Dating app investment fraud Hyderabad : కాలం మారింది, టెక్నాలజీతో పాటు సంబంధాల నిర్వచనం కూడా. ఒకప్పుడు పరిచయాలు పెంచుకోవడానికి స్నేహితులు, బంధువులే ఆధారం. కానీ ఇప్పుడు డేటింగ్ యాప్‌లు యువతకు కొత్త వేదికగా మారాయి. కొత్త వ్యక్తులతో పరిచయాలు, స్నేహాలు, ప్రేమలు.. అన్నీ ఈ వేదికపైనే. అయితే, ఇదే అదునుగా సైబర్ నేరగాళ్లు తమ పంథాను మార్చుకున్నారు. “అమ్మాయి అందంగా ఉంది.. నాతో ఇష్టంగా మాట్లాడుతోంది” అని పొరబడిన అమాయక యువతను మాయమాటలతో బుట్టలో వేసుకుని, లక్షలు, కోట్లు కొల్లగొడుతున్నారు. అమ్మాయిల ఫొటోలతో ప్రొఫైళ్లు తయారు చేసి, పెట్టుబడుల పేరిట, వ్యక్తిగత సమావేశాల పేరిట కోట్లు కాజేస్తున్న ఈ కేటుగాళ్ల ఉచ్చులో ఎలా చిక్కుకుంటున్నారు? ఈ మాయలో చిక్కుకున్న బాధితుల కథలేంటి? ఈ మోసాల నుంచి ఎలా బయటపడాలి?

డేటింగ్ యాప్‌లు – సులభమైన పరిచయాల వేదిక: నేటి ఆధునిక కాలంలో డేటింగ్ యాప్‌లు చాలా సాధారణమైపోయాయి. పరిచయాలు పెంచుకోవడానికి, స్నేహితులను కలుసుకోవడానికి, అవసరమైతే జీవిత భాగస్వామిని ఎంపిక చేసుకోవడానికి యువత వీటిని విరివిగా ఉపయోగిస్తోంది. అయితే, ఇదే అవకాశంగా సైబర్ నేరగాళ్లు తమ మోసాలకు కొత్త మార్గాలను అన్వేషిస్తున్నారు. అమాయకులను ఆకర్షించేందుకు అందమైన యువతుల ఫొటోలను ప్రొఫైల్ చిత్రాలుగా వాడుకుంటూ, లక్షల్లో డబ్బు వసూలు చేస్తున్నారు.

నగరంలో వెలుగుచూసిన మోసాలు – బాధితుల కథలు: హైదరాబాద్‌లో ఈ తరహా మోసాలు రోజురోజుకు పెరుగుతున్నాయి. 291 కేసులు ఈ ఏడాది సెప్టెంబరు వరకు  నమోదయ్యాయని గణాంకాలు చెబుతున్నాయి. కొన్ని ఉదాహరణలు..

మలక్‌పేట యువకుడి ఉదంతం: మలక్‌పేటకు చెందిన ఓ యువకుడు వాట్సాప్‌లో వచ్చిన ఓ లింకుపై క్లిక్ చేయడంతో డేటింగ్ వెబ్‌సైట్‌లోకి వెళ్ళాడు. సహజీవనం చేసే అమ్మాయి కోసం వెతుకుతూ తన ఫోన్ నంబరు ఎంటర్ చేశాడు. ఆ తర్వాత ఒక యువతి వాట్సాప్ కాల్ చేసి, మరికొందరు యువతులు ఉన్నారని నమ్మబలికింది. రిజిస్ట్రేషన్, మీటింగ్, హోటల్ బుకింగ్, సర్వీసు ట్యాక్స్ వంటి ప్రైవసీ పేరుతో ఏకంగా రూ.6.49 లక్షలు వసూలు చేసింది. చివరకు మోసపోయానని గ్రహించి సైబర్ క్రైమ్ పోలీసులను ఆశ్రయించాడు.

బేగంపేట వ్యక్తిని మోసగించిన చాందిని చౌదరి: బేగంపేటకు చెందిన 48 ఏళ్ల వ్యక్తికి డేటింగ్ యాప్‌లో ‘చాందిని చౌదరి’ పేరుతో ఒక యువతి పరిచయమైంది. ఫోన్ నంబరు తీసుకుని వాట్సాప్‌లో చాటింగ్ మొదలుపెట్టింది. తనకు ట్రేడింగ్‌లో మంచి అనుభవం ఉందని నమ్మబలికి, ఆకర్షణీయమైన మాటలతో అతన్ని బుట్టలో వేసుకుని రూ.13.3 లక్షలు పెట్టుబడి పెట్టించింది. డబ్బు విత్ డ్రాకు అవకాశం ఇవ్వకపోవడంతో తాను మోసపోయినట్లు బాధితుడు గ్రహించాడు.

సైబర్ నేరగాళ్ల కొత్త పంథా – పెట్టుబడులు, వ్యక్తిగత సమావేశాల పేరిట దోపిడీ: గతంలో నకిలీ కాల్ సెంటర్లు, నకిలీ ఉద్యోగాలు, ఆన్‌లైన్ ట్రేడింగ్ వంటి పేర్లతో మోసాలు చేసిన ముఠాలు ఇప్పుడు డేటింగ్ యాప్‌లు, వెబ్‌సైట్‌లను వేదికగా చేసుకుని మోసాలకు పాల్పడుతున్నాయి.

అందమైన యువతుల ఫొటోలు: పాకిస్థాన్‌కు చెందిన మోడల్ ఫొటోలతో నగర యువకులను మోసం చేసిన సంఘటనలు కూడా వెలుగులోకి వచ్చాయి.
క్రమబద్ధమైన మోసం: ముందుగా చాటింగ్, వ్యక్తిగత విషయాలు పంచుకోవడం, ఆ తర్వాత నేరుగా కలిసేందుకు రిజిస్ట్రేషన్ ఛార్జీలు, ప్రైవేట్ మీటింగ్ పేర్లు, అడ్వాన్సులు, సభ్యత్వం వంటివి అడుగుతూ డబ్బు వసూలు చేస్తున్నారు.

నమ్మకం, గోప్యత అడ్డం: డేటింగ్ యాప్‌లను ఉపయోగించే వారు మోసపోయినా, ఇతరులకు చెప్పలేకపోవడం వల్ల ఇలాంటి మోసాలు బయటకు రావడం ఆలస్యమవుతోంది. విద్యార్థులు, ఐటీ ఉద్యోగులు ఎక్కువగా ఈ ఉచ్చులో చిక్కుకుంటున్నారు.

జాగ్రత్తలు – మోసాల నుంచి బయటపడే మార్గాలు: సైబర్ నేరగాళ్ల ఉచ్చులో పడకుండా ఉండాలంటే కొన్ని జాగ్రత్తలు పాటించడం తప్పనిసరి:
అపరిచితుల పట్ల అప్రమత్తత: వాట్సాప్, టెలిగ్రామ్, సామాజిక మాధ్యమాల్లో కొత్త వ్యక్తులు స్నేహం, ప్రేమ, పెళ్లి పేరుతో సంభాషణ మొదలుపెడితే అప్రమత్తంగా ఉండాలి.
డబ్బు అడిగితే మోసమే: పరిచయం పెరగ్గానే డబ్బు అడిగినా, వ్యక్తిగత ఫొటోలు పంపమని కోరినా అది కచ్చితంగా మోసమని గుర్తించాలి.
ఫొటోల వెరిఫికేషన్: అవతలి వ్యక్తులు పంపించే ఫొటోలను గూగుల్ ఇమేజెస్ (Google Images) లో అప్‌లోడ్ చేసి సెర్చ్ చేస్తే, ఆ చిత్రాలు ఇతర అకౌంట్లలో ఉన్నాయో లేదో తెలుసుకోవచ్చు.
రిజిస్ట్రేషన్ ఛార్జీల పట్ల జాగ్రత్త: డేటింగ్ పేరిట సహజీవనం, అమ్మాయిలతో మాట్లాడేందుకు రిజిస్ట్రేషన్ ఛార్జీలు, అడ్వాన్సులు, సభ్యత్వం అడిగితే అది కచ్చితంగా సైబర్ నేరగాళ్ల పనే. అధీకృత డేటింగ్ యాప్‌ల్లో ఇలాంటి అడ్డగోలు రుసుములు ఉండవు.
నేరుగా కలిసే ప్రయత్నం: డేటింగ్‌లో పరిచయమైన వ్యక్తులతో తదుపరి ముందుకెళ్లాలనుకుంటే, సురక్షితమైన ప్రదేశంలో నేరుగా కలవడానికి ప్రయత్నించాలి.
వెంటనే ఫిర్యాదు చేయండి: ఒకవేళ మోసపోయినట్లు గుర్తిస్తే, ఆలస్యం చేయకుండా 1930 టోల్‌ఫ్రీ నంబరుకు లేదా స్థానిక పోలీసుస్టేషన్‌లో వెంటనే ఫిర్యాదు చేయాలి.