Jubilee Hills by-election security : హైదరాబాద్ నగరంలో తీవ్ర ఉత్కంఠ రేపుతున్న జూబ్లీహిల్స్ ఉప ఎన్నికకు రంగం సిద్ధమైంది. మంగళవారం జరగనున్న ఈ ప్రజాస్వామ్య పండగను ప్రశాంతంగా, పారదర్శకంగా నిర్వహించేందుకు ఎన్నికల సంఘం అసాధారణ ఏర్పాట్లు చేసింది. నియోజకవర్గం మొత్తం కేంద్ర బలగాల పహారాలోకి వెళ్లిపోయింది. సుమారు 3 వేల మంది సిబ్బందితో ఎన్నికల యంత్రాంగం కదనరంగానికి సిద్ధమైంది.
పోలింగ్‌కు సర్వం సిద్ధం : జూబ్లీహిల్స్ ఉప ఎన్నిక పోలింగ్‌ను సజావుగా నిర్వహించేందుకు సర్వం సిద్ధం చేశామని జిల్లా ఎన్నికల అధికారి (డీఈవో) ఆర్.వి. కర్ణన్ తెలిపారు. హైదరాబాద్ జాయింట్ సీపీ తఫ్సీర్ ఇక్బాల్‌తో కలిసి ఆయన మీడియాకు వివరాలు వెల్లడించారు.
బలగాలు: మొత్తం 1,761 మంది పోలీసులు, కేంద్ర బలగాలను భద్రతా విధుల్లో మోహరించారు.
సిబ్బంది: పోలింగ్ నిర్వహణ కోసం సుమారు 3 వేల మంది ఉద్యోగులు సిద్ధంగా ఉన్నారు.
సామగ్రి: అవసరమైన ఈవీఎంలు, వీవీప్యాట్‌లతో సిబ్బంది సోమవారం రాత్రికే తమకు కేటాయించిన పోలింగ్ కేంద్రాలకు చేరుకుంటారు.
మూడంచెల భద్రతా కవచం : ఓట్ల లెక్కింపు కేంద్రమైన యూసుఫ్‌గూడ కోట్ల విజయభాస్కర్ రెడ్డి స్టేడియం వద్ద మూడంచెల భద్రతను ఏర్పాటు చేసినట్లు జాయింట్ సీపీ తఫ్సీర్ ఇక్బాల్ తెలిపారు. వెలుపల సీఐఎస్‌ఎఫ్ దళాలు, లోపల బెటాలియన్ పోలీసులు, స్థానిక పోలీసులు పహారా కాయనున్నారు. పోలింగ్ రోజున నియోజకవర్గ పరిధిలో సెలవు ప్రకటించామని, పోలింగ్ కేంద్రానికి 100 మీటర్ల పరిధిలో 144 సెక్షన్ అమలులో ఉంటుందని స్పష్టం చేశారు.
ఈసారి అన్నీ ప్రత్యేకం : ఈ ఎన్నికల్లో ప్రలోభాలను, అక్రమాలను అరికట్టేందుకు ఎన్నికల సంఘం ప్రత్యేక చర్యలు చేపట్టింది.
నకిలీ ఓట్లకు చెక్: ఒకే వ్యక్తికి బహుళ ఓట్లు, ఒకే ఇంట్లో పదుల సంఖ్యలో ఓట్లు ఉన్నట్లు వచ్చిన ఫిర్యాదులపై ఈసీ స్పందించింది. అలాంటి ఓటర్ల వివరాలను ఏఎస్‌డీ (ఆబ్సెంట్, షిఫ్ట్, డిలీట్) జాబితాలో చేర్చింది. ఈ జాబితాలోని వారు ఓటు వేయాలంటే రెండు గుర్తింపు కార్డులను తప్పనిసరిగా చూపించాల్సి ఉంటుంది.
డిజిటల్ చెల్లింపులపై నిఘా: గూగుల్‌పే, ఫోన్‌పే వంటి యూపీఐ యాప్‌ల ద్వారా ఓటర్లకు డబ్బు పంపిణీ చేస్తున్నారన్న ఆరోపణలతో, నియోజకవర్గ పరిధిలో జరుగుతున్న అనుమానాస్పద లావాదేవీల వివరాలు ఇవ్వాలని రిజర్వ్ బ్యాంకును ఈసీ కోరింది.
ఎప్పటికప్పుడు సమాచారం: ప్రతి 2 గంటలకు ఒకసారి పోలింగ్ శాతాన్ని ప్రత్యేక మొబైల్ యాప్ ద్వారా ప్రకటిస్తారు.
తెల్లారేలోపే తొలి ఓటు : పోలింగ్‌కు ముందు, ఉదయం 5 గంటలకు అభ్యర్థులు, ఏజెంట్ల సమక్షంలో నమూనా పోలింగ్ (మాక్ పోల్) నిర్వహిస్తారు. ఈవీఎంల పనితీరును నిర్ధారించుకున్న తర్వాతే అసలు పోలింగ్ ప్రక్రియ ఉదయం 7 గంటలకు ప్రారంభమవుతుంది. ఈవీఎంలు మొరాయిస్తే తక్షణమే స్పందించేందుకు 39 మంది సెక్టోరియల్ అధికారులు, ఈసీఐఎల్ ఇంజినీర్లను అందుబాటులో ఉంచారు.
