Telangana BC Reservation Politics : స్థానిక సంస్థల ఎన్నికలు సమీపిస్తున్న వేళ తెలంగాణ రాజకీయాలు ఒక్కసారిగా బీసీ రిజర్వేషన్ల చుట్టూ కేంద్రీకృతమయ్యాయి. బీసీలకు 42 శాతం రిజర్వేషన్లు కల్పిస్తామన్న రాష్ట్ర ప్రభుత్వ నిర్ణయాన్ని ఒకవైపు స్వాగతిస్తూనే, అందులో ముస్లింలకు 10 శాతం ఉప-కోటా (sub-quota) కేటాయించడంపై భారతీయ జనతా పార్టీ తీవ్ర అభ్యంతరం వ్యక్తం చేస్తోంది. ఇది బీసీల నోట్లో మట్టి కొట్టడమేనని, కాంగ్రెస్ పార్టీ ఓటు బ్యాంకు రాజకీయాలకు పాల్పడుతోందని తెలంగాణ బీజేపీ అధ్యక్షుడు ఎన్. రామచందర్ రావు తీవ్రస్థాయిలో ధ్వజమెత్తారు. అసలు బీసీల రిజర్వేషన్ల అమలుపై ప్రభుత్వానికి చిత్తశుద్ధి ఉందా..? ఈ రాజకీయ చదరంగంలో బీసీల ప్రయోజనాలు బలికానున్నాయా…? అన్న ప్రశ్నలు ఇప్పుడు సర్వత్రా ఉత్కంఠ రేపుతున్నాయి.

ప్రభుత్వ నిర్ణయం, బీజేపీ అభ్యంతరం: ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వం, రాబోయే స్థానిక సంస్థల ఎన్నికల్లో బీసీలకు 42 శాతం రిజర్వేషన్లు కల్పించాలని జూలై 2025లో మంత్రిమండలి సమావేశంలో నిర్ణయించింది. ఇది తాము ఎన్నికల సమయంలో ఇచ్చిన కీలక హామీ అని, బీసీ కమిషన్ సమర్పించిన శాస్త్రీయ సమాచారం, కుల గణన ఆధారంగానే ఈ నిర్ణయం తీసుకున్నామని ప్రభుత్వం చెబుతోంది. అయితే, ఈ 42 శాతంలోనే 10 శాతం ముస్లింలకు కేటాయించాలని ప్రభుత్వం భావిస్తున్నట్లు వార్తలు వెలువడటంతో వివాదం మొదలైంది. దీనిపై బీజేపీ రాష్ట్ర అధ్యక్షుడు రామచందర్ రావు తీవ్రంగా స్పందించారు. 42 శాతం రిజర్వేషన్లు పూర్తిగా బీసీలకే చెందాలని, అందులో ఏ ఇతర వర్గాలకు వాటా ఇచ్చినా ఊరుకునేది లేదని ఆయన స్పష్టం చేశారు. మత ప్రాతిపదికన రిజర్వేషన్లు సుప్రీంకోర్టు తీర్పులకు, రాజ్యాంగ స్ఫూర్తికి విరుద్ధమని ఆయన గుర్తుచేశారు.

కాంగ్రెస్‌పై బీజేపీ విమర్శనాస్త్రాలు: బీసీ రిజర్వేషన్ల అంశాన్ని కాంగ్రెస్ ప్రభుత్వం ఒక రాజకీయ నాటకంగా మార్చిందని బీజేపీ ఆరోపిస్తోంది. రాష్ట్రంలో చేయాల్సిన పనులు మానేసి, ఢిల్లీలో ధర్నాలు చేస్తూ ప్రజల దృష్టిని మళ్లించే ప్రయత్నం చేస్తున్నారని రామచందర్ రావు విమర్శించారు.  కాంగ్రెస్ పార్టీకి నిజంగా బీసీలపై ప్రేమ ఉంటే, ముస్లింలకు ప్రతిపాదించిన 10 శాతం కోటాను రద్దు చేసి, మొత్తం 42 శాతం బీసీలకే కేటాయించాలని సవాల్ విసిరారు. కేంద్ర మంత్రి జి. కిషన్ రెడ్డి సైతం ఈ వాదనకు బలం చేకూర్చారు. 42 శాతంలో 10 శాతం ముస్లింలకు ఇస్తే, బీసీలకు మిగిలేది 32 శాతమేనని, ఇది గతంలో ఉన్న 34 శాతం కంటే కూడా 2 శాతం తక్కువని ఆయన ఆందోళన వ్యక్తం చేశారు.

రంగంలోకి ఇతర పార్టీలు.. బీఆర్ఎస్ వాదన: ఈ రిజర్వేషన్ల రగడలో బీఆర్ఎస్ పార్టీ కూడా గళం విప్పింది. బీఆర్ఎస్ ఎమ్మెల్సీ కవిత బీసీలకు 42 శాతం రిజర్వేషన్లు అమలు చేయాలని డిమాండ్ చేస్తూ 72 గంటల నిరాహార దీక్షకు దిగారు. అయితే, ఆమె ఒక కొత్త వాదనను తెరపైకి తెచ్చారు. బీసీలకు ఇస్తామన్న 42 శాతం కోటాను యథాతథంగా వారికే ఇచ్చి, ముస్లింలకు ప్రత్యేకంగా 10 శాతం రిజర్వేషన్లు కల్పించేందుకు పార్లమెంటులో బిల్లు పెట్టాలని ఆమె డిమాండ్ చేశారు. దీనిద్వారా కాంగ్రెస్, బీజేపీలు చేస్తున్న రాజకీయాలకు అడ్డుకట్ట వేయాలని ఆమె సూచించారు.

 దిల్లీ వేదికగా రాజకీయాలు: రాష్ట్ర ప్రభుత్వం రిజర్వేషన్ల అమలులో విఫలమై, నెపాన్ని కేంద్రంపైకి నెట్టేందుకే ఢిల్లీలో నిరసనలకు దిగుతోందని బీజేపీ ఆరోపిస్తోంది. అయితే, రాష్ట్ర అసెంబ్లీ ఆమోదించిన బిల్లులకు కేంద్రం ఆమోదం తెలపాల్సిన అవసరం ఉందని కాంగ్రెస్, బీఆర్ఎస్ వాదిస్తున్నాయి. ఈ క్రమంలోనే బీజేపీ OBC మోర్చా ఆధ్వర్యంలో హైదరాబాద్‌లోని ఇందిరా పార్క్ వద్ద “మహాధర్నా” నిర్వహించి, కాంగ్రెస్ ప్రభుత్వంపై ఒత్తిడి పెంచే ప్రయత్నం చేసింది.