Rains in telangana today: రాష్ట్రంలో నేడు కూడా వర్షాలు కురిసే అవకాశం ఉందని వాతావరణ శాఖ తెలిపింది. అల్పపీడనం ప్రభావం వల్ల అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉంది. కొన్ని చోట్ల ఉరుములు, మెరుపులతో కూడిన భారీ వర్షాలు కూడా కురవవచ్చు. కాబట్టి ప్రజలు అప్రమత్తంగా ఉండాలని అధికారులు సూచిస్తున్నారు. లోతట్టు ప్రాంతాల ప్రజలు జాగ్రత్తగా ఉండాలని హెచ్చరించారు.
రెడ్ అలర్ట్ (అతి భారీ వర్షాలు): భద్రాద్రి కొత్తగూడెం, మహబూబాబాద్, ములుగు, హనుమకొండ, వరంగల్ జిల్లాల్లో అత్యంత భారీ వర్షాలు కురిసే అవకాశం ఉంది.
ఆరెంజ్ అలర్ట్ (భారీ నుంచి అతి భారీ వర్షాలు): ఆదిలాబాద్, జనగాం, జయశంకర్ భూపాలపల్లి, ఖమ్మం, కొమురం భీం ఆసిఫాబాద్, మంచిర్యాల, పెద్దపల్లి, సిద్దిపేట, సూర్యాపేట జిల్లాలకు ఈ హెచ్చరిక జారీ చేయబడింది.
ఎల్లో అలర్ట్ (భారీ వర్షాలు): జగిత్యాల, కామారెడ్డి, కరీంనగర్, మెదక్, నల్గొండ, నిర్మల్, నిజామాబాద్, రాజన్న సిరిసిల్ల, సంగారెడ్డి, వికారాబాద్, యాదాద్రి భువనగిరి జిల్లాల్లో భారీ వర్షాలు కురిసే అవకాశం ఉంది.
ఈ హెచ్చరికల నేపథ్యంలో ప్రజలు అప్రమత్తంగా ఉండాలని, అత్యవసరమైతే తప్ప ప్రయాణాలు చేయవద్దని అధికారులు సూచిస్తున్నారు.
తెలంగాణలో నిన్న అనేక జిల్లాల్లో భారీ వర్షాలు కురిశాయి. నిన్న ఉరుములు, మెరుపులతో కూడిన వర్షం వల్ల ప్రజలు ఇబ్బందులు పడ్డారు. ముఖ్యంగా హైదరాబాద్‌ నగరంలో నిన్న సాయంత్రం కురిసిన వర్షం వల్ల రోడ్లపై నీరు నిలిచిపోయింది. దీంతో ట్రాఫిక్ జామ్ అయ్యి వాహనదారులు, ప్రయాణికులు తీవ్ర ఇబ్బందులు ఎదుర్కొన్నారు. రాష్ట్రంలోని పలు లోతట్టు ప్రాంతాలు జలమయం అయ్యాయి.
మెదక్, సంగారెడ్డి, ఆదిలాబాద్, యాదాద్రి భువనగిరి, కామారెడ్డి, నిజామాబాద్, హైదరాబాద్‌తో పాటు పలు జిల్లాల్లో భారీ వర్షాలు కురిశాయి.
మెదక్ జిల్లా తూప్రాన్ మండలంలోని ఇస్లాంపూర్‌లో అత్యధికంగా 17.9 సెం.మీ. వర్షపాతం నమోదైంది.
సంగారెడ్డి జిల్లా కంగ్టిలో 17 సెం.మీ. వర్షం కురిసింది.
హైదరాబాద్‌లో పటాన్ చెరు, లింగంపల్లి, మాదాపూర్, చందానగర్, మియాపూర్, కూకట్‌పల్లి, ఉప్పల్, మల్లాపూర్, మూసాపేట్ వంటి ప్రాంతాల్లో భారీ వర్షాలు కురిశాయి.
