Navy Jobs-India:భారత నౌకాదళం రాబోయే 2026 జూన్‌లో ప్రారంభమయ్యే షార్ట్ సర్వీస్ కమిషన్ కోర్సు కోసం కొత్తగా 260 ఖాళీలను భర్తీ చేయడానికి దరఖాస్తులు ఆహ్వానిస్తోంది. ఈ నియామకాల కోసం ఆన్‌లైన్‌లో నమోదు ప్రక్రియ ఇప్పటికే ప్రారంభమైందని, ఆసక్తి ఉన్న అభ్యర్థులు 2024 సెప్టెంబర్ 1 లోపు తమ దరఖాస్తులు సమర్పించాలని నేవీ అధికారిక ప్రకటనలో వెల్లడించింది.

పలు విభాగాలలో..

ఈ పోస్టులు నేవీకి చెందిన పలు విభాగాలలో భర్తీ చేయడం జరుగుతోంది. ప్రతి విభాగానికి అవసరమైన విద్యార్హతలు వేర్వేరుగా ఉన్నప్పటికీ, ఎక్కువ భాగం పోస్టులకు కనీసం 60 శాతం మార్కులతో సంబంధిత డిగ్రీ లేదా పీజీ అర్హత తప్పనిసరి. ఇంజనీరింగ్ విభాగాలకు బీటెక్, ఎంఈ, ఎంఎంటెక్, కంప్యూటర్ సంబంధిత విభాగాలకు ఎంసీఏ లేదా ఎంఎస్సీ (ఐటీ), శాస్త్ర విభాగాలకు బీఎస్సీ, వాణిజ్య విభాగాలకు బీకాం, న్యాయ విభాగానికి లా డిగ్రీ, మేనేజ్‌మెంట్ విభాగాలకు ఎంబీఏ వంటి అర్హతలు అవసరమని సమాచారం. అదేవిధంగా మాస్ కమ్యూనికేషన్ లేదా పీజీ డిప్లొమా కలిగిన వారికి కూడా కొన్ని విభాగాల్లో అవకాశం ఉంది.

ఇంటర్వ్యూ..

ప్రత్యేకంగా గమనించాల్సిన విషయం ఏమిటంటే, ఈ నియామకాల కోసం ఎటువంటి రాత పరీక్ష నిర్వహించారు. అభ్యర్థుల ఎంపిక పూర్తిగా వారి అకడమిక్ రికార్డుపైనే ఆధారపడి ఉంటుంది. అర్హులైన అభ్యర్థులను ముందుగా షార్ట్‌లిస్ట్ చేసి, తర్వాత వారికి ఇంటర్వ్యూ నిర్వహిస్తారు. ఇంటర్వ్యూ తర్వాత డాక్యుమెంట్ వెరిఫికేషన్, వైద్య పరీక్షలు జరుగుతాయి. ఈ అన్ని దశలను పూర్తిచేసిన తర్వాతే తుది ఎంపిక జాబితా ప్రకటించబడుతుంది.

ఎంపికైన వారికి మొదట ఇండియన్ నావల్ అకాడమీ (INA)లో శిక్షణ ఇస్తారు. శిక్షణ కాలం విజయవంతంగా పూర్తి చేసిన తర్వాత వారికి సబ్ లెఫ్టినెంట్ హోదా కేటాయించి విధుల్లోకి నియమిస్తారు. ఈ హోదాలో వారికి ప్రారంభ జీతంగా నెలకు సుమారు రూ.1,10,000 అందుతుంది.

Also Read: https://teluguprabha.net/career-news/appsc-job-notifications-in-three-departments-and-ntr-health-university-verification-dates/

ప్రస్తుతం చివరి సంవత్సరం చదువుతున్న విద్యార్థులు కూడా ఈ పోస్టులకు దరఖాస్తు చేసుకోవచ్చు. అయితే, వారు తుది ఎంపికకు రావడానికి ముందు తమ డిగ్రీ సర్టిఫికెట్లు సమర్పించాలి. ఎన్‌సీసీ ‘సి’ సర్టిఫికేట్ కలిగిన వారికి ఎంపికలో అదనంగా 5 శాతం మార్కుల సడలింపు లభిస్తుంది, ఇది వారి పోటీ అవకాశాలను మరింత పెంచుతుంది.

దరఖాస్తు చేసుకోవాలనుకునే వారు నేవీ అధికారిక వెబ్‌సైట్‌ను సందర్శించి, అందులో ఉన్న ఆన్‌లైన్ ఫారం ద్వారా తమ వివరాలు నమోదు చేయాలి. దరఖాస్తు సమయంలో విద్యార్హతలు, జననతేదీ, గుర్తింపు ఆధారాలు, ఫోటోలు, సంతకం వంటి పత్రాలను స్కాన్ చేసి అప్లోడ్ చేయాలి. అన్ని వివరాలు సరిగా నింపిన తర్వాత మాత్రమే సమర్పణ చేయాలి, ఎందుకంటే తప్పుగా ఇచ్చిన సమాచారం వల్ల దరఖాస్తు తిరస్కరించే అవకాశం ఉంటుంది.