మాజీ మంత్రి, సిద్ధిపేట బీఆర్ఎస్ ఎమ్మెల్యే హరీష్ రావు (Harish Rao) హైకోర్టును ఆశ్రయించారు. ఫోన్ ట్యాపింగ్ (Phone Tapping) వ్యవహారంలో ఆయనపై నమోదైన కేసును సవాల్ చేస్తూ క్వాష్ పిటిషన్ దాఖలు చేశారు. పంజాగుట్ట పోలీస్ స్టేషన్ లో తన మీద నమోదైన కేసు కొట్టివేయాలని పిటిషన్ లో న్యాయస్థానాన్ని కోరారు.
రాజకీయ కక్షతోనే తనపై కేసు నమోదు చేశారని హరీష్ రావు దాఖలు చేసిన పిటిషన్ లో పేర్కొన్నారు. నిరాధార ఆరోపణలు చేసి సంబంధం లేని కేసులో తనని ఇరికిస్తున్నారని ఆరోపించారు. కేసు కొట్టివేయడంతో పాటు అరెస్టు చేయకుండా పోలీసులకు ఆదేశాలు ఇవ్వాలని హరీష్ రావు పిటిషన్ లో విజ్ఞప్తి చేశారు.
కాగా, ఫోన్ ట్యాపింగ్ (Phone Tapping) చేశారంటూ సిద్దిపేట కాంగ్రెస్ నేత చక్రధర్ గౌడ్ (Chakradhar Goud) ఇచ్చిన ఫిర్యాదు మేరకు డిసెంబర్ 1న హరీష్ రావుపై పంజాగుట్ట పోలీసులు కేసు నమోదు చేశారు. హరీష్ రావుతో పాటు టాస్క్ ఫోర్స్ మాజీ డీసీపీ రాధాకృష్ణన్ రావు పైనా పోలీసులు కేసు నమోదు చేశారు. వీరిద్దరూ కలిసి తన ఫోన్ కాల్స్ రికార్డ్ చేశారని, తనని బెదిరించారని చక్రధర్ ఆరోపించారు.
