DRDO indigenous combat parachute : భారత రక్షణ పరిశోధన, అభివృద్ధి సంస్థ (DRDO) ఆత్మనిర్భర్ భారత్ దిశగా మరో చారిత్రక మైలురాయిని అందుకుంది. పూర్తిగా స్వదేశీ పరిజ్ఞానంతో తయారుచేసిన ‘మిలిటరీ కంబాట్ పారాచూట్ సిస్టమ్’ (MCPS)తో, ఏకంగా 32,000 అడుగుల ఎత్తు నుంచి ఫ్రీ-ఫాల్ జంప్‌ను విజయవంతంగా పరీక్షించింది. ఈ అద్భుత విజయంపై రక్షణ మంత్రి రాజ్‌నాథ్ సింగ్ డీఆర్‌డీఓ శాస్త్రవేత్తలను ప్రశంసలతో ముంచెత్తారు. అసలు ఏమిటీ పారాచూట్ ప్రత్యేకత..? దీనివల్ల మన సైన్యానికి కలిగే ప్రయోజనాలేంటి..?

భారత వైమానిక దళానికి చెందిన ముగ్గురు ధైర్యవంతులైన సైనికులు (Wg Cdr విశాల్ లకేశ్, MWO ఆర్జే సింగ్, MWO వివేక్ తివారీ), 32,000 అడుగుల ఎత్తు నుంచి ఫ్రీ-ఫాల్ జంప్ చేసి, ఈ స్వదేశీ పారాచూట్ వ్యవస్థ  సామర్థ్యాన్ని, విశ్వసనీయతను ప్రపంచానికి చాటిచెప్పారు. ఇది 25,000 అడుగుల కంటే ఎక్కువ ఎత్తులో ఉపయోగించగల భారతదేశపు మొట్టమొదటి పారాచూట్ వ్యవస్థగా రికార్డు సృష్టించింది.

“దేశానికి గర్వకారణమైన క్షణం! కీలకమైన రక్షణ సాంకేతికతలో స్వావలంబన వైపు ఇదొక అద్భుతమైన మైలురాయి.”
– రాజ్‌నాథ్ సింగ్, భారత రక్షణ మంత్రి

ఏమిటీ పారాచూట్ ప్రత్యేకతలు : డీఆర్‌డీఓ ప్రయోగశాలలైన ADRDE (ఆగ్రా), DEBEL (బెంగళూరు) సంయుక్తంగా ఈ అత్యాధునిక పారాచూట్ వ్యవస్థను అభివృద్ధి చేశాయి. దీనికి అనేక ప్రత్యేకతలున్నాయి.

తక్కువ వేగంతో ల్యాండింగ్: సైనికులు సురక్షితంగా, తక్కువ వేగంతో భూమిపైకి దిగేందుకు ఇది వీలు కల్పిస్తుంది.

దిశా నిర్దేశం: మెరుగైన దిశాత్మక నియంత్రణ (directional control) ఉండటం వల్ల, సైనికులు తాము అనుకున్న ప్రదేశంలో కచ్చితంగా ల్యాండ్ అవ్వగలరు.

స్వదేశీ నావిగేషన్: మన దేశపు నావిగేషన్ వ్యవస్థ ‘NavIC’ (Navigation with Indian Constellation)తో దీనిని అనుసంధానించారు.

భారత్‌కు ఎలాంటి ప్రయోజనం : ఈ స్వదేశీ పారాచూట్ వ్యవస్థ వల్ల భారత సైన్యానికి అనేక రకాలుగా ప్రయోజనం చేకూరనుంది.
విదేశీ ఆధారపడటానికి చెక్: ఇప్పటివరకు ఇలాంటి అత్యాధునిక పారాచూట్ వ్యవస్థల కోసం మనం విదేశాలపై ఆధారపడాల్సి వచ్చేది. ఇకపై ఆ అవసరం గణనీయంగా తగ్గుతుంది.
త్వరిత నిర్వహణ: స్వదేశీ పరిజ్ఞానం కావడంతో, దీని నిర్వహణ, మరమ్మతులు సులభంగా, వేగంగా పూర్తవుతాయి.
యుద్ధ సమయాల్లో కీలకం: యుద్ధం లేదా సంక్షోభ సమయాల్లో, విదేశీ దిగుమతులపై ఆధారపడకుండా, మన సైన్యం పూర్తిస్థాయిలో కార్యాచరణ సామర్థ్యాన్ని ప్రదర్శించడానికి ఇది దోహదపడుతుంది. ఈ విజయం, వైమానిక డెలివరీ వ్యవస్థల రంగంలో స్వావలంబన వైపు భారత్ వేసిన ఓ కీలకమైన అడుగు అని డీఆర్‌డీఓ ఛైర్మన్ సమీర్ వి. కామత్ కొనియాడారు.