Floods in medak district: తెలంగాణలో భారీ వర్షాలు కొనసాగుతూనే ఉన్నాయి. దీంతో మెదక్ జిల్లాలో వరదలు తీవ్ర నష్టాన్ని కలిగించాయి. నిజాంపేట మండలంలోని నందిగామ గ్రామంలోని ఒక పౌల్ట్రీ ఫాం పూర్తిగా నీట మునిగింది. ఈ ఊహించని వరద వల్ల పది వేల కోళ్లు చనిపోయాయి.
స్థానిక రైతు ఒకరు నిర్వహిస్తున్న ఈ ఫాంపైకి ఒక్కసారిగా వరద నీరు దూసుకురావడంతో, లోపల ఉన్న కోళ్లు తప్పించుకోలేకపోయాయి. దీంతో ఫాం యజమానికి సుమారు రూ. 14 లక్షల వరకు నష్టం వాటిల్లింది. ఈ ఘటనతో తీవ్రంగా బాధపడిన రైతు, ప్రభుత్వ సహాయం కోసం ఎదురు చూస్తున్నారు.
నందిగామ సంఘటనతో పాటు, మెదక్ జిల్లాలోని ఇతర ప్రాంతాల్లో కూడా పరిస్థితి దారుణంగా ఉంది. పొంగిపొర్లుతున్న వాగులు, వంకల వల్ల లోతట్టు ప్రాంతాలు నీట మునిగిపోయాయి. పశువుల పాకలు కూడా వరదల్లో చిక్కుకున్నాయి. అధికారులు సహాయక చర్యలు చేపట్టి, బాధితులను సురక్షిత ప్రాంతాలకు తరలిస్తున్నారు. ప్రభుత్వం తక్షణమే స్పందించి బాధితులను ఆదుకోవాలని రైతులు కోరుతున్నారు.
