Mlc Kavitha Prajayathra: తెలంగాణ రాష్ట్ర రాజకీయాల్లో తనదైన శైలిలో ముందుకెళ్తున్న ఎమ్మెల్సీ కల్వకుంట్ల కవిత, ఇటీవల ప్రజా యాత్ర పోస్టర్ ను ఆవిష్కరించారు. ఈ సందర్భంగా ఆమె చేసిన వ్యాఖ్యలు రాష్ట్ర రాజకీయాల్లో ప్రాధాన్యత సంతరించుకున్నాయి.
తెలంగాణ రాష్ట్రంలో అనేక సమస్యలు ప్రజలను పట్టిపీడిస్తున్నాయని, అయితే రాష్ట్ర ప్రభుత్వం కేవలం ప్రతిపక్షాలను విమర్శించడానికే ఎక్కువ సమయం కేటాయిస్తోందని కవిత విమర్శించారు. కేంద్ర ప్రభుత్వంపైనా ఆమె తీవ్ర వ్యాఖ్యలు చేశారు. కేంద్రానికి తెలంగాణ ప్రజలు 8 మంది ఎంపీలను ఇచ్చినా, రాష్ట్రానికి జరిగిన అభివృద్ధి మాత్రం శూన్యమని ఆమె అన్నారు. ఈ వ్యాఖ్యలు ప్రస్తుత అధికార కాంగ్రెస్ ప్రభుత్వం మరియు కేంద్రంలో అధికారంలో ఉన్న బీజేపీపైనా గురిపెట్టినట్టు స్పష్టమవుతోంది.
ఈ సందర్భంగా తన సంస్థ తెలంగాణ జాగృతి గురించి మాట్లాడుతూ, ఇది ఒక స్వతంత్ర సంస్థ అని, గతంలో ప్రభుత్వానికి అనుబంధంగా పని చేసిందని గుర్తు చేశారు. అయితే, ‘భౌగోళికంగా తెలంగాణ సాధించాం కానీ సామాజిక తెలంగాణ సాధించలేదు’ అని అన్నందుకే తనను సస్పెండ్ చేశారని ఆమె పేర్కొన్నారు.
ఈ యాత్ర ముఖ్య నినాదం ‘సామాజిక తెలంగాణ’ అని కవిత స్పష్టం చేశారు. ఈ లక్ష్య సాధనలో భాగంగా అందరినీ కలుస్తామని, అందరినీ కలుపుకొని ముందుకు వెళ్తామని ఆమె తెలిపారు. రాష్ట్రంలోని సమస్యలకు పరిష్కారాలు కేవలం హైదరాబాదులో కూర్చుంటే దొరకవని, అందుకే ప్రజల్లోకి వెళ్తున్నామని చెప్పారు.
యాత్రకు సంబంధించిన వివరాలను ప్రకటిస్తూ, ఇది 4 నెలల పాటు ‘జాగృతి జనం బాట’ పేరుతో కొనసాగుతుందని, ప్రతి జిల్లాలో 2 రోజుల పాటు పర్యటించడం జరుగుతుందని తెలిపారు. ఈ యాత్రలో ఒక కీలక నిర్ణయాన్ని ఆమె వెల్లడించారు. తను తన తండ్రి కెసిఆర్ ఫోటో లేకుండా యాత్ర చేస్తానని, ఫోటో పెట్టుకుంటే నైతకతను కోల్పోతానని అన్నారు. ‘చెట్లు పేరు చెప్పి కాయలు అమ్ముకోను’ అని వ్యాఖ్యానించడం ద్వారా తన రాజకీయ భవిష్యత్తు, సిద్ధాంతాలు వ్యక్తిగత ఆరాధన కంటే ప్రజా సమస్యలకు ఎక్కువ ప్రాధాన్యత ఇస్తాయని పరోక్షంగా తెలిపారు. ఈ యాత్ర యొక్క ప్రధాన లక్ష్యం ప్రజల సమస్యలు తెలుసుకోవడమే అని ఆమె స్పష్టం చేశారు.
