Monsoon Vs Health: వర్షాకాలం అంటే ప్రకృతి సౌందర్యాన్ని ఆస్వాదించాల్సిన సమయం అనిపిస్తుంది. కానీ, ఈ చల్లని మాసంలో ఆరోగ్యపరంగా కొన్ని సమస్యలు తలెత్తే అవకాశాలు ఎక్కువ. ముఖ్యంగా మానవ శరీరంలోని ముఖ్యమైన భాగాల్లో ఒకటైన ముక్కుపై ఈ కాలం వ్యాధులు ఎక్కువ ప్రభావం చూపడం సాధారణం. తేమ ఎక్కువగా ఉండటం, తడి గాలులు ముక్కులోని ఆంతరంగిక భాగాలను దెబ్బతీయడంతో ముక్కుకు సంబంధించిన సమస్యలు ఎక్కువవుతున్నాయి.
అలెర్జీ రినిటిస్…
ఈ కాలంలో అధికంగా కనిపించే సమస్యల్లో మొదటగా చెప్పుకోవాల్సింది అలెర్జీ రినిటిస్. వాతావరణంలోని ధూళి, ఫంగస్, పూత బాక్టీరియాల వల్ల ముక్కులో అలెర్జీ కలగడం ఓ సాధారణ పరిస్థితి. దీనివల్ల ముక్కు కారటం, తరచూ తుమ్ములు రావడం, కళ్లలో నుంచి నీరు రావడం కనిపించవచ్చు. ఈ సమస్యను నివారించడానికి గది ఎప్పుడూ పొడిగా ఉంచడం, బెడ్ షీట్లను ఎప్పటికప్పుడు ఉతకడం, తేమగా ఉండే ప్రాంతాలకు వెళ్లకుండా ఉండటం ముఖ్యం. అలాగే, వేడి ఆవిరిని తీసుకుంటుండాలి.దాని వల్ల బిగుసుకుపోయిన ముక్కులు ఫ్రీ అవుతాయి.
ముక్కు మూసుకుపోవడం..
ఇంకొక ప్రధానమైన సమస్య సైనస్ ఇన్ఫెక్షన్. ఇది ముక్కు మూసుకుపోవడం, తలనొప్పి, బుగ్గల భాగాల్లో ఒత్తిడి వంటి లక్షణాలతో కనిపిస్తుంది. వర్షాల సమయంలో చన్నీటి స్నానం చేయడం,ఎక్కువ సేపు తల తడిగా ఉంచడం వల్ల ఈ సమస్య మరింత ముదిరే అవకాశాలు కనపడుతున్నాయి.దీన్ని నియంత్రించాలంటే వేడి నీటిని తరచూ తాగడం, ఆవిరిని తీసుకోవడం, తల తడిగా ఉండకుండా చూసుకోవడం అవసరం.
వర్షాల్లో తడవడం వల్ల గాలిలో ఉండే చల్లదనం ముక్కులోని లోపలి పొరపై ప్రభావం చూపిస్తుంది. ఫలితంగా ముక్కు ఉబ్బిపోతూ శ్వాస తీసుకోవడం కష్టమవుతుంది. ఇలాంటి సమయంలో గోరువెచ్చని నీటితో ముక్కును శుభ్రపరచడం, అవసరమైతే నాసల్ స్ప్రే వాడటం, చల్లని పదార్థాలనుంచి దూరంగా ఉండటం మంచిది.
మరో ఆందోళనకరమైన సమస్య ముక్కు నుంచి రక్తస్రావం కావడం. వాతావరణ మార్పుల కారణంగా ముక్కులోని నాళాలు బలహీనంగా మారి చిలిపోవచ్చు. ముఖ్యంగా చలికాలం నుంచి వర్షాకాలం వచ్చిన సమయంలో ఇది ఎక్కువగా జరుగుతుంది. ముక్కును పదే పదే తుడవకూడదు. రక్తస్రావం వస్తే తలను కొద్దిగా ముందుకు వంచి ముక్కుపై మృదువుగా ఒత్తిడి పెట్టడం వల్ల రక్తస్రావం తగ్గుతుంది.
వాతావరణానికి తగ్గట్టుగా…
ఈ సమస్యలన్నీ సాధారణంగానే కనిపించినా, ముందస్తుగా జాగ్రత్తలు తీసుకుంటే వాటిని నివారించవచ్చు. ఉదాహరణకు, రోజూ వేడి నీటిని తాగడం, శరీరాన్ని పొడిగా ఉంచడం, వాతావరణానికి తగ్గట్టుగా బట్టలు ధరించడం వల్ల శ్వాస సంబంధిత ఇబ్బందులు తగ్గుతాయి. ఆవిరి పట్టడం వల్ల ముక్కులో ఉండే ధూళి, ఫంగస్ కణాలు బయటకు వచ్చి శ్వాస మార్గం శుభ్రంగా ఉంటుంది.
శరీరంలో రోగనిరోధక శక్తిని పెంచే విధంగా ఆహారాన్ని తీసుకోవడం కూడా ముఖ్యం. విటమిన్ C, ప్రొటీన్లు, ఫైబర్ ఎక్కువగా ఉన్న ఆహార పదార్థాలు ముక్కు ఆరోగ్యాన్ని రక్షించడంలో సహాయపడతాయి. అలాగే, వ్యక్తిగత పరిశుభ్రత పాటించడం ద్వారా ఫంగల్, బాక్టీరియల్ ఇన్ఫెక్షన్లను దూరంగా ఉంచవచ్చు.
Also Read: https://teluguprabha.net/health-fitness/side-effects-of-eating-too-many-almonds-daily-on-health/
వర్షాకాలంలో జలుబు, దగ్గు, ముక్కు ఇన్ఫెక్షన్ల ముప్పు పెరగడంతో, బయటకు వెళ్లినప్పుడు మాస్క్ వాడటం, మాయిశ్చర్ ఎక్కువగా ఉండే ప్రదేశాల నుంచి దూరంగా ఉండటం ఆరోగ్య రీత్యా అవసరం. తడి బట్టలు మార్చకుండా ఎక్కువసేపు ఉండకూడదు. ముఖ్యంగా పిల్లలు, వృద్ధులు ఈ కాలంలో ఎక్కువ అప్రమత్తంగా ఉండాలి.
ముక్కుకు సంబంధించిన చిన్న చిన్న సమస్యలు ఎక్కువమంది నిర్లక్ష్యం చేస్తారు. కానీ, ఇవి ఎక్కువ కాలం అలాగే కొనసాగితే శ్వాస సంబంధిత పెద్ద సమస్యలకు దారితీసే ప్రమాదం ఉంది. అందుకే వర్షాకాలాన్ని ఆనందించడమే కాకుండా, ఆరోగ్యపరంగా జాగ్రత్తలు తీసుకోవడం ఎంతో ముఖ్యం.
ఇటువంటి పరిస్థితుల్లో హోం రెమిడీస్ కూడా ఎంతో ఉపశమనం ఇస్తాయి. ఉదాహరణకు తులసి ఆకుల పొడి, పసుపు కలిపిన వేడి పాలం, తినే చక్కెర కాకుండా తేనెతో చేయబడిన పదార్థాలు సహజమైన ఉపశమన మార్గాలు. అయితే సమస్య ఎక్కువగా ఉంటే డాక్టరు సలహా తీసుకోవడం తప్పనిసరి.
మొత్తానికి, వర్షాకాలంలో ముక్కు ఆరోగ్యాన్ని నిర్లక్ష్యం చేయకుండా, సాధారణ అలవాట్లను మార్చడం, ఇంట్లోనే తీసుకునే చిన్న జాగ్రత్తలతో పెద్ద సమస్యలను నివారించవచ్చు. శుభ్రత, సానిటేషన్ పాటించడం, చల్లని వాతావరణంలో శరీరాన్ని కప్పుకోవడం వంటి మార్గాలు ఆరోగ్యాన్ని రక్షించడంలో కీలక పాత్ర పోషిస్తాయి. ముక్కు ఆరోగ్యంగా ఉంటే శ్వాస కూడా సరళంగా సాగుతుంది, జీవన శైలీ కూడా ఆరోగ్యంగా ఉంటుంది.
