Today Rain In TG: రాష్ట్రంలో మాన్ సూన్ వర్షాలకు మళ్ళీ బ్రేక్ పడే అవకాశాలు కనిపిస్తున్నాయి. వాతావరణంలో మళ్ళీ వేడిమి పెరుగుదల వల్ల భారీ వర్షాలేమీ ఉండవు కానీ అక్కడక్కడా తేలికపాటి వర్షాలు మాత్రమే కురుస్తాయని హైదరాబాద్ వాతావరణ కేంద్రం వెల్లడించింది. ఇది జూలై 15 వరకు కొనసాగుతుందని పేర్కొంది. పశ్చిమ, ఉత్తర తెలంగాణ ప్రాంతాల్లో మధ్యాహ్నం నుంచి సాయంత్రం సమయంలో చెల్లాచెదురుగా వర్షాలు కురుస్తాయని, తూర్పు తెలంగాణలో రాత్రి సమయంలో తేలికపాటి నుంచి మోస్తరు వర్షాలు కురిసే అవకాశాలు ఉన్నాయని పేర్కొంది. హైదరాబాద్ లో సాయంకాలం ఓ 10 నుంచి 15 నిమిషాల పాటు చినుకులు పడే అవకాశాలు ఉన్నాయని హైదరాబాద్ వాతావరణ శాఖ అధికారులు తెలిపారు.
గడిచిన 24 గంటల్లో:
నిన్న పశ్చిమ హైదరాబాదులో మోస్తరు వర్షం కురిసింది. 5-10 మి.మీ. నమోదైంది. ఉత్తర తెలంగాణాలోని వివిధ ప్రాంతాలలో ప్రధానంగా ఆదిలాబాద్, ఆసిఫాబాద్‌లో గత 2 రోజులుగా భారీ వర్షాల వల్ల మంచి వర్షపాతం నమోదైందని హైదరాబాద్ వాతావరణ శాఖ అధికారులు తెలిపారు. 3 రోజులుగా చాలా ప్రాంతాలలో 100-120 మిమీ వర్షాలు కురిసాయని తెలిపారు. ఇంకొన్ని ప్రాంతాలలో 150 మిమీ వర్షాలు పడ్డాయని అన్నారు. అయితే నిన్న చెప్పినట్టుగా నిర్మల్, మంచిర్యాలలో మాత్రం వర్షాలు కురవలేదని స్పష్టం చేశారు. ఈరోజు రుతుపవనాలు మందకొడిగా ఉంటాయని పేర్కొన్నారు. అనేక ప్రాంతాల్లో తేలికపాటి వర్షాలు లేదా పొడి వర్షాలు మాత్రమే ఉంటాయని చెప్పారు. ఇక హైదరాబాద్ లో నిన్నటిలాగే స్వల్ప వర్షాలు మాత్రమే ఉంటాయని అన్నారు.
తెలంగాణలో జూన్ మొదటి వారంలోనే రుతుపవనాలు ప్రవేశించినప్పటికీ, వాటి ప్రభావం అంతగా లేదు. ప్రస్తుతం నెలకొన్న వాతావరణ పరిస్థితులు రుతుపవనాలు చురుకుగా మారడానికి అనుకూలంగా ఉన్నాయని వాతావరణ నిపుణులు చెబుతున్నారు. రాష్ట్రవ్యాప్తంగా వర్షాలు విస్తరించి, రైతాంగానికి ఉపశమనం కలిగించే అవకాశం ఉంటుందని ఇప్పటికే వాతావరణ కేంద్రం తెలిపింది.
