Telangana Government School Academic Calendar : ప్రభుత్వ పాఠశాలల్లో విద్యా సంవత్సరం ప్రారంభానికి ముందే అకడమిక్ గోడ క్యాలెండర్లను ఏర్పాటు చేయాలని విద్యాశాఖ నిర్ణయించింది. దీనివల్ల విద్యార్థులు, ఉపాధ్యాయులు, తల్లిదండ్రులకు సెలవులు, పరీక్షల తేదీలు, ఇతర కార్యక్రమాలపై ముందుగానే స్పష్టత లభిస్తుంది. ఇంతకీ ఈ క్యాలెండర్ రూపకల్పన వెనుక ఉన్న అసలు ఉద్దేశం ఏమిటి? దానివల్ల కలిగే ప్రయోజనాలేంటి?

ప్రభుత్వ పాఠశాలల్లో చదివే విద్యార్థులకు విద్యా సంవత్సరంలో ఎప్పుడు ఏ కార్యక్రమం ఉంటుందో తెలియని పరిస్థితి నెలకొంది. ఈ నేపథ్యంలో, 2025-26 విద్యా సంవత్సరానికి గాను రాష్ట్రంలోని అన్ని ప్రభుత్వ పాఠశాలల్లో అకడమిక్ గోడ క్యాలెండర్లను ఏర్పాటు చేయాలని పాఠశాల విద్యాశాఖ ఉత్తర్వులు జారీ చేసింది. రాష్ట్ర విద్యా పరిశోధన, శిక్షణ మండలి (SCERT) రూపొందించిన ఈ క్యాలెండర్, విద్యార్థులు మరియు ఉపాధ్యాయులకు ఒక మార్గదర్శిగా పనిచేయనుంది. ఈ క్యాలెండర్లను ప్రతి పాఠశాలతో పాటు, మండల రిసోర్స్ కేంద్రం (MRC), జిల్లా విద్యాశాఖాధికారి (DEO) కార్యాలయం, కలెక్టర్ కార్యాలయాల్లో కూడా అందుబాటులో ఉంచనున్నారు.

క్యాలెండర్‌లోని ముఖ్యాంశాలు:
సెలవుల వివరాలు: దసరా, దీపావళి, కృష్ణాష్టమి, క్రిస్మస్, సంక్రాంతి, వేసవి సెలవులతో సహా అన్ని ప్రభుత్వ సెలవుల వివరాలు స్పష్టంగా పొందుపరిచారు.
పరీక్షల షెడ్యూల్: ఫార్మేటివ్ అసెస్‌మెంట్ (FA)-1 నుండి పదో తరగతి వార్షిక పరీక్షల వరకు అన్ని పరీక్షల తేదీలను ఈ క్యాలెండర్‌లో పొందుపరిచారు. పదో తరగతి వార్షిక పరీక్షలు మార్చి 2026లో జరగనున్నాయి.

సిలబస్ పూర్తికి గడువు: 1 నుండి 10వ తరగతి వరకు సిలబస్ ఎప్పటిలోగా పూర్తి చేయాలి, పునశ్చరణ తరగతులు ఎప్పుడు నిర్వహించాలి వంటి వివరాలు ఉన్నాయి. పదో తరగతి సిలబస్‌ను జనవరి 10, 2026 నాటికి, 1 నుండి 9వ తరగతి సిలబస్‌ను ఫిబ్రవరి 28, 2026 నాటికి పూర్తి చేయాలని లక్ష్యంగా నిర్దేశించారు.

పాఠశాల పనివేళలు: ప్రాథమిక, ప్రాథమికోన్నత, ఉన్నత పాఠశాలల పనివేళలను క్యాలెండర్‌లో స్పష్టంగా పేర్కొన్నారు.

నెలవారీ కార్యక్రమాలు: ప్రతి నెలలో నిర్వహించే కార్యక్రమాలు, సముదాయ సమావేశాలు, పాఠశాల స్థాయిలో జరిగే క్రీడాపోటీలు, సైన్స్ ఎగ్జిబిషన్లు, సెమినార్లు, ఇన్‌స్పైర్ అవార్డుల వివరాలు పొందుపరిచారు.

పనిదినాలు మరియు సమావేశాలు: జూన్ నుండి ఏప్రిల్ వరకు ప్రతి నెలా పాఠశాల పనిదినాల సంఖ్య, తల్లిదండ్రుల-ఉపాధ్యాయుల సమావేశాల (PTM) తేదీలు ఇందులో ఉంటాయి.
సహ-పాఠ్య కార్యకలాపాలు: ఆరోగ్యం, కంప్యూటర్, కళలు, సంస్కృతి, జీవన నైపుణ్యాలు, విలువలకు సంబంధించి వారంలో ఎన్ని పీరియడ్లు కేటాయించాలో వివరంగా పొందుపరిచారు. మెదక్ జిల్లాలో 874 పాఠశాలలకు 896 క్యాలెండర్లను పంపిణీ చేస్తున్నట్లు జిల్లా విద్యాశాఖాధికారి రాధాకిషన్ తెలిపారు. ఈ క్యాలెండర్ విద్యార్థులు, ఉపాధ్యాయులు, మరియు తల్లిదండ్రులకు ఎంతగానో ఉపయోగపడుతుందని ఆయన ఆశాభావం వ్యక్తం చేశారు.

అంతర్జాతీయ ప్రమాణాలతో యంగ్ ఇండియా స్కూల్స్: రాష్ట్రంలో పేద విద్యార్థులకు ఉన్నతమైన విద్యను అందించాలనే లక్ష్యంతో, అంతర్జాతీయ ప్రమాణాలతో యంగ్ ఇండియా రెసిడెన్షియల్ స్కూళ్లను నిర్మిస్తున్నారు. రాష్ట్రవ్యాప్తంగా 1023 రెసిడెన్షియల్ పాఠశాలలు ఉండగా, వాటిలో 650 పాఠశాలలకు సొంత భవనాలు లేవు.ఈ నేపథ్యంలో, ప్రతి శాసనసభ నియోజకవర్గానికి ఒకటి చొప్పున ఇంటిగ్రేటెడ్ రెసిడెన్షియల్ పాఠశాలను నిర్మించాలని ప్రభుత్వం నిర్ణయించింది. ఒక్కో పాఠశాల నిర్మాణానికి రూ. 25 కోట్లు ఖర్చు చేయనున్నారు. అలాగే, రూ. 5 వేల కోట్లతో రాష్ట్రవ్యాప్తంగా 120 గురుకుల పాఠశాలలను నిర్మించాలని ప్రభుత్వం భావిస్తోంది