Telangana tribal school infrastructure : నిరుపేద గిరిజన విద్యార్థులకు ఉజ్వల భవిష్యత్తును అందించాలనే సమున్నత లక్ష్యంతో ప్రభుత్వం గురుకుల పాఠశాలలను ఏర్పాటు చేస్తుంది. కానీ, అధికారుల ముందుచూపు లోపం, నిర్లక్ష్యం ఆ లక్ష్యాన్నే నీటిపాలు చేస్తుంటే? చదువుల కోవెల కావాల్సిన పాఠశాలే, వానొస్తే విద్యార్థులకు నీటి చెరసాలగా మారితే? నల్గొండ జిల్లా దేవరకొండ మండలం కొమ్మెపల్లిలోని గిరిజన బాలుర గురుకుల పాఠశాల దుస్థితి ఇది. వానొస్తే చాలు, ఈ పాఠశాల చుట్టూ నీరు చేరి ఓ ద్వీపంలా మారిపోతోంది. అసలు 500 మంది విద్యార్థుల భవిష్యత్తుతో ముడిపడిన ఈ పాఠశాలకు ఈ దుస్థితి ఎందుకు వచ్చింది? మూడేళ్లుగా ఇదే సమస్య పునరావృతమవుతున్నా అధికారుల కళ్లు ఎందుకు తెరుచుకోవడం లేదు?
అసలు సమస్య ఏంటి : లోతట్టు ప్రాంతంలో, చుట్టూ కుంటలు, చెరువులు ఉన్న ప్రభుత్వ స్థలంలో ఈ పాఠశాల భవనాన్ని నిర్మించడమే ఈ సమస్యకు మూలకారణం. ఎత్తైన ప్రదేశంలో నిర్మించాలన్న కనీస ఆలోచన చేయకుండా భవనాన్ని కట్టడంతో, చిన్నపాటి వర్షానికే చుట్టుపక్కల నీరంతా పాఠశాల ప్రాంగణంలోకి చేరుతోంది. వరద నీరు లోపలికి రాకుండా నిలువరించే ప్రహరీ (రిటెన్షన్) గోడ నిర్మాణం చేపట్టకపోవడంతో పరిస్థితి మరింత దయనీయంగా మారింది.
ఇది ఈ ఏడాది వచ్చిన కొత్త సమస్య కాదు. 2023, 2024, ఇప్పుడు 2025.. ఇలా వరుసగా గత మూడేళ్లుగా ప్రతీ వర్షాకాలంలో ఈ పాఠశాల ఇలా జలదిగ్బంధంలో చిక్కుకోవడం, విద్యార్థులు నరకయాతన అనుభవించడం సర్వసాధారణమైపోయింది. ఎన్నిసార్లు ఫిర్యాదు చేసినా ఉన్నతాధికారుల నుంచి కంటితుడుపు చర్యలే తప్ప శాశ్వత పరిష్కారం లభించడం లేదని విద్యార్థులు, వారి తల్లిదండ్రులు ఆవేదన వ్యక్తం చేస్తున్నారు.విద్యార్థుల గోడు వినేదెవరు?
పాఠశాల ద్వీపంగా మారడంతో విద్యార్థులు అనేక సమస్యలతో సతమతమవుతున్నారు.
తాగునీటి కష్టాలు: గురుకులానికి వ్యవసాయ విద్యుత్ కనెక్షన్ ఇవ్వడంతో, త్రీ-ఫేజ్ కరెంట్ సరఫరా లేక ఆర్వో ప్లాంట్ సరిగ్గా పనిచేయడం లేదు. దీంతో విద్యార్థులు సురక్షితమైన తాగునీటికి నోచుకోవడం లేదు.
నీళ్లు, కరెంటు లేక అవస్థలు: రాత్రి వేళల్లో తరచూ విద్యుత్ కోతలు ఉంటున్నాయి. ఉదయాన్నే స్నానం చేయాలన్నా నీళ్లు రాక తీవ్ర ఇబ్బందులు పడుతున్నారు.
విష కీటకాల భయం: చుట్టూ నీరు నిలిచిపోవడంతో పాములు, తేళ్లు వంటి విష కీటకాలు హాస్టల్ గదుల్లోకి వస్తుండటంతో ప్రాణాలు అరచేతిలో పెట్టుకుని బతకాల్సి వస్తోందని విద్యార్థులు భయాందోళన వ్యక్తం చేస్తున్నారు.
వంటశాలలో వర్షం: వంటగది పైకప్పు కూడా వర్షానికి కురుస్తుండటంతో వంట చేయడానికి సిబ్బంది ఇబ్బందులు పడుతున్నారు.
భూ వివాదమే కారణమా : పాఠశాలకు రక్షణగా నిలవాల్సిన ప్రహరీ గోడ నిర్మాణంలో జాప్యానికి భూ వివాదమే కారణమని తెలుస్తోంది. ఈ విషయంపై పాఠశాల ప్రిన్సిపల్ వెంకట్ నారాయణను వివరణ కోరగా, సమస్యను ఉన్నతాధికారుల దృష్టికి తీసుకెళ్లానని, త్వరలోనే ప్రహరీ నిర్మాణం, విద్యుత్ సమస్య పరిష్కారమవుతాయని తెలిపారు.
అయితే, మూడేళ్లుగా కొనసాగుతున్న ఈ సమస్యకు భూ వివాదం అనే సాకు చూపి, 500 మంది గిరిజన విద్యార్థుల భద్రతను, భవిష్యత్తును గాలికి వదిలేయడంపై సర్వత్రా విమర్శలు వెల్లువెత్తుతున్నాయి. అధికారులు తక్షణమే స్పందించి, వివాదాలను పక్కనపెట్టి, ప్రహరీ గోడ నిర్మాణం చేపట్టి, విద్యార్థుల కష్టాలకు శాశ్వత పరిష్కారం చూపాలని అందరూ కోరుతున్నారు.
