Sahasra Murder Case: హైదరాబాద్ కూకట్‌పల్లిలో చోటుచేసుకున్న 10 ఏళ్ల బాలిక హత్య కేసును పోలీసులు విజయవంతంగా ఛేదించారు. ఈ ఘటనతో స్థానికులు తీవ్ర ఆందోళనకు గురయ్యారు. కేసు దర్యాప్తు తర్వాత పోలీసులు వెల్లడించిన వివరాలు షాకింగ్‌గా మారాయి. హత్యకు పాల్పడినది అదే వీధిలో నివసించే పదో తరగతి చదువుతున్న బాలుడేనని తేలింది. చిన్న వయసులోనే ఇంత క్రూరమైన చర్య జరగడం అందరినీ ఆశ్చర్యానికి గురి చేసింది.
దొంగతనం చేయాలని..
ఈ కేసులోని సంఘటనల క్రమం ఇలా ఉంది. ఆ బాలుడు దొంగతనం చేయాలని ముందుగానే యోచించాడు. తన ఇంటి పక్కనే ఉన్న సహస్ర కుటుంబ ఇంట్లో క్రికెట్ బ్యాట్ ఉందని తెలిసి, దాన్ని దొంగిలించాలని ప్లాన్ వేసుకున్నాడు. దొంగతనానికి ముందే అతను ఒక కాగితంపై ప్లాన్ రాసుకున్నాడని పోలీసులు తెలిపారు. బ్యాట్ దొంగతనం చేస్తూ ఎవరు అడ్డుకుంటే హత్య చేయడమే మరో మార్గంగా భావించి, దాన్నీ తన కాగితంలో నమోదు చేశాడు.
భవనం పై నుంచి..
పోలీసులు వెల్లడించిన ప్రకారం, సంఘటన జరిగిన రోజున బాలుడు భవనం పై నుంచి సహస్ర ఇంటి బిల్డింగ్‌లోకి దూకి వెళ్లాడు. అప్పటికే ఆ అమ్మాయి బాత్రూం నుంచి బయటకు వచ్చింది. తన ఇంట్లో దొంగతనం జరుగుతున్నదని గమనించి, తండ్రికి చెబుతానని ఆమె హెచ్చరించింది. దీంతో బాలుడు తన రాసుకున్న రెండో ప్లాన్‌ను అమలు చేశాడు. మొదట గొంతు కోసి, ఆ తర్వాత కడుపుపై పదహారు దాడులు చేశాడు. కేవలం 10 ఏళ్ల బాలికను ఇంత క్రూరంగా హతమార్చడం పోలీసులను కూడా విస్మయానికి గురి చేసింది.
వాషింగ్ మిషన్‌లో..
హత్య అనంతరం బాలుడు ప్రశాంతంగా తన ఇంటికి వెళ్లాడు. రక్తపు మరకలున్న బట్టలను వాషింగ్ మిషన్‌లో వేసి శుభ్రం చేశాడు. హత్యకు ఉపయోగించిన కత్తిని కడిగి ఫ్రిజ్‌పై పెట్టాడని పోలీసులు తెలిపారు. దర్యాప్తు సమయంలో ఈ వివరాలన్నీ బయటపడ్డాయి.
కేసు విచారణలో కీలకమైన ఆధారం ఒక సాఫ్ట్‌వేర్ ఉద్యోగి ఇచ్చిన సమాచారం. హత్య జరిగిన రోజున ఒక బాలుడు భవనం పై నుంచి దూకి వెళ్తున్నాడని అతను గుర్తించాడు. ఈ సమాచారంతో పోలీసులు అనుమానితుడిని గుర్తించి, విచారణ ప్రారంభించారు. విచారణలో నిజం బహిర్గతమైంది.
సీసీటీవీ కెమెరాల..
ఇంకా ఒక ముఖ్యమైన విషయం ఏమిటంటే, ఆ బాలుడు తన దొంగతనం, హత్యకు సంబంధించిన ప్రతిదీ పేపర్‌లో రాసుకున్నాడు. ఎవరైనా పట్టుకుంటే ఎలా తప్పించుకోవాలో, సీసీటీవీ కెమెరాలనుంచి ఎలా దూరంగా ఉండాలో కూడా లిఖించాడు. దానికి అనుగుణంగా భవనం పై నుంచి మరో భవనంలోకి దూకి తప్పించుకోవాలని ముందే ఆలోచించాడు. చిన్న వయసులోనే ఇంత క్రిమినల్‌ మైండ్‌తో ప్లాన్ చేయడం పోలీసులను కూడా దిగ్భ్రాంతికి గురిచేసింది.
దర్యాప్తు పూర్తయిన తర్వాత పోలీసులు నిందితున్ని జువైనల్ జస్టిస్ బోర్డు ఎదుట హాజరుపరిచారు. అక్కడి నుంచి అతన్ని జువైనల్ హోంకు తరలించారు.
ఈ కేసుతో సంబంధం ఉన్న ప్రతి అంశాన్ని పోలీసులు సమగ్రంగా పరిశీలించారు. సహస్ర తన తండ్రికి దొంగతనం విషయం చెబుతానని బెదిరించడం వల్లే ఈ దుర్ఘటన చోటుచేసుకుందని దర్యాప్తు స్పష్టం చేసింది.
