హైదరాబాద్ సెంట్రల్ యూనివర్సిటీ(HCU)సమీపంలోని కంచ గచ్చిబౌలి భూముల వేలంపై రాజకీయ దుమారం రేగుతోంది. చెట్లను తొలగించి భూములను చదును చేసేందుకు జేసీబీలను అధికారులు భారీగా తరలించారు. ఈ నేపథ్యంలో కాంగ్రెస్ ప్రభుత్వంపై బీఆర్ఎస్, బీజేపీ నేతలు తీవ్రంగా మండిపడుతున్నారు. తాజాగా బీఆర్ఎస్ వర్కింగ్ ప్రెసిడెంట్ కేటీఆర్(KTR) ఎక్స్ వేదికగా స్పందించారు. భూముల వేల విషయంలో కాంగ్రెస్ అగ్రనేత రాహుల్ గాంధీ (Rahul Gandhi) ఇప్పటికైనా స్పందించాలనిడిమాండ్ చేశారు.
‘‘400 ఎకరాల విలువైన స్థలాన్ని నాశనం చేస్తూ గ్రీన్ మర్డర్‌కు పాల్పడుతున్నారు. ఆ స్థలంలో బుల్డోజర్లు, జేసీబీలు తిరుగుతున్నాయి. వాటిని చూసి అక్కడి నెమళ్లు సాయం కోసం చూస్తున్నాయి. ఇప్పటికైనా రాహుల్ గాంధీ నోరు విప్పరా?ఇవన్నీ చూస్తూ కూడా ఆయన మాట్లాడకపోతే ఎలా?’’ అని కేటీఆర్ ప్రశ్నించారు. ఈ మేరకు కొన్ని వీడియోలు, ఫొటోలను తన పోస్టుకు జత చేశారు. ఇదిలా ఉంటే కంచ గచ్చిబౌలి భూములపై టీజీఐఐసీ (TGIIC) కీలక ప్రకటన చేసిన సంగతి తెలిసిందే. ఆ 400 ఎకరాల భూమి ప్రభుత్వానిదేనని స్పష్టం చేసింది.
