Lipstick Health Risks : పెదవులకు కాస్త రంగు అద్దుకుంటే ఆ అందమే వేరు! అందుకే మహిళల మేకప్ కిట్‌లో లిప్‌స్టిక్‌కు ఎప్పుడూ ప్రత్యేక స్థానం ఉంటుంది. ఆకర్షణీయంగా కనిపించడం కోసం రోజూ వాడే ఈ చిన్న సౌందర్య సాధనం వెనుక ఓ పెద్ద ఆరోగ్య ప్రమాదం దాగి ఉందని మీకు తెలుసా..? అప్పుడప్పుడు వాడితే ఫర్వాలేదు కానీ, రోజూ లిప్‌స్టిక్‌ను పెదవులకు పూసుకుంటే ఊపిరితిత్తుల క్యాన్సర్ వంటి భయంకరమైన వ్యాధుల బారిన పడే అవకాశం ఉందని తాజా అధ్యయనాలు హెచ్చరిస్తున్నాయి. అందంగా కనిపించడం కోసం వాడే ఈ లిప్‌స్టిక్‌లో దాగి ఉన్న ఆరోగ్య రహస్యాలేంటి..? రోజూ వాడితే ఎలాంటి పరిణామాలను ఎదుర్కోవాల్సి వస్తుంది? నిపుణులు ఏం చెబుతున్నారో వివరంగా చూద్దాం.

లిప్‌స్టిక్‌లో దాగి ఉన్న విష రసాయనాలు : చాలా కంపెనీలు తయారుచేసే లిప్‌స్టిక్‌లలో కాడ్మియం, సీసం (లెడ్), క్రోమియం, అల్యూమినియం వంటి భార లోహాలను వాడుతున్నట్లు పలు పరిశోధనల్లో తేలింది. ఇవి మన ఆరోగ్యానికి తీవ్ర హాని కలిగిస్తాయి.

కాడ్మియం: దీన్ని పీల్చడం వల్ల ఊపిరితిత్తుల క్యాన్సర్ వచ్చే ప్రమాదం ఉందని, శ్వాసకోశ వ్యవస్థ దెబ్బతింటుందని ‘నేషనల్ మెడికల్ లైబ్రరీ ఆఫ్ మెడిసిన్’ అధ్యయనం స్పష్టం చేస్తోంది.

సీసం (లెడ్): ఇది ప్రధానంగా నాడీ వ్యవస్థపై తీవ్ర ప్రభావం చూపుతుంది. దీర్ఘకాలంలో శరీరంలో పేరుకుపోయి నరాల బలహీనత, సంతానలేమి సమస్యలకు దారితీస్తుంది.
క్రోమియం: దీనిని క్యాన్సర్ కారకంగా పరిగణిస్తారు. ఇది అధిక మోతాదులో శరీరంలోకి చేరితే ఊపిరితిత్తులు, జీర్ణవ్యవస్థపై ప్రతికూల ప్రభావం చూపుతుంది.

అల్యూమినియం: ఇది నేరుగా క్యాన్సర్‌ను కలిగించకపోయినా, దీని వాడకం ఇతర అనారోగ్య సమస్యలకు కారణమవుతుంది.

శరీరంలోకి ఎలా ప్రవేశిస్తాయి : ఈ హానికర రసాయనాలు మూడు మార్గాల్లో మన శరీరంలోకి ప్రవేశిస్తాయి. పెదవులపై ఉన్న పలుచని చర్మం ద్వారా నేరుగా శరీరంలోకి చేరతాయి. ఆహారం తినేటప్పుడు, నీళ్లు తాగేటప్పుడు లిప్‌స్టిక్‌లోని కొంత భాగం నోటి ద్వారా లోపలికి వెళ్తుంది. అంతేకాకుండా, లిప్‌స్టిక్ వేసుకున్నప్పుడు గాలిలోకి వెలువడే అతి సూక్ష్మ కణాలను శ్వాస ద్వారా పీల్చుకోవడం వల్ల కూడా ఈ లోహాలు శరీరంలో పేరుకుపోతాయి.

అధ్యయనాలు ఏం చెబుతున్నాయి : ‘ఎన్విరాన్‌మెంటల్ హెల్త్ పర్స్‌పెక్టివ్స్’లో ప్రచురించిన ఒక అధ్యయనం ప్రకారం, మార్కెట్లో లభించే వివిధ రకాల లిప్ ఉత్పత్తులను పరీక్షించగా, వాటిలో 75% ఉత్పత్తులలో సీసం ఉన్నట్లు కనుగొన్నారు. ఆందోళన కలిగించే విషయం ఏమిటంటే, పరీక్షించిన అన్ని బ్రాండ్లలోనూ కాడ్మియం ఆనవాళ్లు కనిపించాయి. క్రోమియం కూడా అనేక ఉత్పత్తులలో రోజువారీ తీసుకోవాల్సిన స్థాయిని మించి ఉన్నట్లు తేలింది. వీటిని రోజూ వాడటం వల్ల ఈ విషపూరిత లోహాలు శరీరంలో పేరుకుపోయి భవిష్యత్తులో తీవ్ర ఆరోగ్య సమస్యలకు దారితీస్తాయని ఈ పరిశోధన హెచ్చరించింది.

జాగ్రత్తలు తప్పనిసరి : లిప్‌స్టిక్‌ వాడకాన్ని పూర్తిగా మానేయాల్సిన అవసరం లేకపోయినా, కొన్ని జాగ్రత్తలు తీసుకోవడం ద్వారా ప్రమాదాన్ని తగ్గించుకోవచ్చని నిపుణులు సూచిస్తున్నారు.

నాణ్యమైనవి ఎంచుకోండి: “లెడ్ ఫ్రీ” (Lead-Free) లేదా “నాన్-టాక్సిక్” (Non-Toxic) అని లేబుల్ ఉన్న బ్రాండ్‌లను ఎంచుకోవడం ఉత్తమం.

వాడకాన్ని తగ్గించండి: రోజూ కాకుండా, కేవలం ప్రత్యేక సందర్భాల్లో మాత్రమే లిప్‌స్టిక్‌ను వాడండి. తినడానికి ముందు తప్పనిసరిగా లిప్‌స్టిక్‌ను తొలగించడం అలవాటు చేసుకోండి.
సహజ ప్రత్యామ్నాయాలు: బీట్‌రూట్ పొడి, కోకో బటర్ వంటి సహజ పదార్థాలతో ఇంట్లోనే లిప్ కలర్‌ను తయారుచేసుకోవడం సురక్షితమైన మార్గం. అందం ముఖ్యమే, కానీ ఆరోగ్యం అంతకంటే ముఖ్యం. కాబట్టి, ఇకపై లిప్‌స్టిక్‌ను కొనేటప్పుడు, వాడేటప్పుడు ఈ విషయాలను గుర్తుంచుకోవడం మనందరి ఆరోగ్యానికి శ్రేయస్కరం.