇటీవల పట్టుబడిన రెండు డ్రగ్స్ కేసుల్లో, కసోల్ నుంచి డ్రగ్స్ తెప్పించి నగరంలోని ప్రైవేటు పార్టీలకు సరఫరా చేస్తున్నట్లు తేలడం దీనికి నిదర్శనం.

చిక్కితే విలవిల… లెక్కలు చెబుతున్న నిజాలు : ఒక్కసారి ఈ మత్తు ప్రపంచంలోకి అడుగుపెడితే బయటపడటం దాదాపు అసాధ్యం. హైదరాబాద్ నార్కోటిక్స్ ఎన్‌ఫోర్స్‌మెంట్ బ్యూరో (హెచ్-న్యూ), టీజీ-న్యాబ్ వంటి సంస్థలు డ్రగ్స్ కేసుల్లో పట్టుబడిన సుమారు 6,000 మందికి కౌన్సెలింగ్ ఇచ్చాయి. వీరంతా 21 నుంచి 35 ఏళ్ల మధ్య వయస్కులే కావడం తీవ్ర ఆందోళన కలిగిస్తోంది. గంజాయి వంటివి సులభంగా, చవకగా దొరకడంతో ముందు సరదాగా రుచి చూసి, ఆ తర్వాత దానికి బానిసలుగా మారుతున్నారు. పరిస్థితి చేయి దాటిన తర్వాత కుటుంబ సభ్యులు గుర్తించినా, పరువు పోతుందనే భయంతో బయటకు చెప్పలేక కుమిలిపోతున్నారు.

అధికారుల హెచ్చరిక… అండగా మేమున్నామన్న భరోసా : యువత మత్తు పదార్థాలకు బానిసలు కావొద్దని, ఏ రూపంలో మాదక ద్రవ్యాలు తీసుకున్నా పట్టుబడటం ఖాయమని ఈగల్ ఎస్పీ చెన్నూరి రూపేశ్ హెచ్చరించారు. “ఏ రూపంలో మాదక ద్రవ్యాలు తీసుకున్నా దొరికిపోతారని తెలుసుకోండి. మత్తుపదార్థాలు తీసుకోవద్దు. అలవాటు పడితే మారేందుకు డీ అడిక్షన్‌ కేంద్రాలున్నాయి. డ్రగ్స్‌ నుంచి బయటపడాలన్నా, ముఠాల సమాచారం తెలియజేయాలన్నా టోల్‌ఫ్రీ నంబర్‌ 1908కు ఫిర్యాదు చేయవచ్చు.” – చెన్నూరి రూపేశ్, ఎస్పీ, ఈగల్‌. నిపుణుల సూచన ప్రకారం, ప్రాథమిక దశలోనే వ్యసనాన్ని గుర్తించి డీ-అడిక్షన్ కేంద్రాలలో చేర్పిస్తే వారిని మళ్ళీ మామూలు మనుషులను చేసే అవకాశం ఉంటుంది. తల్లిదండ్రులు తమ పిల్లల ప్రవర్తనలో మార్పులను గమనిస్తూ, వారితో స్నేహపూర్వకంగా మెలగడం ఎంతో ముఖ్యం.