Drunk driving deaths among youth in Telangana : ఇటీవల కర్నూలు సమీపంలో జరిగిన బస్సు దగ్ధం ఘటనలో పదుల సంఖ్యలో ప్రాణాలు గాల్లో కలిసిపోవడానికి కారణం ఒక యువకుడి మద్యం మత్తే అని తేలడం రాష్ట్రవ్యాప్తంగా తీవ్ర దిగ్భ్రాంతికి గురిచేసింది. ఇది ఒకే ఒక్క సంఘటన కాదు, నిత్యం రోడ్లపై జరుగుతున్న అనేక ప్రమాదాలకు మద్యం భూతమే ప్రధాన కారణంగా నిలుస్తోంది. ముఖ్యంగా, మద్యం సేవించి వాహనాలు నడుపుతున్న వారిలో యువతే అధికంగా ఉండటం ఆందోళన కలిగిస్తోంది. పోలీసుల డ్రంకెన్ డ్రైవ్ తనిఖీలు, కేసులు పెడుతున్నా యువతలో మార్పు రావడం లేదు. అసలు ఈ ప్రమాదాల వెనుక ఉన్న కారణాలేంటి? గణాంకాలు ఏం చెబుతున్నాయి? దీనికి పరిష్కారం లేదా?

స్పృహ లేని డ్రైవింగ్.. అమాయకుల ఉసురు తీస్తున్న యవ్వనం : మద్యం మత్తు కేవలం వారి ఆరోగ్యాన్ని మాత్రమే కాదు, రోడ్డుపై ప్రయాణించే అమాయకుల ప్రాణాలను సైతం బలి తీసుకుంటోంది. పీకలదాకా మద్యం సేవించి, కనీసం ఒంటి మీద స్పృహ లేకుండా వాహనాలు నడపడం యమపాశంగా మారుతోంది. దీనికి అతివేగం కూడా తోడవడంతో రోడ్లు రక్తసిక్తమవుతున్నాయి. ఉమ్మడి ఖమ్మం జిల్లా గణాంకాలు ఈ చేదు నిజాన్ని కళ్లకు కడుతున్నాయి. జిల్లా కేంద్రమైన కొత్తగూడెంలో ఓ ఆర్టీసీ డ్రైవర్ అతివేగంగా, నిర్లక్ష్యంగా బస్సు నడపడంతో ఓ మహిళ నిలువునా ప్రాణాలు కోల్పోయిన విషాదం మరువక ముందే ఇలాంటి ఘటనలు పునరావృతం కావడం ప్రజలను భయభ్రాంతులకు గురిచేస్తోంది.

గణాంకాలు చెబుతున్న భయంకర నిజాలు : పోలీసులు రాష్ట్రవ్యాప్తంగా డ్రంకెన్ డ్రైవ్ తనిఖీలు ముమ్మరంగా నిర్వహిస్తున్నప్పటికీ, మందుబాబుల ఆగడాలకు మాత్రం అడ్డుకట్ట పడటం లేదు. ఉమ్మడి ఖమ్మం జిల్లా పరిధిలో ఈ ఏడాది అక్టోబర్ 31 వరకు నమోదైన కేసుల సంఖ్య పరిస్థితి తీవ్రతను తెలియజేస్తోంది.

కొత్తగూడెం: 5,686 కేసులు
పాల్వంచ: 3,289 కేసులు
భద్రాచలం: 1,961 కేసులు
ఇల్లెందు: 1,436 కేసులు
మణుగూరు: 1,404 కేసులు

ఈ లెక్కలు కేవలం పోలీసుల తనిఖీల్లో పట్టుబడిన వారివి మాత్రమే. వీరిలో అత్యధికులు యువతే కావడం గమనార్హం. పట్టుబడని వారు, శివారు ప్రాంతాల్లో రాత్రి వేళల్లో విన్యాసాలు చేసే వారి సంఖ్య ఇంకా ఎక్కువే ఉంటుందని స్థానికులు ఆరోపిస్తున్నారు.

విన్యాసాల జోరు.. ప్రజల్లో హడల్ : పట్టణ శివారు ప్రాంతాలు, నిర్మానుష్యంగా ఉండే రోడ్లు యువతకు అడ్డాలుగా మారుతున్నాయి. స్నేహితులతో పందాలు కాస్తూ, ఖరీదైన బైక్‌లపై అర్ధరాత్రి వేళల్లో చేసే విన్యాసాలు స్థానిక ప్రజలను కంటి మీద కునుకు లేకుండా చేస్తున్నాయి. పోలీసులు పెట్రోలింగ్ నిర్వహిస్తున్నప్పటికీ, వారి కళ్లుగప్పి ఈ ఆగడాలు కొనసాగుతూనే ఉన్నాయి. ప్రధాన రహదారులపై కూడా ఇదే దూకుడు ప్రదర్శిస్తూ, తమ ప్రాణాలకే కాకుండా ఇతరుల ప్రాణాలకు కూడా ముప్పుగా పరిణమిస్తున్నారు.

తల్లిదండ్రుల బాధ్యత.. కఠినంగా వ్యవహరించాల్సిన పోలీసులు : రోడ్డు ప్రమాదాలను నివారించడం కేవలం పోలీసుల బాధ్యత మాత్రమే కాదు, ప్రతి పౌరుడిపై, ముఖ్యంగా తల్లిదండ్రులపై ఉంది. ఇంటి నుంచి బయటకు వెళ్లిన పిల్లలు ఏం చేస్తున్నారు, ఎవరితో తిరుగుతున్నారు అనే విషయాలపై ఓ కన్నేసి ఉంచాల్సిన ఆవశ్యకత ఎంతైనా ఉందని పోలీసులు సూచిస్తున్నారు. మరోవైపు, కేవలం తనిఖీలు చేసి కేసులు నమోదు చేయడమే కాకుండా, రహదారులపై చక్కర్లు కొట్టే అసలైన బాధ్యతారహిత మందుబాబులపై దృష్టి సారించి, కఠిన చర్యలు తీసుకోవాలని ప్రజలు కోరుతున్నారు. చట్టంలోని లొసుగులను అడ్డుపెట్టుకుని బయటకు రాకుండా, కఠిన శిక్షలు పడేలా చర్యలు తీసుకుంటేనే యువతలో భయం వస్తుందనే అభిప్రాయాలు వ్యక్తమవుతున్నాయి.