Today Rain in tg: రాష్ట్రంలో నేడు భారీ నుంచి అతి భారీ వర్షాలు కురుస్తాయని హైదరాబాద్ వాతావరణ శాఖ అధికారులు తెలిపారు. తూర్పు, ఉత్తర తెలంగాణ జిల్లాల్లోని కొన్ని ప్రాంతాల్లో సాయంత్రం నుంచి రేపు తెల్లవారు జాము వరకు భారీ వర్షాలు కురుస్తాయన్నారు. వికారాబాద్, సంగారెడ్డి, రంగారెడ్డి, మహబూబ్ నగర్, కామారెడ్డి, సిరిసిల్ల, రంగారెడ్డిలలో భారీ వర్షాలు పడతాయని.. ఇక హైదరాబాద్ లో సాయంత్రం నుంచి రాత్రి సమయంలో మోస్తరు నుండి భారీ వర్షాలు కురుస్తాయన్నారు. అయితే చాలా ప్రాంతాల్లో మధ్యాహ్నం వరకు పెద్దగా వర్షాలు ఉండవన్నారు. వాతావరణం మాత్రం కొన్ని ప్రాంతాల్లో మేఘావృతమై ఉంటే, మరికొన్ని ప్రాంతాల్లో పొడిగా ఉంటుందన్నారు. నేడు మధ్యాహ్నం వరకు ఎండ కొనసాగిన సాయంకాలం వరకు ఉరుములతో కూడిన వర్షాలు పడతాయని అన్నారు. నిన్న ఊహించినట్లుగానే, దక్షిణ తెలంగాణ జిల్లాల్లోని వివిధ ప్రాంతాల్లో మంచి వర్షపాతం నమోదైందని అన్నారు. నేడు కూడా ప్రజలు అప్రమత్తంగా ఉండాలని సూచనలు జారీ చేశారు.
గడిచిన 24 గంటల్లో:
నిన్న హైదరాబాద్ నగరంలో పశ్చిమ, దక్షిణ, తూర్పు, ఉత్తర శివార్లలో భారీ వర్షాలు కురిశాయి. సంగారెడ్డి, వికారాబాద్, రంగారెడ్డి, మహబూబ్‌నగర్, నారాయణపేట, గద్వాల్, వనపర్తి, నాగర్‌కర్నూల్‌, ఖమ్మం, భద్రాద్రి – కొత్తగూడెం, జగిత్యాల, సిరిసిల్ల, సిద్దిపేట, నిజామాబాద్‌లో మోస్తరు నుండి భారీ వర్షాలు కురిసాయి. నిర్మల్, జగిత్యాల, మంచిర్యాల, పెద్దపల్లి, భూపాలపల్లి, మహబూబాబాద్, ములుగు, వరంగల్, కరీంనగర్‌లోని కొన్ని ప్రాంతాల్లో అక్కడక్కడా మోస్తరు వర్షాలు కురిసాయి. గత కొన్ని వారాలుగా రాష్ట్రంలో చెప్పుకోదగ్గ వర్షాలు లేవన్న విషయం మీకు తెలిసిందే. వర్షాలు పడాల్సిన సమయంలో మాన్ సూన్ కు బ్రేక్ పడటం కాస్త నిరాశకు గురి చేసిందనే చెప్పాలి. అయితే వాతావరణ శాఖ అధికారులు సూచించినట్లే నేటి మళ్ళీ భారీ వర్షాలు కురుస్తాయని ప్రస్తుత వాతావరణ పరిస్థితులు చూసి చెప్పవచ్చు. రాష్ట్రంలో వర్షపు లోటు కొంతవరకు తీరినా.. ఇంకా తీరాల్సిన అవసరం చాలా ఉందని హైదరాబాద్ వాతావరణ కేంద్రం అభిప్రాయ పడింది.
