మహారాష్ట్ర అసెంబ్లీ ఎన్నికల ప్రచారం జోరందుకుంది. అన్ని పార్టీల అగ్రనేతలు తమ అభ్యర్థులను గెలిపించాలంటూ హోరాహోరీగా ప్రచారం చేస్తున్నారు. ఈ క్రమంలో కాంగ్రెస్ పార్టీ తరపున మహారాష్ట్ర ఎన్నికల ప్రచారంలో పాల్గొనేందుకు సీఎం రేవంత్ రెడ్డి (Revanth Reddy) శనివారం ముంబై వెళ్లారు. అక్కడ నిర్వహించిన మీడియా సమావేశంలో రేవంత్ మాట్లాడారు. ప్రధాని మోదీపై విమర్శలు గుప్పించారు. మోదీ అబద్దాలు చెప్పడం మానుకోవాలని హితవు పలికారు.
మహారాష్ట్ర బీజేపీ నేతలు కొద్దిరోజులుగా తెలంగాణలో కాంగ్రెస్ ప్రభుత్వంపై అబద్ధపు ప్రచారం చేస్తున్నారని రేవంత్ రెడ్డి (Revanth Reddy) మండిపడ్డారు. ప్రధాని మోదీ కూడా తెలంగాణలో కాంగ్రెస్ గ్యారంటీల అమలుపై అబద్దాలు చెప్పడం మొదలుపెట్టారన్నారు. మోదీ అబద్ధాలు చెప్పడం మానుకోకపోతే.. మేం నిజాలు చెబుతూనే ఉంటామన్నారు. నేను మహారాష్ట్ర ప్రజలకు తెలంగాణలో ఆరు గ్యారంటీల అమలుపై నిజాలు చెప్పడానికే వచ్చానని సీఎం రేవంత్ వెల్లడించారు.
బీజేపీని ఈ ఎన్నికల్లో ఓడించండి…
“దేశచరిత్రలో మహారాష్ట్రకు ప్రత్యేక స్థానం ఉంది. దేశ గతిని మార్చిన ఎందరో మహానుభావులకు మహారాష్ట్ర గడ్డ జన్మనిచ్చింది. మహాత్మా జ్యోతిబాపూలే, బాలగాంగధర్ తిలక్, సావిత్రిబాయి పూలే, డాక్టర్ బాబాసాహెస్ అంబేద్కర్ వంటి ఎందరో మహానుభావులు ప్రజల్లో చైతన్యం నింపి దేశానికి ఒక దారి చూపారు. ఇంతటి ఘనత ఉన్న మహారాష్ట్ర ఎవరి చేతుల్లోకో వెళ్లకూడదు. మహారాష్ట్రకు రావాల్సిన 17 మెగా ప్రాజెక్టులు మోదీ గుజరాత్ కు తరిలించుకొని పోయారు. మిమ్మల్ని మోసం చేసిన బీజేపీని ఈ ఎన్నికల్లో ఓడించండి” అంటూ మహారాష్ట్ర ప్రజలకు రేవంత్ పిలుపునిచ్చారు.
Also Read : కాంగ్రెస్ లో విషాదం.. మాజీ ఎమ్మెల్యే మృతి
ఇంకా రేవంత్ ఏం మాట్లాడారో ఆయన మాటల్లోనే…
దేశంలో మహారాష్ట్రలోనే ఎక్కువ రైతు ఆత్మహత్యలు జరిగాయి.
కేంద్ర, రాష్ట్ర ప్రభుత్వాలు రైతు సంక్షేమాన్ని మరిచాయి.
నల్లచట్టాలు తెచ్చి అదానీ, అంబానీలకు మేలు చేయాలని మోదీ భావించారు.
తెలంగాణలో రైతులకు రూ.2లక్షల రుణమాఫీ చేస్తామని మాట ఇచ్చాం.
ఇచ్చిన మాట ప్రకారం 25 రోజుల్లో 22,22,067 మంది రైతులకు రూ.17,869 కోట్లు మాఫీ చేసాం.
ఎవరికైనా వివరాలు కావాలంటే ఇవ్వడానికి మేం సిద్ధంగా ఉన్నాం.
తెలంగాణ రైతుల విషయంలో మోదీ ట్విట్టర్ లో చేసిన విమర్శలకు సరైన సమాధానం ఇచ్చాం. ఆ తరువాత ఆయన తన ట్వీట్ ను డిలీట్ చేసుకున్నారు.
ప్రభుత్వం ఏర్పడిన పది నెలల్లోనే 50వేల ప్రభుత్వ ఉద్యోగాలు భర్తీ చేశాం.
మహాలక్ష్మీ పథకం ద్వారా రూ.500లకే గ్యాస్ అందిస్తున్నాం.
ఇప్పటివరకు దాదాపు 50 లక్షల మంది 200 యూనిట్ల ఉచిత విద్యుత్ ద్వారా లబ్ది పొందుతున్నారు.
వరికి రూ.500 మద్దతు ధర అందిస్తున్నాం.
1కోటి 4 లక్షల మంది మహిళలు ఈ పది నెలల్లో ఉచిత బస్సు ప్రయాణ సౌకర్యం వినియోగించుకున్నారు.
ఇందుకోసం రూ.3541 కోట్లు ఆర్టీసీకి ప్రభుత్వం అందించింది.
సామాజిక న్యాయం అందించేందుకు తెలంగాణలో కులగణన చేపట్టాం.
2025 జనగణలో తెలంగాణ కులగణనను పరిగణనలోకి తీసుకోవాలని కేబినెట్ లో తీర్మానం చేసి.. మోదీని డిమాండ్ చేసాం..
