Miniature Ganesh idol artist : భక్తికి రూపం ఉంటుందా? కళకు పరిమితి ఉంటుందా? ఈ రెండు ప్రశ్నలకు తన జీవితాన్నే సమాధానంగా మలిచారు మహారాష్ట్రలోని నాసిక్‌కు చెందిన సంజయ్ క్షత్రియ. గణనాథుడిపై ఉన్న అచంచలమైన భక్తిని, తన చేతిలోని అద్భుతమైన కళతో జోడించి, గత 30 ఏళ్లుగా ఆయన సృష్టిస్తున్న అద్భుతాలు చూస్తే ఎవరైనా అవాక్కవ్వాల్సిందే. వేలు, లక్షలు కాదు… ఏకంగా 43,500 సూక్ష్మ గణేశ విగ్రహాలను ఆయన తన చేతులతో తీర్చిదిద్దారు. మరి, పెయింటర్‌గా జీవితం ప్రారంభించిన ఆయనకు ఈ సూక్ష్మ కళపై ఆసక్తి ఎలా కలిగింది..? ఈ 30 ఏళ్ల కళా తపస్సులో ఆయన ఎదుర్కొన్న సవాళ్లేంటి? బాలీవుడ్ బిగ్‌బీ అమితాభ్ బచ్చన్‌నే ప్రశంసించేలా చేసిన ఆయన కళా నైపుణ్యం వెనుక ఉన్న కథేంటి..?

ఒక ఆలోచన.. వేల రూపాలు: నాసిక్‌లోని సిన్నర్ తాలూకాకు చెందిన సంజయ్ క్షత్రియ వృత్తిరీత్యా ఒక పెయింటర్. ఓ రోజు గణేశుడి విగ్రహాన్ని చూసిన ఆయనకు, ఆ స్వామి రూపాన్ని సూక్ష్మంగా ఎందుకు మలచకూడదు అనే ఆలోచన తట్టింది. అంతే, ఆ క్షణం నుంచి ఆయన చేతులు అద్భుతాలు చేయడం ప్రారంభించాయి. తొలుత వైట్‌నింగ్ పౌడర్, జిగురుతో మూడు అంగుళాల పరిమాణంలో, విభిన్న రూపాల్లో వెయ్యి ప్రతిమలను రూపొందించారు. వాటికి ప్రజల నుంచి అపూర్వ ప్రశంసలు లభించడంతో, ఆయనలో మక్కువ మరింత పెరిగింది.

30 ఏళ్ల కళా యజ్ఞం: వచ్చే ఆదాయం తక్కువే అయినా, కళపై ఉన్న ఆసక్తిని, గణపతిపై ఉన్న భక్తిని ఆయన వదులుకోలేదు. తన భార్య వందన, కుమార్తెలు పూజా, అక్షదల సహాయంతో గత 30 ఏళ్లుగా ప్రతిరోజూ కొంత సమయాన్ని ఈ సూక్ష్మ కళకే కేటాయించారు.
43,500 విగ్రహాలు: శాడు బంకమట్టి, జిగురును ఉపయోగించి పావు అంగుళం నుంచి మూడు అంగుళాల పరిమాణంలో, త్రిముఖి, పంచముఖి వంటి ఎన్నో విభిన్న రూపాల్లో ఏకంగా 43,500 విగ్రహాలను తయారు చేశారు.

విగ్రహాలే కాదు.. ఆలయాల ప్రతిరూపాలు కూడా: సంజయ్ ప్రతిభ కేవలం విగ్రహాలకే పరిమితం కాలేదు. ఆయన సృజన అబ్బురపరిచే ఆలయాల ప్రతిరూపాలను కూడా ఆవిష్కరించింది.

లక్ష అగ్గిపుల్లలతో ముంబైలోని సిద్ధివినాయక ఆలయం.
11 కిలోల పత్తితో ఢిల్లీ అక్షరధామ్ ఆలయం.
25 కిలోల సగ్గుబియ్యంతో తాజ్‌మహల్ ప్రతిరూపం.
11,000 సూక్ష్మ గణపతులతో ఒక మహాగణేశుడి రూపం.
ఆడియో క్యాసెట్‌పై సూదితో చెక్కిన 1,100 గణేశ రూపాలు… ఇలా ఆయన కళాఖండాల జాబితా చాంతాడంత ఉన్నాయి.

బిగ్‌బీ ప్రశంసలు.. 51,000 సంకల్పం: ఈ ఏడాది కేవలం మూడు నెలల్లోనే 12 జ్యోతిర్లింగాలు, 51 దేవాలయాల సూక్ష్మ ప్రతిరూపాలను (భూతద్దంలో చూసేంత చిన్నవి) తయారు చేశారు. సంజయ్ అంకితభావానికి, కళా నైపుణ్యానికి ముగ్ధుడైన బాలీవుడ్ మెగాస్టార్ అమితాభ్ బచ్చన్, ఆయన్ను ప్రశంసిస్తూ స్వయంగా ఒక లేఖ రాశారు. “ప్రజల ప్రశంసలే నాకు స్ఫూర్తి. లక్షల రూపాయలు ఖర్చయినా, ఎన్నో కష్టాలు ఎదురైనా, గణేశుడి కృపతోనే ఇదంతా సాధ్యమైంది” అని సంజయ్ వినమ్రంగా చెబుతారు. ఇప్పటికి 43,500 విగ్రహాలు పూర్తి చేసిన ఆయన, మొత్తం 51,000 ప్రతిమలను తయారు చేయాలనే సంకల్పంతో ముందుకు సాగుతున్నారు.