DRDO chief on Operation Sindoor’s success : పొరుగు దేశం నుంచి ఉగ్రవాదుల చొరబాటుకు ప్రతీకారంగా భారత సైన్యం చేపట్టిన “ఆపరేషన్ సిందూర్” కేవలం ఒక సైనిక చర్య కాదని, రక్షణ రంగంలో భారత్ సాధించిన స్వావలంబనకు, సాంకేతిక సత్తాకు అది ఒక బహిరంగ ప్రకటన అని రక్షణ పరిశోధన, అభివృద్ధి సంస్థ (డీఆర్​డీఓ) ఛైర్మన్ సమీర్ కామత్ ఉద్ఘాటించారు. కేవలం ప్రతీకార చర్యగానే భావిస్తున్న ఈ ఆపరేషన్ వెనుక ఉన్న అసలు ఉద్దేశ్యం ఏంటి..? ఏయే స్వదేశీ ఆయుధాలు ఇందులో కీలక పాత్ర పోషించాయి..? రక్షణ రంగంలో భారత్ నిజంగానే అంత బలోపేతమైందా..?

స్వావలంబన పథంలో సరికొత్త ‘సిందూర్’ : డిఫెన్స్​ ఇన్​స్టిట్యూట్ ఆఫ్ అడ్వాన్స్​డ్​ టెక్నాలజీ (డీఐఏటీ) 14వ స్నాతకోత్సవంలో సమీర్ కామత్ చేసిన వ్యాఖ్యలు, భారత రక్షణ రంగ సామర్థ్యాన్ని కొత్త కోణంలో ఆవిష్కరించాయి. ఈ ఆపరేషన్ విజయం వెనుక ఉన్న సాంకేతిక శక్తిని, వ్యూహాత్మక దార్శనికతను ఆయన మాటల్లోనే వివరంగా చూద్దాం.

డీఆర్​డీఓ చీఫ్ మాటల్లో… స్వావలంబన ‘సిందూర్’ : పశ్చిమ సరిహద్దుల వెంబడి అత్యంత సమన్వయంతో చేపట్టిన ఈ బహుముఖ ఆపరేషన్, భారత సైనికుల ధైర్యసాహసాలతో పాటు, వారికి అండగా నిలిచిన దేశీయ సాంకేతికతను ప్రపంచానికి చాటిచెప్పిందని కామత్ అన్నారు.

“ఆపరేషన్ సిందూర్ కేవలం ఒక మిషన్ కాదు, అంతకుమించి. ఇది రక్షణ రంగంలో భారత్ సాధించిన స్వావలంబన, వ్యూహాత్మక దూరదృష్టి, మరియు స్వదేశీ సాంకేతిక బలం ద్వారా తన సరిహద్దులను కాపాడుకోగల సామర్థ్యాన్ని ప్రపంచానికి చేసిన ఒక ప్రకటన,” అని సమీర్ కామత్ స్పష్టం చేశారు. ఈ ఆపరేషన్, భారతదేశం తన సరిహద్దుల రక్షణ కోసం ఎవరిపైనా ఆధారపడాల్సిన అవసరం లేదనే బలమైన సందేశాన్ని ఇచ్చిందని ఆయన అభిప్రాయపడ్డారు.

స్వదేశీ అస్త్రాల సత్తా : ఈ ఆపరేషన్ విజయవంతం కావడంలో పూర్తిగా దేశీయంగా అభివృద్ధి చేసిన ఆయుధ వ్యవస్థలే కీలక పాత్ర పోషించాయని డీఆర్​డీఓ చీఫ్ వెల్లడించారు. ఇందులో ప్రధానమైనవి…

క్షిపణి వ్యవస్థలు: ఉపరితలం నుంచి గగనతలానికి ప్రయోగించే ‘ఆకాశ్’, మధ్యస్థ-శ్రేణి క్షిపణులు (MRSAM), బ్రహ్మోస్ సూపర్ సోనిక్ క్రూయిజ్ క్షిపణులు.

నిఘా – రక్షణ: డీ4 యాంటీ-డ్రోన్ వ్యవస్థ, ఏడబ్ల్యూఎన్​సీ (AWACS) వైమానిక ముందస్తు హెచ్చరిక  నియంత్రణ వ్యవస్థ,  ఆకాశ్​టీర్​ కమాండ్ అండ్ కంట్రోల్ వ్యవస్థ.

ఇతర సాంకేతికతలు: స్వదేశీ సెన్సార్లు, మానవ రహిత ప్లాట్‌ఫారమ్‌లు, సురక్షిత కమ్యూనికేషన్ వ్యవస్థలు, కృత్రిమ మేధ (AI) ఆధారిత సపోర్ట్ సిస్టమ్స్ వంటివి ఈ విజయంలో పాలుపంచుకున్నాయి.

నేపథ్యం… పహల్గాం దాడికి ప్రతీకారం : ఈ ఏడాది ఏప్రిల్ 22న జమ్మూకశ్మీర్‌లోని పహల్గాంలోకి చొరబడిన పాక్ ఉగ్రవాదులు, హిందూ యాత్రికులను లక్ష్యంగా చేసుకుని దాడికి పాల్పడ్డారు. ఈ ఘటనలో  26 మంది భారతీయ పౌరులు ప్రాణాలు కోల్పోయారు. ఈ అమానుష దాడికి ప్రతీకారంగానే భారత సైన్యం “ఆపరేషన్ సిందూర్” చేపట్టి, పాక్ ఆక్రమిత కశ్మీర్ (పీవోకే)లోని ఉగ్ర స్థావరాలను ధ్వంసం చేసింది.

రికార్డు స్థాయిలో రక్షణ ఉత్పత్తి: రాజ్​నాథ్ సింగ్ : భారత స్వావలంబనకు అద్దం పడుతూ, 2024-25లో దేశ వార్షిక రక్షణ ఉత్పత్తులు ఆల్​ టైమ్ గరిష్ఠ స్థాయి అయిన రూ.1,50,590 కోట్లకు చేరుకున్నాయని రక్షణ మంత్రి రాజ్​నాథ్​ సింగ్ ప్రకటించారు. గత ఆర్థిక సంవత్సరంతో పోలిస్తే ఇది దాదాపు 18% వృద్ధిని సూచిస్తుంది. 2019-20లో రూ.79,071 కోట్లుగా ఉన్న ఉత్పత్తి, నేడు 90% పెరగడం ప్రభుత్వ, ప్రైవేటు పరిశ్రమల సమిష్టి కృషికి నిదర్శనమని ఆయన కొనియాడారు.

“ఆపరేషన్ సిందూర్” విజయం, రికార్డు స్థాయికి చేరిన రక్షణ ఉత్పత్తులు… ఈ పరిణామాలు కేవలం సరిహద్దుల భద్రతకే కాకుండా, ‘ఆత్మనిర్భర్ భారత్’ లక్ష్య సాధనలో దేశం ఎంత దృఢంగా ముందుకు సాగుతోందో స్పష్టం చేస్తున్నాయి. ఇది భారత రక్షణ రంగంలో ఒక నూతన శకానికి నాంది పలుకుతోంది.