Agriculture WhatsApp Channel : అరచేతిలో స్మార్ట్ఫోన్.. అండగా నిలిచే సాంకేతిక పరిజ్ఞానం.. ఇది నేటి రైతు ప్రపంచం. ఈ డిజిటల్ యుగంలో అన్నదాతకు మరింత చేరువయ్యేందుకు రాష్ట్ర వ్యవసాయ శాఖ సరికొత్త అడుగు వేసింది. కేవలం ఒక్క ‘హాయ్’ సందేశంతో రైతన్నల సమస్యలకు పరిష్కారం చూపేలా, వారికి అవసరమైన ప్రతి సమాచారాన్ని అందించేలా ‘వాట్సాప్ ఛానల్’కు శ్రీకారం చుట్టింది. ఇంతకీ ఈ ఛానల్ ఎలా పనిచేస్తుంది..? దీని ద్వారా రైతులకు ఎలాంటి ప్రయోజనాలు చేకూరనున్నాయి..?
డిజిటల్ సేద్యంలో విప్లవాత్మక మార్పు : మారుతున్న కాలానికి అనుగుణంగా రైతులను సాంకేతికత వైపు నడిపించాలనే లక్ష్యంతో తెలంగాణ వ్యవసాయ శాఖ తొలిసారిగా అధికారిక వాట్సాప్ ఛానెల్‌ను అందుబాటులోకి తెచ్చింది. ఇది రైతులకు, వ్యవసాయ అధికారులకు మధ్య వారధిగా నిలుస్తూ, సకాలంలో సరైన సమాచారాన్ని అందించనుంది.
క్షేత్రస్థాయిలో అమలు: ఈ కార్యక్రమాన్ని పటిష్టంగా అమలు చేసేందుకు ఉన్నతాధికారులు స్పష్టమైన ఆదేశాలు జారీ చేశారు. ప్రతి వ్యవసాయ క్లస్టర్‌లోని వ్యవసాయ విస్తరణాధికారి (ఏఈవో) కనీసం 100 మంది రైతుల స్మార్ట్‌ఫోన్లలో ఈ వాట్సాప్ ఛానెల్‌ను అనుసంధానం చేయించాలని రాష్ట్ర వ్యవసాయ శాఖ సంచాలకుడు గోపీ ఆదేశించారు. ఖమ్మం, భద్రాద్రి కొత్తగూడెం జిల్లాల్లో ఇప్పటికే దీనిపై రైతులకు అవగాహన కల్పిస్తున్నారు.
అందుబాటులో ఉండే సమాచారం: ఈ వాట్సాప్ ఛానెల్ ద్వారా రైతులకు బహుళ ప్రయోజనాలు కలగనున్నాయి.
ప్రభుత్వ పథకాలు: ప్రభుత్వం అందించే రాయితీలు, పథకాల వివరాలు నేరుగా రైతులకే చేరతాయి.
పంటల యాజమాన్యం: పంటల దశలను బట్టి శాస్త్రవేత్తల సూచనలు, సలహాలు, తెగుళ్ల నివారణకు తీసుకోవాల్సిన జాగ్రత్తలు అందుబాటులో ఉంటాయి.
వాతావరణ హెచ్చరికలు: వాతావరణ శాఖ సూచనలు, వర్షాకాలంలో తీసుకోవాల్సిన జాగ్రత్తలు, కీటకాల నియంత్రణ మార్గదర్శకాలు ఎప్పటికప్పుడు తెలుస్తాయి.
మార్కెట్ ధరలు: వివిధ మార్కెట్లలో పంటల ధరల వివరాలు, శిక్షణా కార్యక్రమాల సమాచారం లభిస్తుంది.
రైతు వేదికల అనుసంధానం: రాష్ట్రవ్యాప్తంగా ఉన్న 1,600 రైతు వేదికల ద్వారా నిర్వహించే కార్యక్రమాలు, వీడియో కాన్ఫరెన్స్‌ల సమాచారం ముందుగానే తెలుస్తుంది.
డిజిటల్ వ్యవసాయ మిషన్‌లో భాగం: ఈ కార్యక్రమం కేంద్ర ప్రభుత్వం ప్రతిష్టాత్మకంగా చేపట్టిన ‘డిజిటల్ అగ్రికల్చర్ మిషన్’ లక్ష్యాలకు అనుగుణంగా ఉంది. ఇప్పటికే కేంద్రం రూ.2,817 కోట్లతో ఈ మిషన్‌కు ఆమోదం తెలిపింది. దీనిలో భాగంగా ‘అగ్రిస్టాక్’ పేరుతో బృహత్తర డేటాబేస్‌ను రూపొందిస్తున్నారు. 2026-27 నాటికి దేశవ్యాప్తంగా 11 కోట్ల మంది రైతులకు డిజిటల్ గుర్తింపు కార్డులు ఇవ్వాలనే లక్ష్యంతో కేంద్రం పనిచేస్తోంది. రాష్ట్ర ప్రభుత్వ వాట్సాప్ ఛానల్ ఈ బృహత్తర లక్ష్యం దిశగా వేసిన ఒక ముఖ్యమైన అడుగు.
మొత్తం మీద, ఈ వాట్సాప్ ఛానల్ ద్వారా రైతులకు సమయానుకూలమైన, నమ్మకమైన సమాచారం అంది, వ్యవసాయంలో ఉత్పాదకత పెరిగి, వారి ఆదాయం రెట్టింపు కావడానికి దోహదపడుతుందని అధికారులు ఆశాభావం వ్యక్తం చేస్తున్నారు.
