Drug trafficking via smartphones in Telangana : యువత నరనరాల్లో మత్తుమందును ఎక్కించి వారి భవిష్యత్తును చిదిమేస్తున్న మాదకద్రవ్యాల ముఠాలు తమ పంథాను మార్చాయి. ఒకప్పుడు చీకటి గదుల్లో, రహస్య ప్రదేశాల్లో సాగే ఈ దందా.. ఇప్పుడు మనందరి చేతుల్లో ఉండే స్మార్ట్‌ఫోన్‌నే వేదికగా చేసుకుంది. వాట్సాప్‌ గ్రూపుల్లోనే ఆర్డర్లు.. సంకేత భాషలో డెలివరీ పాయింట్లు.. పోలీసుల కళ్లుగప్పి సాగుతున్న ఈ ‘స్మార్ట్’ దందా కామారెడ్డి జిల్లాలో గుట్టుచప్పుడు కాకుండా విస్తరిస్తోంది.
యాప్‌లే అడ్డా.. గ్రూపులే వేదిక : మత్తు పదార్థాల విక్రయాలకు స్మార్ట్‌ఫోన్లను వినియోగించే యువతే ఈ ముఠాల ప్రధాన లక్ష్యం. వారిని ఆకర్షించి, ప్రత్యేకంగా యాప్‌లలో గ్రూపులను ఏర్పాటు చేస్తున్నారు. ఆ గ్రూపుల్లోనే కొత్తగా వచ్చిన సరుకు వివరాలు, వాటి ధరలను గుట్టుగా చేరవేస్తున్నారు. ఆసక్తి ఉన్నవారు వ్యక్తిగత మెసేజ్‌ల ద్వారా ఆర్డర్లు ఇస్తున్నారు. అనంతరం, ఫోన్ కాల్స్ లేదా మెసేజ్‌ల రూపంలోనే ఎక్కడికి రావాలి? ఎక్కడ సరుకు తీసుకోవాలి? అనే వివరాలను పంపిస్తున్నారు. ఓ వైపు పోలీస్, ఆబ్కారీ శాఖల అధికారులు విస్తృత తనిఖీలు చేపడుతున్నప్పటికీ, వీరు సాంకేతికతను అడ్డుపెట్టుకుని చాటుగా తమ దందాను నడిపిస్తున్నారు.
కామారెడ్డిలో కలకలం రేపిన ఘటనలు :
యాష్‌ ఆయిల్‌ కేసు: కొద్ది కాలం క్రితం కామారెడ్డి శివారు క్యాసంపల్లిలో ద్రవరూప గంజాయి (యాష్‌ ఆయిల్‌)ను పోలీసులు పట్టుకున్నారు. నిందితుల విచారణలో వారు స్మార్ట్‌ఫోన్లు, సోషల్ మీడియాను వాడి విక్రయాలు జరుపుతున్నట్లు స్పష్టమైంది.
కౌన్సెలింగ్‌: జిల్లా కేంద్రంలో 4 నెలల కిందట పట్టుబడిన గంజాయి విక్రేతల సెల్‌ఫోన్లు పరిశీలించగా షాకింగ్ విషయాలు బయటపడ్డాయి. ఫోన్ నంబర్లు, మెసేజ్‌లు, సోషల్ మీడియా గ్రూపుల ద్వారా పెద్ద ఎత్తున యువకులకు గంజాయి సమాచారాన్ని చేరవేస్తున్నట్లు తేలింది. పోలీసులు ఆ నెట్‌వర్క్‌లోని యువకులను పిలిపించి కౌన్సెలింగ్‌ ఇచ్చి పంపించారు.
దాడుల వెనుక మత్తు: ఈ నెలలో జిల్లా కేంద్రంలో జరిగిన కొన్ని దాడి ఘటనల్లో పట్టుబడిన యువకులు తీవ్రమైన మత్తులో ఉండి, విచక్షణ కోల్పోయి ప్రవర్తించినట్లుగా పోలీసులు గుర్తించారు.
మూలాలు ఎక్కడ?
కామారెడ్డి జిల్లాలోకి గంజాయి వంటి మత్తు పదార్థాలు పొరుగు రాష్ట్రాల నుంచి అక్రమంగా సరఫరా అవుతున్నాయి. ఇక్కడి స్థానికులు కొందరు, స్థానికేతరులతో చేతులు కలిపి ఈ అక్రమ దందాకు పాల్పడుతున్నారు. తెచ్చిన గంజాయిని సిగరెట్లు, చిన్న పొట్లాలు, యాష్‌ ఆయిల్‌ రూపాల్లో మార్చి అధిక ధరలకు అమ్ముతున్నారు. మత్తుకు బానిసలైన యువత విచక్షణ కోల్పోయి నేరాల బారిన పడుతున్నారు. కొన్ని ప్రాంతాల్లో గుడుంబా, నాటు సారా వంటివి కూడా యువతను నిర్వీర్యం చేస్తున్నాయి.
నిరంతర నిఘా ఉంచాం: ఎస్పీ : “గంజాయి, డ్రగ్స్ వంటి మత్తు పదార్థాల అక్రమ రవాణా, వాడకాలపై నిరంతరం నిఘా కొనసాగిస్తున్నాం,” అని జిల్లా ఎస్పీ రాజేశ్ చంద్ర స్పష్టం చేశారు. “జిల్లా వ్యాప్తంగా రవాణాను కట్టడి చేసేందుకు ప్రత్యేక వ్యవస్థను అప్రమత్తం చేశాం. మత్తు పదార్థాల జోలికి వెళ్తే ఎంతటివారినైనా వదిలిపెట్టే ప్రసక్తే లేదు,” అని ఆయన తీవ్రంగా హెచ్చరించారు.
అయితే, రాష్ట్రవ్యాప్తంగా పోలీసులు, ప్రభుత్వం ఎన్ని కఠిన చర్యలు తీసుకుంటున్నా, డ్రగ్స్ ముఠాలు కొత్త మార్గాలను అన్వేషిస్తూనే ఉండటం ఆందోళన కలిగిస్తోంది. ఇటీవల హైదరాబాద్‌లో మైనర్‌తో డ్రగ్స్ సరఫరా చేయిస్తున్న ఘటన, ఫార్మా కంపెనీ మాటున మత్తు పదార్థాలు తయారు చేస్తున్న ముఠా గుట్టురట్టు కావడం వంటి ఘటనలు ఈ సమస్య తీవ్రతకు అద్దం పడుతున్నాయి. పోలీసులు, ఆబ్కారీ శాఖలు మరింత సమన్వయంతో పనిచేసి ఈ డిజిటల్ డ్రగ్ నెట్‌వర్క్‌పై ఉక్కుపాదం మోపాల్సిన అవసరం ఎంతైనా ఉంది.
