Today Rain In TG: రాష్ట్రంలో నేడు కూడా భారీ నుంచి అతి భారీ వర్షాలు కురుస్తాయని హైదరాబాద్ వాతావరణ శాఖ అధికారులు తెలిపారు. కరీంనగర్, సిరిసిల్ల, సిద్దిపేట, ములుగు, భూపాలపల్లి, భద్రాద్రి – కొత్తగూడెంతో సహా ఈశాన్య తీరప్రాంతాలకు రెడ్ అలెర్ట్ జారీ చేశారు. ఆయా ప్రాంతాల్లో ఇప్పటికే చీకటి వాతావరణం నెలకొని ఉందన్నారు. మిగతా ప్రాంతాల్లో కూడా సాయంత్రం నుంచి రాత్రి సమయంలో మోస్తరు నుండి భారీ వర్షాలు కురుస్తాయన్నారు. నిన్న ఊహించినట్లుగానే, దక్షిణ తెలంగాణ జిల్లాల్లోని వివిధ ప్రాంతాల్లో మంచి వర్షపాతం నమోదైందని అన్నారు. నేడు కూడా ప్రజలు అప్రమత్తంగా ఉండాలని సూచనలు జారీ చేశారు.
హైదరాబాద్ లో:
నగరంలో ఇప్పటికే ముసురు వాతావరణం నెలకొని ఉంది. ఉదయం నుంచి చినుకులు పడుతూనే ఉన్నాయి. నగరం అంతటా రాబోయే 3 గంటల పాటు తేలికపాటి వర్షాలు కురుస్తాయని అధికారులు తెలిపారు.
గడిచిన 24 గంటల్లో:
గడిచిన 24 గంటల్లో ములుగులోని వెంకటాపురంలో 255మిల్లీమీటర్ల భారీ వర్షపాతం నమోదైంది. కరీంనగర్, మంచిర్యాల, పెద్దపల్లి, భూపాలపల్లి, వరంగల్, భద్రాద్రి – కొత్తగూడెం, ఖమ్మం, సూర్యాపేటలో కూడా భారీ వర్షాలు కురిశాయి. నేడు కూడా ఈ ప్రాంతాల్లో భారీ వర్షాలు కురుస్తాయని అంచనా వేశారు హైదరాబాద్ వాతావరణ శాఖ అధికారులు.గత కొన్ని వారాలుగా రాష్ట్రంలో చెప్పుకోదగ్గ వర్షాలు లేవన్న విషయం మీకు తెలిసిందే. వర్షాలు పడాల్సిన సమయంలో మాన్ సూన్ కు బ్రేక్ పడటం కాస్త నిరాశకు గురి చేసిందనే చెప్పాలి. అయితే వాతావరణ శాఖ అధికారులు సూచించినట్లే నేటి మళ్ళీ భారీ వర్షాలు కురుస్తాయని ప్రస్తుత వాతావరణ పరిస్థితులు చూసి చెప్పవచ్చు. రాష్ట్రంలో వర్షపు లోటు కొంతవరకు తీరినా.. ఇంకా తీరాల్సిన అవసరం చాలా ఉందని హైదరాబాద్ వాతావరణ కేంద్రం అభిప్రాయ పడింది.
తెలంగాణలో జూన్ మొదటి వారంలోనే రుతుపవనాలు ప్రవేశించినప్పటికీ, వాటి ప్రభావం అంతగా లేదు. ప్రస్తుతం నెలకొన్న వాతావరణ పరిస్థితులు రుతుపవనాలు చురుకుగా మారడానికి అనుకూలంగా ఉన్నాయని వాతావరణ నిపుణులు చెబుతున్నారు. రాష్ట్రవ్యాప్తంగా వర్షాలు విస్తరించి, రైతాంగానికి ఉపశమనం కలిగించే అవకాశం ఉంటుందని ఇప్పటికే వాతావరణ కేంద్రం తెలిపింది.
