RTC Driver| ఆర్టీసీ బస్సులో ప్రయాణికుల ఆభరణాలు డ్రైవర్ దొంగలించిన ఘటన చర్చనీయాంశంగా మారింది. అసలు ఏం జరిగిందంటే.. వరంగల్ నుంచి ఓ మహిళ నిజామాబాద్‌కు ఆర్టీసీ బస్సులో వెళ్తోంది. అయితే తన బంగారు ఆభరణాలు ఉన్న బ్యాగ్‌ను ఆ మహిళ డ్రైవర్ సీటు వెనకాల పెట్టింది. ఆ బ్యాగ్‌పై కన్నేసిన బస్సు డ్రైవర్ బంగారు ఆభరణాలను దొంగలించాడు. అయితే డ్రైవర్ ఆభరణాలను దొంగలించడాన్ని ఓ ప్రయాణికుడు ఫోన్‌లో రికార్డ్ చేశాడు. దీంతో ఆగ్రహించిన తోటి ప్రయాణికులు డ్రైవర్‌ను ప్రశ్నించగా.. తొలుత తాను దొంగతనం చేయలేదంటూ బుకాయించాడు. తర్వాత వీడియో చూపించడంతో తానే ఆభరణాలు దొంగలించానని ఒప్పుకున్నాడు. దీంతో సదరు డ్రైవర్‌పై చర్యలు తీసుకోవాలని ప్రయాణికులు డిమాండ్ చేస్తున్నారు.
కాగా సాధారణంగా ఆర్టీసీ బస్సుల్లో ప్రయాణికులు మరిచిపోయిన లగేజీ బ్యాగులను కొంతమంది బస్సు డ్రైవర్లు, కండక్టర్లు నిజాయితీగా పోలీసులకు అప్పగిస్తూ ఉంటారు. కానీ ప్రయాణికుల లగేజీకి భద్రత కల్పించాల్సిన డ్రైవరే ఇలాంటి ఘటనకు పాల్పడటంతో ప్రయాణికులు తీవ్ర ఆగ్రహం వ్యక్తంచేస్తున్నారు. ఈ డ్రైవర్‌పై పోలీసు కేసు నమోదుచేసి కఠిన చర్యలు తీసుకోవాలని కోరుతున్నారు.