Jubilee hills bypoll election polling: హైదరాబాద్‌లోని జూబ్లీహిల్స్ అసెంబ్లీ నియోజకవర్గానికి జరుగుతున్న ఉప ఎన్నిక పోలింగ్ ప్రశాంతంగా కొనసాగుతోంది. అధికారిక సమాచారం ప్రకారం, ఉదయం 7 గంటలకు ప్రారంభమైన పోలింగ్‌లో ఓటర్లు చురుగ్గా పాల్గొంటున్నారు. ఉదయం 11 గంటల వరకు నియోజకవర్గంలో 20.76 శాతం పోలింగ్ నమోదైనట్లు ఎన్నికల అధికారులు ప్రకటించారు.
భారత రాష్ట్ర సమితి (బీఆర్‌ఎస్‌) ఎమ్మెల్యే మాగంటి గోపీనాథ్‌ అకాల మరణంతో ఈ ఉప ఎన్నిక అనివార్యమైంది. ఈ ఉప ఎన్నిక నవంబర్ 11న జరుగుతుండగా, ఓట్ల లెక్కింపు నవంబర్ 14న చేపట్టనున్నారు. ఈ ఎన్నికలో మొత్తం 4 లక్షలకు పైగా ఓటర్లు తమ ఓటు హక్కును వినియోగించుకోనున్నారు. మొత్తం 58 మంది అభ్యర్థులు ఎన్నికల బరిలో ఉన్నారు. వీరిలో ప్రధానంగా కాంగ్రెస్‌ అభ్యర్థి నవీన్‌ యాదవ్‌ (ఏఐఎంఐఎం మద్దతుతో), బీఆర్‌ఎస్‌ అభ్యర్థి మాగంటి సునీత, బీజేపీ అభ్యర్థి లంకాల దీపక్ రెడ్డి మధ్య త్రిముఖ పోటీ నెలకొంది.
ఉప ఎన్నికను దృష్టిలో ఉంచుకుని నియోజకవర్గం అంతటా పటిష్టమైన భద్రతా ఏర్పాట్లు చేశారు. 407 పోలింగ్ కేంద్రాలలో 226 అత్యంత సున్నితమైనవిగా గుర్తించారు. ఈ కేంద్రాలలో సీఆర్‌పీఎఫ్‌ బలగాలను మోహరించారు. పోలింగ్ ప్రక్రియను పర్యవేక్షించడానికి డ్రోన్‌ నిఘా, వెబ్‌ కాస్టింగ్‌ వంటి ఏర్పాట్లు కూడా చేశారు. స్థానికేతరులు పోలింగ్ బూత్‌ల వద్ద ఉండి ఓటర్లను ప్రభావితం చేస్తున్నారంటూ కొన్ని ఫిర్యాదులు రావడంతో, అధికారులు మోడల్‌ కోడ్ ఆఫ్ కండక్ట్ (ఎంసీసీ) ఉల్లంఘన కింద కేసులు కూడా నమోదు చేశారు.
సాధారణంగా నగరంలోని సంపన్న వర్గాలు అధికంగా ఉండే జూబ్లీహిల్స్ నియోజకవర్గంలో చారిత్రకంగాల తక్కువ పోలింగ్ శాతం నమోదవుతూ ఉంటుంది. 2023 సాధారణ ఎన్నికలలో ఇక్కడ కేవలం 47.2% పోలింగ్ మాత్రమే నమోదైంది. అయినప్పటికీ, ఈసారి ప్రధాన పార్టీల తరపున ముఖ్యమంత్రితో సహా సీనియర్‌ నాయకులు తీవ్ర స్థాయిలో ప్రచారం నిర్వహించారు. ఈ ఉప ఎన్నిక ఫలితం తెలంగాణ రాజకీయాలపై, ముఖ్యంగా రాబోయే జీహెచ్‌ఎంసీ ఎన్నికలపై ప్రభావం చూపే అవకాశం ఉన్నందున, అందరి దృష్టి ఈ పోలింగ్ శాతంపైన, ఫలితం పైన ఉంది.
