Impact of cell phones on children : పనిలో ఉన్నామని, మారాం చేస్తున్నాడని పిల్లల చేతిలో పెడుతున్న సెల్‌ఫోన్, వారి భవిష్యత్తుకు ఉరితాడుగా మారుతోంది. ఆన్‌లైన్ గేమ్స్ కోసం నిజామాబాద్‌లో ఓ బాలుడు ఆత్మహత్య చేసుకుంటే, క్రైమ్ సిరీస్‌ల స్ఫూర్తితో హైదరాబాద్‌లో మరో మైనర్ కిరాతకంగా హత్య చేశాడు. ఈ రెండు ఘటనలూ మన సమాజానికి ప్రమాదఘంటికలు మోగిస్తున్నాయి. పిల్లలను కుదురుగా ఉంచేందుకు తల్లిదండ్రులు వాడుతున్న ఈ ‘తారక మంత్రం’, వారిని ఎందుకు చెరసాలలకు, కొన్నిసార్లు స్మశానాలకు పంపిస్తోంది..?

ఒకప్పుడు ఆటపాటలతో గడిపే బాల్యం, నేడు నాలుగు అంగుళాల తెరలో బందీ అయిపోయింది. సరదాగా మొదలైన ఈ అలవాటు, చిన్నారులను ఎంతటి ప్రమాదకరమైన ఉన్మాదులుగా మారుస్తోందో చెప్పడానికి ఇటీవల జరిగిన ఘటనలే సజీవ సాక్ష్యాలు. 

సరదా నుంచి వ్యసనం.. వ్యసనం నుంచి నేరం : తల్లిదండ్రులు తమ పనుల్లో నిమగ్నమై, పిల్లలు అల్లరి చేయకుండా ఉండేందుకు సులభమైన మార్గంగా సెల్‌ఫోన్‌ను అందిస్తున్నారు.

తొలి దశ: మొదట కార్టూన్లు, వీడియోలతో ప్రారంభమై, క్రమంగా ఆన్‌లైన్ గేమ్‌ల వైపు ఆసక్తి మళ్లుతుంది.

మలి దశ: ఆన్‌లైన్ గేమ్‌లలోని హింస, పోటీతత్వం వారిలో తెలియని ఆవేశాన్ని, దూకుడును పెంచుతాయి. గెలుపు కోసం ఎంతకైనా తెగించే ಮನస్తత్వం అలవడుతుంది.

అంతిమ దశ: యూట్యూబ్, ఓటీటీలలోని క్రైమ్ సిరీస్‌లు, నేరపూరిత చిత్రాలు వారిని తీవ్రంగా ప్రభావితం చేస్తాయి. నేరం చేయడం, సాక్ష్యాలను మాయం చేయడం వంటివి చూసి, వాటిని నిజజీవితంలో అనుకరించడానికి వెనుకాడటం లేదు. విలాసవంతమైన జీవితం కోసం దొంగతనాలు, హత్యలకు కూడా పాల్పడుతున్నారు.

‘అసర్‌- 2024’ నివేదిక చెబుతున్న నిజాలు : ‘యాన్యువల్ స్టేటస్ ఆఫ్ ఎడ్యుకేషన్ రిపోర్ట్ (అసర్‌) – 2024’ మన కళ్లు తెరిపించే చేదు నిజాలను బయటపెట్టింది. 14 నుంచి 16 ఏళ్లలోపు పిల్లల్లో 90% మందికి సొంతంగా సెల్‌ఫోన్లు ఉన్నాయి. వీరిలో కేవలం 57% మంది మాత్రమే చదువు కోసం ఫోన్‌ను ఉపయోగిస్తున్నారు. టీనేజర్లలో 76% మంది కేవలం సోషల్ మీడియా కోసమే సెల్‌ఫోన్లు వాడుతున్నారు. ఈ గణాంకాలు సమస్య తీవ్రతకు అద్దం పడుతున్నాయి.

తల్లిదండ్రుల బాధ్యత.. నిపుణుల సూచనలు : ఈ ప్రమాదకరమైన ఊబి నుంచి పిల్లలను కాపాడటంలో తల్లిదండ్రులదే కీలక పాత్ర అని మానసిక నిపుణులు స్పష్టం చేస్తున్నారు.

పర్యవేక్షణ: పిల్లల చేతికి ఫోన్ ఇచ్చి వదిలేయకుండా, వారు ఏం చూస్తున్నారు, ఎవరితో మాట్లాడుతున్నారనే దానిపై ఓ కన్నేసి ఉంచాలి.

అవగాహన: సెల్‌ఫోన్లు, సోషల్ మీడియా వల్ల కలిగే అనర్థాల గురించి స్నేహపూర్వకంగా, తరచూ వారికి వివరిస్తూ ఉండాలి.

నియంత్రణ: ఫోన్‌లోని సెట్టింగ్స్‌లో ‘పేరెంటల్ కంట్రోల్స్’ ఉపయోగించి, హింసాత్మక కంటెంట్ రాకుండా నిరోధించాలి. విద్యా సంబంధిత, వినోదాత్మక అంశాలనే చూసేలా ప్రోత్సహించాలి.

సమయం కేటాయించడం: బడి నుంచి రాగానే దగ్గరుండి హోమ్‌వర్క్ చేయించాలి. వారితో కలిసి ఆటలాడటం, కబుర్లు చెప్పడం వంటివి చేయాలి.

ఆదర్శంగా ఉండటం: పిల్లల ముందు పెద్దలు అనవసరంగా, ఎక్కువసేపు సెల్‌ఫోన్లు వాడకూడదు. వారు మిమ్మల్నే ఆదర్శంగా తీసుకుంటారు.

ముందే పసిగట్టడం: మీ పిల్లల ప్రవర్తనలో మార్పు గమనించినా, వారు హింసాత్మక కంటెంట్ చూస్తున్నారని అనుమానం వచ్చినా, మొదట్లోనే మందలించి, అవసరమైతే కౌన్సెలింగ్ ఇప్పించాలి. పిల్లలను గారాబం చేయడం తప్పు కాదు, కానీ ఆ గారాబం వారి భవిష్యత్తును అంధకారం చేసేలా ఉండకూడదు. నేటి మన నిర్లక్ష్యమే, రేపటి వారి పతనానికి పునాది కాకూడదు