గుండెపోటు వచ్చిన సమయంలో ఫస్ట్ ఎయిడ్ గా అత్యవసరంగా నిర్వహించే సీపీఆర్ (కార్డియో ఫల్మనరి రిససిటేషన్) ఎలా చేయాలో తెలిపే కమ్యూనిటీ సీపీఆర్ ట్రైనింగ్ సికింద్రాబాద్ గాంధీ మెడికల్ కాలేజీ అలుమ్మి భవనంలో ప్రారంభమైంది.
మూడు రోజుల
మూడు రోజుల పాటు జరిగే సీపీఆర్ ట్రైనింగ్ క్యాంప్ ను అలుమ్ని వ్యవస్థాపక అధ్యక్షుడు డా.రాజిరెడ్డి, కార్యదర్శి డా.చంద్రశేఖర్, గాంధీ మెడికల్ కాలేజీ ప్రిన్సిపాల్ డా.కే. ఇందిర ప్రారంభించారు. గాంధీ మెడికల్ కాలేజీ అలుమ్ని అసోసియేషన్, గ్లోబల్ అలయెన్స్, జనహిత సేవా ట్రస్ట్ ప్రతినిధులు సీపీఆర్ ట్రైనింగ్ క్యాంప్ ను ఆర్గనైజ్ చేశారు. గత నాలుగేళ్ళుగా తమ ఆధ్వర్యంలో చేస్తున్న సీపీఆర్ ట్రైనింగ్ క్యాంపులో 30,000 పైగా వివిధ రంగాల్లోని వారికి శిక్షణ ఇచ్చినట్లు తెలిపారు.
అన్ని రంగాల వారికి ట్రైనింగ్
ఇందులో డాక్టర్లు, నర్సులు, పోలీసులు, ఆటో డ్రైవర్లు, ట్రాఫిక్ సిబ్బంది, ఇంటర్, డిగ్రీ, ఇంజినీరింగ్ స్టూడెంట్లు, 108 సిబ్బంది ఉన్నారని అన్నారు. హార్ట్ ఎటాక్ వచ్చిన సమయంలో వ్యక్తికి అత్యవసరంగా గోల్డెన్ హవర్స్ గా పరిగణించే ఆ టైమ్ లో కొన్ని నిమిషాల పాటు ఛాతీ భాగంలో సీపీఆర్ చేస్తే, ప్రాణపాయం నుంచి బయట పడే అవకాశం ఉంటుందన్నారు. ఆసుపత్రికి తీసుకెళ్ళే ముందుగా సీపీఆర్ చేసిన గత సందర్భాల్లో చాలామంది ప్రాణాపాయం నుంచి తప్పించుకున్నారని వారు గుర్తు చేశారు.
ట్రైనింగ్ గంటే, అందరూ నేర్చుకోండి
సీపీఆర్ ట్రైనింగ్ ఒక గంట పాటు ఉంటుందని, ఇందులో మానవ బొమ్మపై ప్రాక్టికల్ తో పాటు థియరీ క్లాస్ నిర్వహించారు. ఉచితంగా నిర్వహించే ఈ సీపీఆర్ ట్రైనింగ్ లో ప్రతి రంగానికి చెందిన పౌరులు పాల్గొని, శిక్షణ పొందాలని వారు కోరారు. ప్రతి ఒక్కరు సీపీఆర్ నేర్చుకుంటే గుండెపోటు వచ్చిన అత్యవసర సమయంలో ఎదుటి వారి ప్రాణాలను కాపాడే వైద్యులు అవుతారని, మరోజన్మ ప్రసాదించిన దేవుళ్ళుగా అందరూ మిమ్మల్ని గుర్తుంచుకుంటారని నిర్వాహకులు చెప్పారు.
కార్యక్రమంలో గాంధీ మెడికల్ కాలేజీ అలుమ్ని అసోసియేషన్ ప్రెసిడెంట్ డా. జీఆర్ లింగమూర్తి, గ్లోబల్ అలుమ్ని ట్రస్టీ డా.రవీందర్ సురకంటి, సెక్రటరీ కొలిపాక డా.రాజశేఖర్, ఇంటర్నేషనల్ ట్రైనింగ్ సెంటర్ కో ఆర్డినేటర్ డా.మహేశ్వర్ రెడ్డి, అమెరికా హార్ట్ అసోసియేషన్ ఇంచార్జీ డా. డెనిస్ మెకాలే(చికాగో) జనహిత సేవాట్రస్ట్ నిర్వహకులు నరసింహామూర్తి, ఎన్ఎస్ఎస్ వాలంటీర్లు పాల్గొన్నారు.
