Today Rain In TG: తెలంగాణలో నేడు భారీ వర్షాలు కురుస్తాయని హైదరాబాద్ వాతావరణ శాఖ అధికారులు తెలిపారు. కొమరం భీమ్ ఆసిఫాబాద్, ఆదిలాబాద్, నిర్మల్ జిల్లాల ప్రజలు అప్రమత్తంగా ఉండాలని సూచించారు. వీటితో పాటు నిజామాబాద్, మంచిర్యాల జిల్లాలకు కూడా ఎల్లో అలెర్ట్ జారీ చేశారు.
ఉత్తర తెలంగాణ జిల్లాల్లో నిన్న భారీ వర్షాలు కురుస్తాయని వేసిన అంచనాలు చాలా చోట్ల తల కిందులయ్యాయి. అయితే నేడు వర్షాలు కురిసే ప్రాంతాల్లో ప్రజలు అప్రమత్తంగా ఉండాలని కోరారు. ఇతర ప్రాంతాల్లో సాయంత్రం నుంచి రాత్రి వరకు అడపాదడపా వర్షాలు పడతాయని అన్నారు. హైదరాబాద్ తో పాటు పరిసర ప్రాంతాల్లో వాతావరణం నిన్నటిలాగే మధ్యాహ్నం వరకు పొడిగా ఉంటుందని.. ఆ తర్వాత సాయంకాలం నుండి రాత్రి వరకు స్వల్ప వర్షాలు కురుస్తాయని వాతావరణ కేంద్రం తెలిపింది.
గత 3 రోజులతో పోలిస్తే, నేడు సాయంత్రం సమయంలో రాష్ట్రంలోని అనేక ప్రాంతాల్లో మోస్తరు వర్షాలు కురిసే అవకాశాలు ఎక్కువగా ఉన్నాయని అధికారులు వెల్లడించారు. మధ్యాహ్నం, రాత్రి సమయాల్లో మాత్రం వాతావరణం పొడిగానే ఉంటుందని అన్నారు.
గడిచిన 24 గంటల్లో:
ముందుగా అంచనా వేసినట్లుగానే హైదరాబాద్ నగరంలో ముసురు వర్షాలు కురిసాయి. సిద్ధిపేట, రంగారెడ్డి, మహబూబ్ నగర్, నారాయణపేట, యాదాద్రి, నల్గొండ, సిరిసిల్ల, కరీంనగర్, జనగాంలలో కూడా సాయంత్రం నుంచి రాత్రి వేళల్లో అక్కడక్కడ మోస్తరు వర్షాలు కురిసాయి.
తెలంగాణలో జూన్ మొదటి వారంలోనే రుతుపవనాలు ప్రవేశించినప్పటికీ, వాటి ప్రభావం అంతగా లేదు. ప్రస్తుతం నెలకొన్న వాతావరణ పరిస్థితులు రుతుపవనాలు చురుకుగా మారడానికి అనుకూలంగా ఉన్నాయని వాతావరణ నిపుణులు చెబుతున్నారు. రాష్ట్రవ్యాప్తంగా వర్షాలు విస్తరించి, రైతాంగానికి ఉపశమనం కలిగించే అవకాశం ఉంటుందని ఇప్పటికే వాతావరణ కేంద్రం తెలిపింది.
