Nagarjuna Sagar dam flood gates : వరుణుడి కరుణతో కృష్ణమ్మ ఉగ్రరూపం దాల్చింది. ఎగువ రాష్ట్రాల్లో కురుస్తున్న కుంభవృష్టికి కృష్ణా నది ఉప్పొంగి ప్రవహిస్తుండటంతో నాగార్జునసాగర్ జలాశయం వద్ద అద్భుత దృశ్యం ఆవిష్కృతమైంది. జలకళతో తొణికిసలాడుతున్న సాగర్ ప్రాజెక్టు 26 క్రస్ట్ గేట్లను ఎత్తివేయడంతో, దిగువకు విడుదలవుతున్న నీరు పాల సముద్రాన్ని తలపిస్తోంది. ఈ అపురూప దృశ్యాన్ని వీక్షించేందుకు పర్యాటకులు తరలివస్తున్నారు. అయితే, ఈ జల ప్రవాహం ఒకవైపు కనువిందు చేస్తున్నా, మరోవైపు లోతట్టు ప్రాంతాల ప్రజలను, అధికార యంత్రాంగాన్ని కంటిమీద కునుకు లేకుండా చేస్తోంది. కేవలం నాగార్జునసాగరే కాదు, రాష్ట్రంలోని శ్రీశైలం నుంచి కాళేశ్వరం వరకు దాదాపు అన్ని ప్రధాన జలాశయాలు నిండుకుండలా మారాయి. 

నాగార్జునసాగర్: 26 గేట్ల ద్వారా నీటి విడుదల : ఎగువన ఉన్న శ్రీశైలం జలాశయం నుంచి భారీగా వరద నీరు వచ్చి చేరుతుండటంతో సాగర్ అధికారులు అప్రమత్తమయ్యారు. ప్రాజెక్టు పూర్తిస్థాయి నీటిమట్టం 590 అడుగులు కాగా, ఇప్పటికే నీటిమట్టం 583 అడుగులకు చేరుకుంది. జలాశయంలోకి 4,31,297 క్యూసెక్కుల వరద వస్తుండగా, అంతేస్థాయిలో అంటే 4,31,874 క్యూసెక్కుల నీటిని 26 గేట్లు ఎత్తి దిగువకు విడుదల చేస్తున్నారు. ప్రాజెక్టు పూర్తిస్థాయి నీటి నిల్వ 312.04 టీఎంసీలు కాగా, ప్రస్తుతం 292.66 టీఎంసీల నీరు నిల్వ ఉంది.

శ్రీశైలం: 10 గేట్లు ఎత్తివేత : నాగార్జునసాగర్‌కు ప్రధాన నీటి వనరైన శ్రీశైలం ప్రాజెక్టుకు జూరాల, సుంకేసుల నుంచి వరద ప్రవాహం కొనసాగుతోంది. జలాశయంలోకి 4,98,022 క్యూసెక్కుల నీరు వచ్చి చేరుతుండగా, 10 స్పిల్‌వే గేట్లను 18 అడుగుల మేర ఎత్తి 4,18,630 క్యూసెక్కుల నీటిని నాగార్జునసాగర్‌కు విడుదల చేస్తున్నారు. దీంతో పాటు విద్యుదుత్పత్తి, పోతిరెడ్డిపాడు ద్వారా మొత్తం 5,13,540 క్యూసెక్కుల నీటిని దిగువకు వదులుతున్నారు. ప్రాజెక్టు పూర్తిస్థాయి నీటిమట్టం 885 అడుగులు కాగా, ప్రస్తుత మట్టం 881.60 అడుగులుగా ఉంది.

గోదావరి బేసిన్‌లోనూ అదే జోరు : కృష్ణా బేసిన్‌తో పాటు గోదావరి పరివాహక ప్రాంతాల్లోని జలాశయాలు సైతం జలకళను సంతరించుకున్నాయి.

నిజాంసాగర్: ప్రాజెక్టులోకి 56,419 క్యూసెక్కుల వరద వస్తుండటంతో, 12 గేట్లు ఎత్తి 80,576 క్యూసెక్కుల నీటిని దిగువకు విడుదల చేస్తున్నారు.

శ్రీరామ్‌సాగర్: ఈ ప్రాజెక్టుకు వరద ప్రవాహం కాస్త తగ్గింది. ఇన్​ఫ్లో 1,20,000 క్యూసెక్కులుగా ఉండగా, ఔట్​ఫ్లో 29,032 క్యూసెక్కులుగా ఉంది.

భద్రాచలం: గోదావరి ఉద్ధృతంగా ప్రవహిస్తోంది. నీటిమట్టం 51.5 అడుగులకు చేరడంతో అధికారులు రెండో ప్రమాద హెచ్చరికను జారీ చేసి, సహాయక చర్యలకు సిద్ధమయ్యారు.

కడెం: జలాశయానికి 5,316 క్యూసెక్కుల వరద వస్తుండగా, ఒక గేటు ద్వారా 3,641 క్యూసెక్కుల నీటిని కిందకు వదులుతున్నారు.

సింగూరు: ప్రాజెక్టులోకి 35,303 క్యూసెక్కుల ప్రవాహం వస్తుండగా, 43,417 క్యూసెక్కుల నీటిని విడుదల చేస్తూ నీటిమట్టాన్ని నియంత్రిస్తున్నారు. మొత్తం మీద, రాష్ట్రంలోని జలాశయాలు నిండుగా కళకళలాడుతుండటం రైతులకు ఆనందాన్ని కలిగిస్తుండగా, నదీ తీర ప్రాంతాల ప్రజలను అధికారులు నిరంతరం అప్రమత్తం చేస్తున్నారు.