India-Brazil Partnership Key to Global Stability : ప్రపంచంలో నెలకొన్న అనిశ్చితి, అస్థిర పరిస్థితుల నడుమ భారత్-బ్రెజిల్ మధ్య బలపడుతున్న సంబంధాలు ప్రపంచ శాంతి, స్థిరత్వానికి సరికొత్త మార్గాన్ని చూపిస్తున్నాయి. ఇటీవల బ్రెజిల్‌లో జరిగిన ఇరు దేశాధినేతల చర్చలు, కుదిరిన కీలక ఒప్పందాలు ఈ దిశగా ఒక ముందడుగు అని చెప్పాలి. ఇంతకీ ఈ చర్చల సారాంశం ఏమిటి? ఏయే రంగాల్లో ఈ దేశాల మధ్య సహకారం కొత్త పుంతలు తొక్కుతోంది? భవిష్యత్తులో ఈ భాగస్వామ్యం ఎలాంటి ప్రభావం చూపనుంది?
ప్రపంచ స్థిరత్వానికి మూలస్తంభం :బ్రెజిల్ అధ్యక్షుడు లూయిస్ ఇనాసియో లులా డ సిల్వాతో జరిగిన ద్వైపాక్షిక చర్చల అనంతరం, భారత ప్రధాని నరేంద్ర మోదీ సంయుక్త ప్రెస్ కాన్ఫరెన్స్‌లో మాట్లాడుతూ, భారత్-బ్రెజిల్ మధ్య ద్వైపాక్షిక సంబంధాలు ప్రపంచ స్థాయిలో స్థిరత్వానికి మూలస్తంభంగా నిలుస్తున్నాయని స్పష్టం చేశారు. ఈ భాగస్వామ్యం కేవలం ‘గ్లోబల్ సౌత్’ దేశాల ప్రయోజనాల కోసమే కాదని, మొత్తం మానవాళి శ్రేయస్సు కోసం అని ఆయన ఉద్ఘాటించారు. ప్రపంచ వేదికలపై గ్లోబల్ సౌత్ దేశాల తరపున మాట్లాడటం భారతదేశం, బ్రెజిల్ వంటి పెద్ద ప్రజాస్వామ్య దేశాల నైతిక బాధ్యత అని ప్రధాని మోదీ అన్నారు. ఇది మానవాళి సంక్షేమానికి అత్యంత అవశ్యకమని ఆయన పునరుద్ఘాటించారు.
ఉగ్రవాదంపై ఉక్కుపాదం: జీరో టాలరెన్స్ విధానం : ప్రపంచ శాంతికి పెను సవాలుగా మారిన ఉగ్రవాదం విషయంలో ఇరు దేశాలు కఠిన వైఖరి అవలంబించాయి. ఉగ్రవాదాన్ని ఏమాత్రం సహించేది లేదని ప్రధాని మోదీ స్పష్టం చేశారు. ఉగ్రవాదాన్ని రూపుమాపే విషయంలో ఇరు దేశాలు ఒకే అభిప్రాయంతో ఉన్నాయని, ఉగ్రవాదాన్ని సపోర్ట్ చేసే దేశాలపట్ల కూడా ‘జీరో టాలరెన్స్’ విధానాన్ని పాటిస్తున్నట్లు పేర్కొన్నారు. రక్షణ రంగంలో ఈ ఇరు దేశాల మధ్య సహకారం పరస్పర విశ్వాసానికి సంకేతమన్నారు.రక్షణ పరిశ్రమల్లో సహకారాన్ని మరింత పెంచుతామని, అలాగే AI, సూపర్ కంప్యూటింగ్, డిజిటల్ పబ్లిక్ ఇన్‌ఫ్రాస్ట్రక్చర్ వంటి రంగాల్లో భాగస్వామ్యం వేగంగా విస్తరిస్తోందని ప్రధాని మోదీ వెల్లడించారు.
డిజిటల్ విప్లవం: యూపీఐ విస్తరణ, ఇంధన భద్రత : భారత్, బ్రెజిల్ దేశాల మధ్య ఇంధన రంగంలో సహకారం గణనీయంగా పెరుగుతోంది అని ప్రధాని మోదీ తెలిపారు.శుద్ధ ఇంధనం, పర్యావరణ పరిరక్షణ విషయంలో సహకారాన్ని పెంపొందించేందుకు ఒక ఒప్పందం కుదిరిందని తెలిపారు. భారత్ అభివృద్ధి చేసిన విప్లవాత్మక యూపీఐ (Unified Payments Interface) వ్యవస్థను బ్రెజిల్‌లో ప్రవేశపెట్టే యోచనపై రెండూ దేశాలు కలిసి పనిచేస్తున్నట్లు మోదీ ప్రకటించారు. డిజిటల్ పబ్లిక్ ఇన్‌ఫ్రాస్ట్రక్చర్, అంతరిక్ష రంగాల్లో భారత అనుభవాన్ని బ్రెజిల్‌తో పంచుకోవడానికి సంసిద్ధంగా ఉన్నామని ఆయన స్పష్టం చేశారు.
వైద్యం, వ్యవసాయం: సంప్రదాయ చికిత్సలకు ప్రోత్సాహం : వైద్య రంగంలో ఇరు దేశాల మధ్య సహకారం విస్తరిస్తోందని మోదీ వెల్లడించారు. ఆయుర్వేదం, సంప్రదాయ వైద్యం వ్యవస్థలను బ్రెజిల్‌లో విస్తరించేందుకు ప్రయత్నాలు కొనసాగుతున్నాయని తెలిపారు. వ్యవసాయం, పశుపోషణ, ఆహార ప్రాసెసింగ్ రంగాల్లో రెండు దేశాలు కలసి పనిచేస్తున్నట్లు పేర్కొన్నారు. ఇది ఇరు దేశాల గ్రామీణ ఆర్థిక వ్యవస్థలకు ప్రోత్సాహం ఇవ్వడమే కాకుండా, ఆహార భద్రతకు దోహదపడుతుంది.
వాణిజ్య లక్ష్యం: $20 బిలియన్లు, బంధాల బలోపేతం : భారత్-బ్రెజిల్ మధ్య ద్వైపాక్షిక వాణిజ్యాన్ని వచ్చే ఐదేళ్లలో 20 బిలియన్ డాలర్లకు (సుమారు రూ.1,60,000 కోట్లు) పెంచాలనే లక్ష్యాన్ని ఇద్దరు నాయకులు ప్రకటించారు. బ్రెజిల్‌కు ఫుట్‌బాల్ అంటే ఇష్టమని, క్రికెట్ అంటే భారత్‌కు ప్రాధాన్యమని, ఈ రెండు దేశాలు ఒకే జట్టుగా పనిచేస్తే, 20 బిలియన్ డాలర్ల లక్ష్యం సుసాధ్యమే అని మోదీ ఉద్ఘాటించారు. అలాగే, వీసా కేంద్రాల్లో బారులు తీరకుండా, పర్యాటకులు, విద్యార్థులు, క్రీడాకారులు, వ్యాపారవేత్తలు స్వేచ్ఛగా వెళ్లేలా తాము చర్యలు తీసుకుంటామని మోదీ అన్నారు. ఈ చర్యలు ప్రజల మధ్య సంబంధాలను, వ్యాపార కార్యకలాపాలను మరింత సులభతరం చేస్తాయి. బ్రెజిల్ అధ్యక్షుడు లూలా, ప్రధాని మోదీకి తమ దేశ అత్యున్నత పౌర పురస్కారమైన ‘గ్రాండ్ కాలర్ ఆఫ్ ది నేషనల్ ఆర్డర్ ఆఫ్ ది సదరన్ క్రాస్’ను ఈ సమావేశంలో అందజేశారు.
మూడు కీలక ఒప్పందాలు: భవిష్యత్ భాగస్వామ్యానికి పునాది : భారత్-బ్రెజిల్ దేశాధినేతల మధ్య జరిగిన చర్చల్లో మూడు కీలక ఒప్పందాలపై సంతకాలు జరిగాయని ప్రత్యేక మీడియా సమావేశంలో ఎంఈఏ సెక్రటరీ (ఈస్ట్) పి. కుమారన్ తెలిపారు.
ఉగ్రవాదం, అంతర్జాతీయ నేరాలపై సహకారం: ఉగ్రవాదాన్ని ఎదుర్కోవడంలో, అంతర్జాతీయ నేరాలను అరికట్టడంలో ఇరు దేశాలు కలిసి పనిచేయడానికి అంగీకరించాయి.
డిజిటల్ రంగంలో సమస్యల పరిష్కారం: డిజిటల్ పబ్లిక్ ఇన్‌ఫ్రాస్ట్రక్చర్, సైబర్ భద్రత వంటి రంగాలలో సహకారాన్ని పెంపొందించడం, ఎదురయ్యే సవాళ్లను కలిసి ఎదుర్కోవడం లక్ష్యంగా ఈ ఒప్పందం కుదిరింది.
పునరుత్పత్తి ఇంధన రంగం: శుద్ధ ఇంధనం, పునరుత్పాదక ఇంధన వనరుల అభివృద్ధిలో సహకరించుకోవాలని నిర్ణయించుకున్నాయి. ఇది పర్యావరణ పరిరక్షణకు, ఇంధన భద్రతకు అత్యంత కీలకం. ఈ చర్చలు, ఒప్పందాలు భారత్-బ్రెజిల్ సంబంధాలలో కొత్త అధ్యాయాన్ని ప్రారంభించాయి. ప్రపంచ స్థాయిలో ఈ దేశాల భాగస్వామ్యం మరింత బలోపేతం కావడానికి, అంతర్జాతీయ స్థిరత్వానికి గణనీయమైన కృషి చేయడానికి ఇది దోహదపడుతుందని విశ్లేషకులు పేర్కొంటున్నారు.
