తెలంగాణ మంత్రులు, ఎమ్మెల్యేలు, అధికారుల బృందం సౌత్ కొరియా దేశ పర్యటనలో ఉన్న విషయం తెలిసిందే. అందులో భాగంగా తెలంగాణ శాసన బృందం (TG Legislative Delegation) ఈరోజు సియోల్ నగరం లోని హన్, చియాంగీచాన్ నదులను సందర్శించింది.
సియోల్ నగరం మద్య నుండి ప్రవహించే హన్ నది గతంలో మురికిగా కాలుష్యంతో ఉండేది. ఇరవై సంవత్సరాల క్రితం ప్రభుత్వం నదిని శుద్ధి చేసి పరిసరాలను సుందరంగా తీర్చిదిద్ది, మౌళిక వసతులు కల్పించింది. దీంతో ఈ ప్రాంతం పర్యాటక ప్రదేశంగా మారిందని స్థానిక అధికారులు శాసన బృందానికి (TG Legislative Delegation) వివరించారు.
అలాగే, చియాంగీచాన్ నది వెంట మౌళిక వసతులు ఏర్పాటు చేయడంతో పర్యాటకం బాగా అభివృద్ధి చెందిందని స్థానిక ప్రజలు, వ్యాపారులు తెలంగాణ శాసన బృందానికి తెలిపారు.
సియోల్ లోని హాన్ నదికి హైదరాబాద్ లోని మూసి నదికి పరిస్థితులు ఒకే విదంగా ఉన్నాయని తెలంగాణ నేతలు అభిప్రాయపడ్డారు. రాష్ట్ర ప్రభుత్వం సంకల్పించిన మూసి పునరుజ్జీవనం, సుందరీకరణ పూర్తయితే మూసీ నది కూడా పరిశుభ్రంగా మారడంతో పాటుగా హైదరాబాద్ నగరానికి పర్యాటక ప్రదేశంగా మారుతుందని స్పీకర్ ప్రసాద్ కుమార్ అభిప్రాయాన్ని వ్యక్తం చేశారు.
కాగా, తెలంగాణ శాసన బృందం ఆస్ట్రేలియా లోని సిడ్నీలో జరిగిన 67వ కామన్వెల్త్ పార్లమెంటరీ అసోసియేషన్ (CPA) కాన్ఫరెన్స్ లో పాల్గొన్న అనంతరం కామన్వెల్త్ దేశాలలో స్టడీ టూర్ లలో భాగంగా న్యూజిలాండ్, జపాన్ దేశాలలో పర్యటించి దక్షిణ కొరియా చేరుకున్న విషయం తెలిసిందే.
ఈ టూర్ లో తెలంగాణ రాష్ట్ర శాసన సభాపతి గడ్డం ప్రసాద్ కుమార్, శాసనమండలి చైర్మన్ గుత్తా సుఖేందర్ రెడ్డి, డిప్యూటీ చైర్మన్ బండా ప్రకాష్ ముదిరాజ్, లేజిస్లేచర్ సెక్రటరీ డా. వి నరసింహా చార్యులు పాల్గొన్నారు.