తెలంగాణ సీఎం రేవంత్ పుట్టినరోజు (Revanth Birthday) సందర్భంగా రాజకీయ, సినిమా, వ్యాపార ప్రముఖులు ఆయనకి శుభాకాంక్షలు తెలుపుతున్నారు. ప్రధాని నరేంద్రమోదీ, ఏపీ సీఎం చంద్రబాబు నాయుడు, ఏపీ డిప్యూటీ సీఎం పవన్ కళ్యాణ్ ట్విట్టర్ వేదికగా రేవంత్ రెడ్డికి బర్త్ డే గ్రీటింగ్స్ తెలిపారు. ఇక తెలంగాణ ప్రధాన ప్రతిపక్ష బీఆర్ఎస్ పార్టీ వర్కింగ్ ప్రెసిడెంట్ కేటీఆర్ సైతం ట్విట్టర్ వేదికగా రేవంత్ రెడ్డికి విషెస్ తెలిపారు. అయితే ఆయన విషెస్ లో కొంచెం వెటకారం కూడా జోడించారులెండి.
ఇంతకీ కేటీఆర్ ఏమని ట్వీట్ చేశారంటే… “హ్యాపీ బర్త్ డే రేవంత్.. నేను హైదరాబాద్‌లోనే ఉన్నాను.. మీ ప్రభుత్వ ఏజెన్సీలు ఎప్పుడైనా రావొచ్చు.. ఛాయ్‌, ఉస్మానియా బిస్కెట్లు ఇస్తా.. మీ బర్త్ డే సందర్భంగా కావాలంటే నా ఖర్చుతో కేక్‌ కూడా కట్‌ చేయిస్తా.. అంటూ కేటీఆర్ ట్వీట్ చేశారు.
కేటీఆర్ వ్యంగ్యం వెనక విషయమిదే…
ఫార్ములా ఈ కార్ రేసింగ్ కేసులో కేటీఆర్ అరెస్టుకి రంగం సిద్ధం అవుతోందంటూ తెలంగాణలో జోరుగా చర్చ నడుస్తోంది. వీటికి బలం చేకూర్చేలా కాంగ్రెస్ మంత్రి పొంగులేటి శ్రీనివాస్ రెడ్డి.. రాష్ట్రంలో బాంబు పేలనుంది, అది కూడా అట్టాంటి ఇట్టాంటి బాంబు కాదు.. ఆటం బాంబ్ అంటూ మీడియాలో సెన్సేషన్ కి తెరలేపారు. కేటీఆర్ అరెస్టుకు సంబంధించే పొంగులేటి పరోక్షంగా మాట్లాడుతున్నారంటూ మీడియాలో కథనాలు వెల్లువెత్తుతున్నాయి.
ఈ క్రమంలో అరెస్టు నుంచి తప్పించుకునేందుకు కేటీఆర్ మలేషియా జంప్ అంటూ కథనాలు వెలువడ్డాయి. వీటిపై రియాక్ట్ అయిన బీఆర్ఎస్ సోషల్ మీడియా ఇన్ ఛార్జ్ మన్నె క్రిశాంక్ ట్విట్టర్ వేదికగా ఓ పోస్ట్ పెట్టారు. “ఈరోజు కాంగ్రెస్ వార్తా పత్రిక అరెస్టు భయంతో కేటీఆర్ మలేషియా వెళ్లారు అని రాసింది. మీ టార్గెట్ కేటీఆర్ క్యారెక్టర్ అసాసినేషన్ అని మాకు తెలుసు. జర్నలిజాన్ని జోక్ చేయవద్దు. కేటీఆర్ ఈరోజు ఉదయం హైదరాబాద్‌లోని తన ఇంట్లో చాయ్ తాగుతూ కేటీఆర్ ఈ వార్త చదువుతున్నారు” అని ట్వీట్ చేశారు. ఈ ట్వీట్ ని రీట్వీట్ చేసిన కేటీఆర్.. రేవంత్ బర్త్ డే (Revanth Birthday) కి వ్యంగ్యంగా విషెస్ తెలిపారు.
