Cyclone Montha crop damage : రెక్కల కష్టాన్ని పంటగా పండించి, దాన్ని అమ్ముకుందామని ఆశగా మార్కెట్‌కు వచ్చిన అన్నదాతకు ప్రకృతి కన్నీటిని మిగిల్చింది. తేమ పేరుతో అధికారులు తూకం వేయడంలో చూపిన తాత్సారం, అంతలోనే విరుచుకుపడిన ‘మొంథా’ తుపాను ప్రళయానికి ఆమె కష్టం కాలువ పాలైంది. కళ్లెదుటే ధాన్యం రాశులు వరద నీటిలో కొట్టుకుపోతుంటే, ఆ మహిళా రైతు గుండెలవిసేలా రోదిస్తూ, నీటిలోంచి ఒడిసిపట్టిన దృశ్యం ప్రతి ఒక్కరినీ కంటతడి పెట్టించింది. అసలు సిద్దిపేట జిల్లా హుస్నాబాద్ మార్కెట్‌లో ఏం జరిగింది? ఆ ఒక్క రైతుకే కాదు, రాష్ట్రవ్యాప్తంగా రైతన్నను ఈ తుపాను ఎంతలా ఆగం చేసింది..?

తేమ పేరుతో తాత్సారం.. వరద రూపంలో ప్రళయం : సిద్దిపేట జిల్లా హుస్నాబాద్ మండలం పోతారం ఎస్ గ్రామానికి చెందిన కేడిక తారమ్మ తనకున్న ఐదెకరాల్లో పండించిన వరి ధాన్యాన్ని అమ్ముకోవడానికి హుస్నాబాద్ వ్యవసాయ మార్కెట్‌కు తీసుకొచ్చారు. షెడ్డు కింద ధాన్యం ఆరబోసి మూడు రోజులుగా పడిగాపులు కాస్తున్నారు. అధికారులు వచ్చి పరిశీలించి, ధాన్యంలో తేమ 18 శాతం ఉందని, అది 17 శాతానికి తగ్గాక తూకం వేస్తామని చెప్పారు. ఆకాశం మేఘావృతమై ఉండటంతో, వర్షం వచ్చేలా ఉందని, దయచేసి త్వరగా తూకం వేయాలని ఆమె ప్రాధేయపడినా వారు ససేమిరా అన్నారు.

ఆమె భయపడినట్టే జరిగింది. బుధవారం ఎడతెరపి లేకుండా కురిసిన కుండపోత వర్షానికి మార్కెట్ యార్డు మొత్తం జలమయమైంది. వరద నీరు పోటెత్తడంతో, షెడ్డు కింద ఉన్న ఆమె ధాన్యం రాశుల్లోంచి 80 శాతానికి పైగా పక్కనే ఉన్న కాలువలోకి కొట్టుకుపోయింది. తన రెక్కల కష్టం నీటిలో కలిసిపోతుంటే తట్టుకోలేక, రోదిస్తూనే ఆ ధాన్యాన్ని ఒడిసిపట్టి, కాస్తయినా దక్కించుకోవాలని ఆమె చేసిన ప్రయత్నం అక్కడున్న వారిని కదిలించింది. 20 రోజుల క్రితమే తన అల్లుడు చనిపోయిన దుఃఖంలో ఉండగానే, ఈ పంట నష్టం తనను మరింత కుంగదీసిందని ఆమె ఆవేదన వ్యక్తం చేశారు. మార్కెట్‌ను పరిశీలించడానికి వచ్చిన సిద్దిపేట కలెక్టర్ హైమావతి కాళ్లపై పడి తనను ఆదుకోవాలని వేడుకోవడం పరిస్థితి తీవ్రతకు అద్దం పడుతోంది. ఒక్క తారమ్మదే కాదు, ఆ మార్కెట్‌లో సుమారు 1,500 క్వింటాళ్ల ధాన్యం వరద పాలైందని అధికారులు ప్రాథమికంగా అంచనా వేశారు.

తారవ్వకు అండగా కేంద్రం.. ప్రభుత్వానికి రైతుల విజ్ఞప్తి : మహిళా రైతు తారవ్వ (తారమ్మ) దీనస్థితి గురించి తెలుసుకున్న కేంద్ర హోంశాఖ సహాయ మంత్రి బండి సంజయ్ కుమార్ వెంటనే స్పందించారు. దిల్లీ నుంచి ఆమెకు ఫోన్ చేసి, పంట నష్టం వివరాలు అడిగి తెలుసుకున్నారు. తక్షణ సహాయంగా రూ.50 వేలు పంపిస్తున్నానని, ధైర్యంగా ఉండాలని, అన్ని విధాలా ఆదుకుంటామని భరోసా ఇచ్చారు. మరోవైపు, రాష్ట్రవ్యాప్తంగా నష్టపోయిన రైతులు, తడిసిన, రంగు మారిన ధాన్యాన్ని ప్రభుత్వం ఎలాంటి షరతులు లేకుండా కొనుగోలు చేసి తమను ఆదుకోవాలని విజ్ఞప్తి చేస్తున్నారు.

రాష్ట్రవ్యాప్తంగా ఇదే రోదన: లక్షల ఎకరాల్లో పంట నష్టం : ‘మొంథా’ తుపాను ప్రభావం కేవలం ఒక్క జిల్లాకే పరిమితం కాలేదు. రాష్ట్రవ్యాప్తంగా 12 జిల్లాల్లోని 179 మండలాల్లో విధ్వంసం సృష్టించింది. వ్యవసాయ శాఖ ప్రాథమిక అంచనాల ప్రకారం:
మొత్తం నష్టం: 2,53,033 మంది రైతులకు చెందిన 4,47,864 ఎకరాల్లో పంటలు దెబ్బతిన్నాయి.
వరి నష్టం: అత్యధికంగా 2,82,379 ఎకరాల్లో వరి పంట నీట మునిగింది.
పత్తి నష్టం: 1,51,707 ఎకరాల్లో పత్తి పంటకు నష్టం వాటిల్లింది.
అత్యధికంగా దెబ్బతిన్న జిల్లా: వరంగల్‌లో 1,30,200 ఎకరాల్లో నష్టం వాటిల్లింది. ఆ తర్వాత ఖమ్మం (62,400 ఎకరాలు), సూర్యాపేట (56,330 ఎకరాలు), నల్గొండ (52,071 ఎకరాలు) జిల్లాలు ఉన్నాయి. చేతికొచ్చిన పంటను కోసి, కొనుగోలు కేంద్రాలకు తీసుకొచ్చి 15 రోజులు దాటినా తూకాలు వేయకపోవడంతో, ఈ అకాల వర్షాలు రైతుల పాలిట శాపంగా మారాయి.