Kodandaram-Azharuddin:తెలంగాణ రాజకీయాల్లో మరోసారి గవర్నర్ కోటా ఎమ్మెల్సీ నియామకాలు చర్చకు వచ్చాయి. సుప్రీంకోర్టు ఇచ్చిన తాజా మార్గదర్శకాల తరువాత రాష్ట్ర కేబినెట్ ఈ విషయంపై కొత్త నిర్ణయం తీసుకుంది. శుక్రవారం జరిగిన కేబినెట్ సమావేశంలో గవర్నర్ కోటా ఎమ్మెల్సీలుగా ప్రొఫెసర్ కోదండరాం మరియు మాజీ క్రికెటర్ అజారుద్దీన్ పేర్లను ఆమోదించింది. గతంలో అమీర్ అలీ ఖాన్ కు అవకాశం ఇచ్చిన ప్రభుత్వం ఈసారి అతని స్థానంలో అజారుద్దీన్‌ను ఎంపిక చేసింది.
మధ్యంతర ఉత్తర్వులు..
ఈ పరిణామానికి ముఖ్యకారణం సుప్రీంకోర్టులో కొనసాగుతున్న కేసే. 2024 ఆగస్టులో బీఆర్‌ఎస్‌ నేతలు దాసోజు శ్రవణ్, కుర్ర సత్యనారాయణ కోదండరాం, అమీర్ అలీ ఖాన్ నియామకాన్ని సవాలు చేస్తూ పిటిషన్ దాఖలు చేశారు. ఆ పిటిషన్‌ను విచారించిన సుప్రీంకోర్టు 2025 ఆగస్టు 13న మధ్యంతర ఉత్తర్వులు ఇచ్చింది. అప్పటి వరకు జరిగిన నియామకాలపై స్టే విధిస్తూ, 2024 ఆగస్టు 14న ఇచ్చిన తన మధ్యంతర ఆదేశాలను ఉల్లంఘించే చర్యలు తీసుకుంటే అవి చెల్లవని హెచ్చరించింది.
గవర్నర్ కోటా ఎమ్మెల్సీల..
అయితే తుది తీర్పు వెలువడే వరకు తీసుకునే అన్ని నిర్ణయాలు కోర్టు ఆదేశాలకు లోబడి ఉంటాయని స్పష్టతనిచ్చింది. అలాగే కేసు తదుపరి విచారణను 2025 సెప్టెంబర్ 17కు వాయిదా వేసింది. ఈ పరిణామాల నడుమ మళ్లీ గవర్నర్ కోటా ఎమ్మెల్సీల అంశం కేబినెట్ ముందుకు రావడంతో రెండు పేర్లను మరోసారి ఖరారు చేసింది.
జూబ్లీహిల్స్ ఉప ఎన్నికలు…
కోదండరాం పేరు కొనసాగించగా, అమీర్ అలీ ఖాన్ స్థానంలో అజారుద్దీన్ ను ఎంపిక చేయడం ప్రత్యేకంగా గమనించదగ్గ విషయం. అజారుద్దీన్ ఎంపిక వెనుక జూబ్లీహిల్స్ ఉప ఎన్నికలు కీలకంగా ఉన్నాయని రాజకీయ వర్గాలు భావిస్తున్నాయి. కాంగ్రెస్ తరపున జూబ్లీహిల్స్ నియోజకవర్గంలో ఉప ఎన్నిక జరగనున్న నేపథ్యంలో అజారుద్దీన్‌ను ఎమ్మెల్సీగా నియమించడం ఆ పార్టీ వ్యూహాత్మక నిర్ణయంగా చెప్పబడుతోంది.
అజారుద్దీన్ ప్రభావం..
జూబ్లీహిల్స్ నియోజకవర్గంలో అజారుద్దీన్ ప్రభావం ఉండటంతో, ఉప ఎన్నికలో కొత్త అభ్యర్థిని రంగంలోకి దించాలని కాంగ్రెస్ ఆలోచనలో ఉంది. అజారుద్దీన్‌కు ఎమ్మెల్సీ అవకాశం ఇవ్వడం ద్వారా కాంగ్రెస్ ఒకవైపు స్థానిక సమీకరణాలను సమతుల్యం చేస్తూనే, మరోవైపు ఉప ఎన్నికలో పోటీ చేసే అభ్యర్థికి అనుకూల వాతావరణాన్ని కల్పించవచ్చని విశ్లేషణలు వినిపిస్తున్నాయి.
కేబినెట్ సిఫారసులో..
ప్రొఫెసర్ కోదండరాం పేరు కేబినెట్ సిఫారసులో కొనసాగడం కూడా ప్రాధాన్యం సంతరించుకుంది. ఉద్యమ నాయకుడిగా ప్రసిద్ధి చెందిన కోదండరాం, రాష్ట్ర రాజకీయాల్లో ఎప్పటికప్పుడు చురుకుగా వ్యవహరిస్తూ ఉంటారు. ఆయనను మళ్లీ గవర్నర్ కోటా ఎమ్మెల్సీగా కొనసాగించాలని ప్రభుత్వం నిర్ణయించడం ఆయన పాత్రకు ఉన్న ప్రాధాన్యాన్ని సూచిస్తోంది.
అయితే ఈ నియామకాలపై తుది మాట మాత్రం సుప్రీంకోర్టుకే చెందనుంది. కోర్టు తుది తీర్పు ఇచ్చే వరకు ఈ నియామకాలు చట్టపరమైన అనిశ్చితి మధ్య కొనసాగుతాయని స్పష్టమైంది. కోర్టు 2025 సెప్టెంబర్ 17న జరిగే విచారణలో తుది నిర్ణయం తీసుకునే అవకాశం ఉంది.
